Nacimientu: 24-XII-1880 – Xixón
Defunción: 22-II-1955 – Xixón
Sacerdote, escritor y biblófilu nacíu en Xixón en 1880 y muertu na mesma villa en 1955.
Estudia nel Seminariu Conciliar d’Uviéu y ordénase en 1905. Dende 1921 exerce como profesor de Relixón nel Institutu Xovellanos de Xixón.
Dedica la so principal atención al estudiu de la lliteratura en llingua asturiana, de la que diba a reunir una importante biblioteca, notable pola cantidá de folletos y fueyes sueltes con testos nesta llingua.
Publicó “Los nuevos bablistas”, llibru apaecíu en Xixón en 1925, obra de munchu interés y fundamental pal conocimientu de la lliteratura del País. Trátase de l’antoloxía más importante depués de la de Caveda de 1839 y de la de Fermín Canellad de 1887.
La segunda parte qu’anunciaba, con una gramática y un diccionariu en llingua asturiana, queda entá inédita.
Tamién espublizó “Jovellanos y las ciencias morales y políticas. Estudio crítico” que foi premiáu pola Real Academia de les Ciencies Morales y Polítiques en 1911 con motivu del Certame abiertu nel centenariu del polígrafu xixonés. Ye autor del himnu de Covadonga, escritu en 1918 con motivu del mil doscientos aniversariu de la Batalla de Covadonga.
D’esta miente apaecieron artículos de so sobre la llingua asturiana nel diariu carlista d’Uviéu “Las Libertades”.
García Rendueles foi miembru de númberu del Institutu d’Estudios Asturianos y pal so ingresu en dicha corporación dio a la lluz un trabayu sobre la lliturxa popular asturiana, editáu n’Uviéu en 1950.
