Nós nun tamos de folixa na playa de Poniente, nin tamos arrodiaos por dellos reconocíos artistes d’esti país, nin cellebramos el dí d’Asturies. Y nun ye que nun queramos tar neses circustancies. Yá mos prestaría tener daqué que cellebrar, yá mos prestaría axuntamos equí pa dicir que Asturies ta de norabona, que la nuesa xente tién trabayu, que los nuesos mozos nun emigren, que la nuesa cadarma industrial ta iguada dempués d’años d’esbaraxe y d’afondigamientu, qu’el nuesu mediu ambiente ta llimpiu, que la nuesa llingua ye oficial y ta normalizada, que los nuesos gobernantes tan esmolecíos pol futuru d’esti pueblu.

Pero la rialidá ye testerona. Asturies sigue dafechamente na fondigonada, la xente meyor formao ta marchando a tentebonete, la industria sacrifícase nel altar d’una especialización tan ababayante como ruina, la nuesa llingua ta arrequexada y frayada, y la nuesa ñatura ta dando boquiaes embaxo’l pesu d’autovíes, teleféricos, mines d’oru, ocalitos ya un turismu depredador. 

Mentantu, los partíos tan a les sos coses. El PSOE, partíu gobernante, cuantayá que perdiera’l norte, anda al debalu, namái que garráu a un poder que ye lo que lu caltién xuníu, magar que a morraes pente les families. El PP ye un vexetal que ta allampando porque un cacique fine por venir a esta provincia a poner orde. Ya’l gobiernu ya’l parllamentu, el ún colonial ya l’otru inútil, tan más preocupaos polos premios principucu que pol pueblu del que viven ya’l que deberíen servir.

Y, agora, por si fora poco, tamos globalizaos. ¡Qué pallabra más fata!. ¿Qué ye eso de la globalización?. Si la globalización quier dicir que cá vegada tamos más interrellacionaos unos con otros, ¡vaya babayada!, eso yá lo sabíamos dende cuantayá. Si quier dicir qu’el capitalismu espárdese per auquier, ¡otra babayada!, eso tamién lo sabe cualisquier, nun ye mester dir a Harvard pa saber eso.

Pero non, cola dichosa globalización lo que quieren planteganos ye que hai que aceutar lo que mos venga, que nun hai posibilidá de resistencia, que ye de fatos dir contra les sacraes tendencies. Oponese a la santa globalización paez ser cosa de llocos, de xente anclao, polo menos, polo menos, na Primera Internacional. O más allá na hestoria.

Un columnista, poco conocíu, seya dicho de pasu, falaba de nós hai un añu y, pa fadianos, dicía que vivíamos n’aldega d’Astérix, al marxe de la rialidá. Nun se refería al ferviellu máxicu, pero poco-y faltaba. Falaba de nós como d’irreductibles, y con eso,… con eso igual pensaba mancanos na moral.

Por embargu, el símil nun taba mal. El duru críticu apuntaba una tendencia de llucha perclara: contra los procesos eufemísticamente llamaos globalizadores, esos procesos que nun son namái que programes bien camentaos d’uniformización, esfarrape de la ñatura, aculturación, espoliu de la riqueza y robu del poder políticu pal beneficiu de les clases dominantes de les naciones dominantes, cabe un camín.

Esi camín ye la reafirmación de la identidá de los pueblos que nun quieren morrer, que nun quieren ser como los pollinos –que rebuznen igual en toles partes del mundiu-, que nun quieren xintar hamburgueses tolos díes, que nun quieren entregar los sos homes y les sos muyeres a una especialización llaboral denigrante, que nun quieren ver l’acabu de los sos recursos ñaturales pal beneficiu de grandes corporaciones trasnacionales.

Estes corporaciones tan asitiaes nos Estaos Xuníos, Canadá, Australia, Xapón, y nos cabezaleros estaos-nación de la Xunión Europea. A los sos gobiernos, minorizaos nes sos competencies pola mor d’un neolliberalismu económicu xabaz, antihumanu, antisocial, y antiecolóxicu, namái-yos queda como misión la de convertise nel últimu abellugu pa la sinrazón, na cabera fuercia de choque.

Cuando los manifestantes de Seattle y de Xénova llantaron cara a los globalizadores aconceyaos, los poderes públicos norteamericanos ya italianos punxeran la brutalidá policial al serviciu de los que, a la postre, paguen les nómines.

A los estaos-nación, y pente ellos l’español, yá nun-yos queda más misión na hestoria que la de ser el brazu represor d’un neolliberalismu económicu que quier finar colo que de política social caltiense nes sociedaes ocidentales y torgar una mínima aplicación d’estes polítiques nos países del sur.

Nesti contestu, Asturies, como nación, y los asturianos, como ciudadanos, somos víctimes d’esi programe uniformizador, represivu y lladrón. Asturies ye ún de tantos pueblos que carez el pesu d’esta cleptocracia global. La nuesa cultura, la nuesa llingua, los nuesos recursos ñaturales, la nuesa hestoria, los nuesos seutores productivos, la nuesa forma de vida, la nuesa dixnidá como asturianos, sufren una agresión costante dende’l nueu sisteme políticu-económicu, bien representáu enriba’l nuesu llombu al traviés del estáu español.

Pero nun carecemos estos pilancos namái como asturianos, sinon tamién como trabayadores. Nesti entamu de sieglu, ye necesario llevantar otra vegada la bandera’l trabayu. Munchos dicen, encluso lo diz dalgún esquierdista encamentáu, qu’eso de la clas trabayadora ye cosa del pasáu, que agora andamos per otres caleyes, ¿qué caleyes?, ¡agora too son autovíes!.

Collacies y collacios, pué qu’el conceutu de clas necesite una nuea lletura, pero el conceutu de trabayador, el conceutu de pueblu trabayador, nun tién dengún misteriu.

Los trabayadores son, cenciellamente, la xente que produz la riqueza, la que mueve los trenes, la que pesca nes mares, la qu’enseña nes escueles y nes universidaes, la que arriesga el so padrimoñu pa poner a furrular empreses, la que investiga nos llaboratorios, la que llevanta cases, la que curia los ganaos, la que sostién l’alministración, la que tresforma el metal, la que corcha la sidre, la que vela nos hospitales, y tamién los vieyos que yá lo dieran tóo unos años p’atrás.

Y, pela so banda, nun son trabayadores los especuladores, los del pelotazu inmobiliariu, los famosucos de la tele, los reis, los burócrates sindicales, los cures trabucaires, los represores con ya ensín uniforme.

¿Qué ye lo que hai que redifinir?. Unos fabriquen riqueza, otros llevenla en macones y maniegues pa paraísos fiscales. D’un lláu, el pueblu trabayador, d’otru los parásitos sociales. ¿Tan difícil ye pescanciar esto?.

Pué pensase que na llucha contra esa llamada globalización tamos munchos n’Asturies. De fechu, decenes de grupos tan trabayando nesta xera en munches partes d’Asturies. De xuru que cuasi toos ellos tan formaos por xente solidario, polo xeneral xente mozo, porque la llucha contra la uniformización neocapitalista ta amuesando que la xente mozo, cuando alcuentra una causa xusta y clara, nun ye esi garrapiellu d’escoliongaos sociales que la drechona y la esquierdona vienen plantegándomos dende hai años. Por eso, nesti momentu, quiero mandá-ys a esos collacios un saludu caldial de los nacionalistes, de la xente d’Andecha Astur.

Pero hai otros grupos, con Izquierda Unida a la cabeza, de los que nun podemos dicir lo mesmo. Son esos grupos, políticos si ye que nun-yos cuadra más lo de funcionarios del sisteme, que camienten que la llucha antiglobalización namái ta camentada pa los indios del Amazonas, los indios del Pacífico, los indios del Sahara o los indios de Kosovo. Pero nun ye el so probleme lo que pase colos indios d’Asturies.

Cuando la uniformidá vién envuelta nun papel con barres y estrelles, ye mala; cuando el papel ye roxu y mariellu, ye bona.

Nun importa un res que los asturianos seyan uniformizaos a golpe de decretu, nun importa un res que los escolinos de Villaviciosa seyan multaos con cinco duros por cá pallabra que digan n’asturianu, nun importa un res que se financien corríes de toros en Xixón o feries alloriantes en Piloña, mentantu nun hai perres pa un veteranu y baratu concursu de tonada.

Pero, a mayores, güei pola tarde, nel mesmu Día de la Nación Asturiana, en Navia va presentase un productu televisivu tituláu “Los naviegos, los otros fronterizos”. Ye un vídeo en llingua gallega, onde se plantega la galleguización de los conceyos ocidentales asturianos, y que pon la frontera pente los dos países nel ríu Navia. Pero nun camenteis que ye cosa d’un particular, o d’un partíu políticu. Non. Si fora asina, podía nun gustamos, pero namái podríamos discrepar. Ye una produción de Televisión Española, onde esos progresistes de la diversidá y del amor a los pueblos, tan representaos nos conseyos de decisión.

Pa estos internacionalistes en América Llatina y unitaristes n’Asturies, la maldita y capitalista globalización dexa d’esistir cuando-ys toca el panchón abondosamente sorvencionáu.

Cuando, col envís d’un 8 de setiembe unitariu, falamos con estos antiglobalización tan prestosos, queríen camudar esti día reivindicativu nacional nun pastelosu Día de Asturias. Amái, magar que dicíen sofitar la presentación de proyeutos d’ordenances municipales n’asturianu, queríen que pasáramos porque esi alcuerdu nun fora vinculante. N’otres pallabres, víen bien lo de les ordenances n’asturianu pero nun diben a molestar a los sos camarades pa que les aplicasen onde gobiernen. ¿Entendéis?: amigu, déxame dos mil duros, pero que quede claro que nun ye un actu vinculante, polo que yo devolverételos o non.

La globalización nun ye de hai tres díes. Güei, esti 8 de setiembre, nesti Día de la Nación Asturiana, los asturianos cellebramos la resistencia a una de les primeres muestres de globalización impuesta. Entós, nes borrines altomedievales, los nuesos antepasaos decidieran caltener la llibertá y la independencia. Nun yeran unos fatos aisllacionistes, nin tiníen, por seguir la broma, síndrome d’Astérix. Costituyeran un reinu abondo rellacionáu internacionalmente, riba tóo col imperiu carolinxu. Llegó aquello fasta’l puntu de qu’el nuesu Alfonsu II casó con una fía de Carlomagno.

Lo que aquellos paisanos nuesos nun aceutaron fora la imposición, l’asimilación, el colonialismu. Si Cuadonga val como símbolu ye como símbolu de llibertá conquistada, la única llibertá posible. Porque llibertá concedía, nun ye llibertá, ye fueru.

Precisamente, un réximen foral ye lo más colo que cuntamos n’Asturies. Carecemos un estatutu otorgáu, que nin pudimos votar nel so día nin podemos reformar pola nuesa cuenta. Ye un estatutu nel que tienen los poderes costitucionales les cortes españoles, mentantu que la Xunta Xeneral namái pué facer propuestes que otros voten en Madrid.

Acabamos de poner una placa, que nun tardarán en quitar nin diez minutos, en remembranza del Conseyu Soberanu d’Asturies y Lleón. Aquella dómina ta arrequexada, escaecía voluntariamente pola oligarquía política que ta asitiada n’Asturies, especialmente pola esquierda de siempres, esa esquierda que pasó en pocu tiempu del economista Marx al banqueru March y del sindicalismu socialista al sindicalismu peronista.

A la fín, somos nós los que tamos revindicando la memoria d’aquellos socialistes que dieran el caberu impulsu a Asturies. ¡Pesidente Belarmino Tomás!, recoyemos la to manda. ¡Conseyu Soberanu!, reconocémoste como la cabera representación de la nación.

Nesti Día de la Nación Asturiana, desiximos un repartu equitativu de la riqueza, esa riqueza que los trabayadores llevanten y que agora acaba en cuentes cifraes.

 Dexisimos el salariu social, que nun ye lo que pedriquen los dirixentes del PSOE, que cellebren la ceremonia de la confusión, tracamundiando salariu social con renta mínima y con renta d’inserción.

Dexisimos que se pongan los preseos necesarios pa frenar la emigración de la xente mozo, con una política que nun quede nunos cartelucos como los que chisquen los afiches publicitarios d’Asturies. Una campaña na que, da-yvos cuenta, salen monos ya uniformes que nun sopelexen precisamente emplegos cualificaos, sinon básicos. ¡Igual fasta vense mui progres ellos por vestir a una rapaza de obrera del metal!. Pero lo progresista ye sofitar emplegos cualificaos, teunolóxicamente potentes. Porque los rapazos que colen d’Asturies son, básicamente, xente con conocimientos téunicos polo menos de nivel mediu.

Dexisimos tamién un escrupulosu respetu a los drechos humanos. Poro, refugamos que por ser negru, homosesual y musulmán teas que andar tapáu pela vida social. Refugamos que por ser vieyu y perder dacuando la cabeza te conviertan en un pecador d’Alzheimer. Refugamos que por ser polacu o magrebí teas que cobrar la tercera parte de lo que cobra, pol mesmu trabayu, un paisanu de Bual o una muyer de Ponga. Refugamos que por ser seropositivu teas aparcú nes orielles sociales.

Por eso, na defensa radical de los drechos humanos, desiximos tamién que por falar asturianu nun te castiguen na escuela; que por defender el puestu de trabayu nun acabes nun vis a vis con un maxistráu; que por que nun te guste lo que un puntu pinta en Llanes nun seyas tratáu como si pertenecieras al comandu Barcelona; que nun te criminalicen pola cenciella causa de discrepar, de nun aceutar el pensamientu únicu, de nun tar por globalizate.

Cuando les tropes republicanes españoles tomaron Asturies nel añu 34, paez ser que Doval, criminal de guerra y criminal de paz, dixo daqué asemeyao a “Asturies, Marruecos, namái camuda’l paisax”. Doval tinía razón: Asturies, Guatemala, Sahara, Palestina, Irlanda, Bretaña, Albania, y tantos otros pueblos,… ye lo mesmo, namái camuda’l paisax. Por eso los dovales del mundiu pasaran miéu en Derry, en Montevideo, en Pretoria, en Xerusalén, en Camagüey, en Sama.

La causa d’Asturies ye la causa d’esos otros pueblos y prestaríamos que, dende eses llatitudes estremaes, camentaran lo mesmo pa con esti cachín de la Europa atlántica.

Porque pa Asturies y pa tóos ellos, hai un mesmu programe: escontra la globalización, la soberanía; escontra la uniformidá, la diversidá; escontra la muerte que mos trae lo políticamente correcho, la vida que mos trae la utopía creadora; escontra la dependencia, la independencia.

¡Puxa Asturies!.