Entama la campaña xunitaria S.O.S Asturies

Les persones, organizaciones politiques, sindicales y sociales que roblen esti testu quieren espresar públicamente y facer llegar al conxuntu la sociedá asturiana la so voluntá d’aniciar un procesu d’alderique conxuntu al rodiu la necesidá de xenerar un espaciu de xunidá d’aición plantegando únicamente’l lema SOS ASTURIES como puntu d’aniciu y teniendo en cuenta dende’l entamu la soberanía de les presones y muerganizaciones que quieran participar, respetando la so propia perceición de la rialidá y los sos analís políticos entendiendo que sacantenes les presones y partios políticos responsables de la situación llaceriosa na que s’afaya Asturies (FSA-PSOE, IU-LV-BA y PP), la propuesta ye abierta dafechu, ensin más condicionante que’l compartir esta necesidá de trabayu xunitariu en defensa de los drechos presonales y coleutivos del pueblu asturianu.

Poro, les organizaciones que roblen esta declaración convoquen a la sociedá asturiana a manifestase esti 8 setiembre con un baberu principal compartíu baxo’l lema SOS ASTURIES y convocatoria individual de cada organización de magar les 13hores na Estación del Norte d’Uvieu áu entamaremos un actu políticu de presentación de la nueva campaña y espaciu xunitariu SOS ASTURIES.

Roblen esti testu:

ANDECHA ASTUR, PARTIU COMUNISTA DE LOS PUEBLOS D’ESPAÑA-ASTURIES (PCPE-ASTURIES), CORRIENTE SINDICAL D’IZQUIERDA (CSI), COLEUTIVOS DE MOCEDAES COMUNISTES (CMC), CORDINADORA ANTIFACISTA D’ASTURIES, DARRÉU, PARTIU CARLISTA D’ASTURIES, ASOC. CULTURAL N’AST, FUNDACIÓN ASTURIES, RISCAR ROXU, LIGA D’ESTUDIANTES MARXISTES (LEMA), ASOC. CULT. EL ROBLÓN, ENSAME SIDRERU, ATENEU CULTURAL XUAN MARIA ACEBAL, ASOC. XUV. BILORTU, FUNDACIÓN OBRERA D’INVESTIGACIÓN Y CULTURA, ASOC. REMANECER, ASOC. L’AYALGA.

 

L’Atenéu Xuan María Acebal va espublizar la revista “Raigañu”

L’Atenéu Cultural Xuan María Acebal va espublizar a comuña cola editorial La Cruz de Grau, una revista d’ensayu y divulgación que va llamase Raigañu y que va tar dirixida por Javier Cubero de Vicente. El conseyu de redaición cofórmenlu l’hestoriador Antón Martínez, el periodista y escritor Inaciu Galán y González, y el músicu Xesús Nel García Muñiz.

L’Atenéu adelanta yá dellos conteníos: “L’Osu na cultura asturiana”, de Xuan Porta Allende; “Software llibre n’asturianu” del colectivu Softastur, y un “Vocabulariu asturianu na lliteratura de José María de Pereda” de Xaviel Vilareyo. Amás, habrá secciones d’hestoria, cultura, música, lliteratura, normalización llingüística y reseñes.

L’Atenéu tien abiertu’l plazu pa participar de la publicación, pudiendo mandase les collaboraciones a ateneuacebal@hotmail.com

 

Revista d’ensayu

Mui bones tardes:

Dende l’Atenéu Cultural Xuan María Acebal ponémonos en contautu con vos pa informavos que pa la prósima seronda tamos preparando una revista d’ensayu cultural onde prestarianos contar cola vuestra colaboración n’artículos de tema cultural, etnográfico, histórico, musical, etc (o tamién reseñes), siempres y cuando el tema tratáu tenga daque que ver con Asturies.

ateneuacebal@hotmail.com

 

Presentación en Xixón de “Los ámbitos de la Nación Asturiana”

Esti xueves 26 de marzu tuvo llugar nel llar del Atenéu Obreru de Xixón una mesa redonda sobre territorialidá hestórica d’Asturies, na que presentose el llibru de Xaviel Vilareyo tituláu “Los ámbitos de la Nación Asturiana” recientemente sacáu a la lluz pola editorial Espublizastur.

El presidente del Atenéu Cultural Xuan María Acebal (entidá qu’organizó l’actividá), Javier Cubero, ufiertó una conferencia titulada “Apuntes sobre la provincialidá  y nacionalidá d’Asturies” onde desplicó’l precorríu pelos entamos del estáu centralista y del nacionalismu españolista dende les Cortes de Cádiz cuando s’entama falar d’una “nación española” onde la organización político-territorial en provincies va xugar un papel primordial encuantes a la subordinación del tol territoriu a esta nueva estructura del “Estáu-nación”, organización na que’l territoriu historicu d’Asturies va sufrir una amputación. Y nun ye hasta 1977, nel marcu del procesu de redifinición nacionalista astur de la llingua e identidá asturianes que supuso l’aparición de Conceyu Bable cuando otra vegada plantease la reintegración de conceyos de cultura y llingua asturiana n’Asturies (na revista universitaria El Glayiu). Dellos partíos políticos reclamaron esta reivindicación de reunificación territorial como l’Ensame Nacionalista Astur (1982-1988), el Partíu Asturianista (1985) y Andecha Astur (1990). Javier Cubero también remembró qu’hasta 1954 conceyos de cultura asturiana integraos alministrativamente n’otres provincies pertenecieron al obispáu d’Uviéu.

El coordinador de la coleición d’Ensayu d’Espublizastur, el hestoriador Antón Martínez, recalcó l’éxitu que ta teniendo’l llibru y analizó na so esposición los “Conceptos de frontera y territorialidá” reivindicando éstos como importantes nel marcu de construcciones nacionales como l’asturiana.

Por último, l’autor del llibru presentó la so obra como un entamu pa la reflexón, non nacionalista sinón hestórica y cultural de qué ye Asturies, les Asturies, y lo asturiano y criticando al empar aquellos movimientos que se dicen “asturianistes” o “nacionalistes” y que se conformen con reivindicar sólamente’l territoriu o la cultura esistente güei na provincia d’Uviéu, una unidá alminsitrativa creada con fronteres artificiales nel añu 1834 pol gobiernu centralista pa la meyor alministración d’esti territorio dende Madrid. Los comentarios y aportaciones del públicu asistente completaron toa una llección d’história y política asturianes tan interesantes y necesaries pa poder entamar un alderique sobre la redefinición d’Asturies como nacionalidá política.

 

L’Atenéu Cultural Xuan María Acebal organiza una mesa redonda sobre territorialidá hestórica d’Asturies

L’Atenéu Cultural Xuan María Acebal, va organizar esti xueves 26 de marzu una mesa redonda sobre territorialidá hestórica d’Asturies. L’actu va cuntar tamién cola presentación del llibru de Xaviel Vilareyo tituláu “Los ámbitos de la Nación Asturiana”, editáu apocayá por Espublizastur.

Na mesa redonda van participar Javier Cubero de Vicente, presidente del Atenéu Cultural Xuan María Acebal; Antón Martínez, hestoriador y el propiu autor del llibru, escritor llicenciáu en drechu, Xaviel Vilareyo.

L’actu va tener llugar nel llar del Atenéu Obreru de Xixón na cai Cuadonga, 7, a partir de les siete y media la tarde.

 

Uviéu va acoyer el I Congresu de Cultura Xaponesa, dedicáu a la rellación d’Asturies col Xapón

Esti congresu, qu’organiza la Asociación Cultural “La Brisa de Japón”, tien la colaboración de la Universidá d’Uviéu, del Ayuntamientu d’Uviéu, del Atenéu Cultural Xuan María Acebal y de persones venceyaes al asturianismu cultural.

———————————————————————————————————————–

Porgrama del I Congresu de Cultura Xaponesa: “Asturies y Xapón, Fusión de Cultures”

LLUGAR: Edificiu Hestóricu de la Universidá d’Uviéu, asitiáu na cai San Franciscu

ENTRADA LLIBRE Y DE BALDRE

LLUNES 16 DE MARZU DE 2009

12:00 hores
Inauguración I Congresu de Cultura Xaponesa de la ciudá d’Uviéu.
Actu presidíu pol Rector Magníficu de la Universidá d’Uviéu, Sr. Don Vicente Miguel Gotor Santamaría.
Asisten: Ilustrísimu Primer secretariu y Direutor Xeneral del Centru Cultural y d’Información de la Embaxada del Xapón n’España, Sr. D. Naoki Yokobayashi, el Conceyal de Cultura del Ayuntamientu d’Uviéu, Sr. Don José Suárez Arias Cachero, el Presidente d’Honor de l’Asociación cultural “La Brisa del Japón”, Sr. D. Etsuro Sotoo y el Direutor del Congresu, Sr. D. Javier Espinosa.

Conferencia d’Entamu: “Rellaciones ente Xapón y España” pol ilustrísimu Sr. D. Naoki Yokobayashi (Primer secretariu y Direutor del Centru Cultural y d’Información de la Embaxada del Xapón n’España).

17:00 hores
Presentación del llibru: Faraguyas, Autor: María Esther García. Ed. Madú (Haikus n’asturianu)

 

L’Atenéu Xuan María Acebal celebró un homenaxe a la revista EL LLAPICERU

Conceyu Bable-Xixón y l’Atenéu Cultural Xuan María Acebal celebrararon el 18 d’avientu de 2008 un actu de presentación de la recopilación de los 16 orixinales de la revista de cómics “EL LLAPICERU”, que Lluis Antón González dirixó dende l’añu 1988 a 1997. L’actu coincidía col venti aniversariu del entamu de la publicación y sirvió de sentíu homenaxe a les persones que ficieron posible esta importante revista, dellos presentes nel actu.

La presentación organízala l’Atenéu Cultural Xuan María Acebal, con Javier Cubero, presidente del mesmu, qu’intervino en primer llugar, y con Inaciu Galán que preparó un pequeñu trabayu alredor de la hestoria de la revista EL LLAPICERU, que s’axunta na recopilación.

El director de la publicación, Lluis Antón González, nun pudo contener les llárimes nel momentu de recordar a les persones que collaboraron a lo llargo de 10 años d’EL LLAPICERU, especialmente’l músicu y dibuxante Ígor Medio, qu’entamó dibuxando nesta publicación y que morrió apocayá nun accidente de tráficu. La intervención de González foi aplaudida polos asistentes que compartieron el momentu colos homenaxeaos.

Alborá Llibros vende n’esclusiva la recopilación de los orixinales de la revista encuardernaos y espublizaos nuna edición en tapes dures con una tirada reducida, practicamente escosada.

 

Conceyu Bable y l’Atenéu Cultural Xuan María Acebal van presentar la recopilación de tolos númberos de la revista El Llapiceru

Lluis Antón González, fundador d’El Llapiceru

Conceyu Bable-Xixón y l’Atenéu Cultural Xuan María Acebal van celebrar esti xueves que vien, 18 d’avientu, un actu de presentación de la recopilación de los 16 orixinales de la revista de cómics “EL LLAPICERU”, que Lluis Antón González dirixó dende l’añu 1988 a 1997. L’actu coincide col venti aniversariu del entamu de la publicación y va servir d’homenaxe a les persones que ficieron posible esta importante revista.

L’actu va celebrase na llibrería Alborá Llibros, a les 19:30 hores y va cuntar cola presentacia de dellos autores qu’espublizaron les sos viñetes na revista, la primera enteramente de cómics n’asturianu de la hestoria ya inspiradora d’otros munchos proyectos asemeyaos.

La presentación organízala l’Atenéu Cultural Xuan María Acebal, que prerparó un pequeñu trabayu alredor de la hestoria de la revista EL LLAPICERU, y Alborá Llibros, que va vender n’esclusiva la recopilación de los orixinales de la revista encuardernaos y espublizaos nuna edición en tapes dures con namás 100 exemplares numberaos.

 

L’Atenéu Cultural Xuan María Acebal presentóse el vienres 10 d’ochobre en Xixón

La llibrería Alborá Llibros de Xixón acoyó el vienres 10 la presentación del Atenéu Cultural Xuan María Acabel, una organización na que participen investigadores de la hestoria, la cultura y la lliteratura asturianes.

Nel actu celebróse un recital de la obra de Xuan María Acebal na que personalidaes de la cultura asturiana como Xosé Lluis Campal, Xurde Morán o Xuan Xosé Sánchez Vicente, ente otros.

El presidente del Atenéu, Javier Cubero, abrió l’actu esplicando los oxetivos de la organización, que pasen “principalmente por da-y un puntu de vista asturianu al estudiu de la hestoria d’Asturies”. Un proyectu col que se quiere, comentó Cubero “contrarrestar determinaos posicionamientos que ignoren que el País Asturianu ye una sociedá con ritmos históricos autónomos y elementos culturales propios”. Cubero recordó amás que la organización convida a tolos investigadores asturianos “a collaborar cola organización nes sos actividaes”.

El siguiente n’intervenir foi Inaciu Galán, secretariu d’actes del ACXMA, que comentó los llabores na estaya de la investigación lliteraria que va siguir la organización cultural. “Nun val con recuperar la lliteratura clásica asturiana ya investigala, vamos buscar tamién promocionala, dala a conocer al pueblu asturianu”, comentó Galán. Amás, la organización, anunció, “trabaya yá pa consiguir la edición d’una colección de clásicos de la lliteratura asturiana nuna edición de calidá y axustada la norma actual”, xunto con un proyectu d’estudiu de los autores, “principalmente anteriores al Surdimientu”, campu nel que dixo “queda muncho por facer y por conocer”.

N’esti trabayu de recuperación Galán comentó tamién como dende l’Atenéu van afalar “el trabayu n’andecha perimportante con una lliteratura tan dispersa como l’asturiana”.

Dempués de les intervenciones inaugurales, un recital de poemes de Xuan María Acebal ocupó l’actu. Xuan Xosé Sánchez Vicente, escritor, investigador y políticu asturianista; Xurde Morán, presentador de televisión y etnógrafu; ya Ignacio G. López Dóriga, empresariu asturianu, lleeron el poema “El amor del hogar” del que se cumplien esi vienres 10 d’ochobre 130 años de la so escritura.

Darréu, l’investigador y escritor Xosé Lluis Campal dio llectura al poema “La fonte de fascura”, terminando l’actu con un pinchéu.

Asturnews ufre los vidios de les llectures de poemes del actu d’inauguración:

Xuan Xosé Sánchez Vicente:

Xurde Morán:

Ignacio G. López-Dóriga:

Xosé Lluis Campal: