Agostu 9, 2009
«Esa bandera de color azul que trae pintada la Cruz de la Victoria con el Alfha y Omega representa directamente nuestro hogar, tradiciones, intereses y esperanzas, todo lo grande y santo de la tierra en que nacimos»
Fragmento del discurso de Álvaro Fernández de Miranda en la Fiesta de la Poseía Asturiana de Xixón el 18 de febrero de 1923
Agostu 5, 2009
Carlos Suari
YÁ nun ye raro -y por ello bien triste- que tolos branos teamos llamentando la presencia masiva del fueu sobre les viesques, los montes en xeneral y les güertes. Perriba de la imaxe sangrina qu’espeya esa realidá, pémeque vuelen bien de factores qu’entamen a tar na cabeza de cuasi tol mundu y que mos convierten, per momentos, n’agudes y agudos analistes. Observamos d’esta miente que con más frecuencia cada vuelta, les llames amenacen a los llugares habitaos, y que col tiempu, les quemes forestales van teniendo una naturaleza más fedienta y calculada. Ye entós cuando yá naide -nin siquieramente les autoridaes públiques- dulda un segundu n’afitar que tres d’ello hai intereses madereros, urbanísticos, agrícoles, o a cencielles, antigües engarraes vecinales o la mano de cualesquier pirómanu de caleya. Lo asocedío nos nuesos países hermanos Portugal y Galicia, esa mestura d’espectáculu dantescu, desesperación, atmósfera afogadiza , nun paecía alcontrar un tope durante los llargos díes de catástrofe nos qu’algamaron ensin problemes la triste categoría d’exemplu de lo que nun habría pasar enxamás. Mentanto, poco tiempu-yos faltó a los políticos de primer llinia pa llanzase a les vidayes los sos aburridísimos lemes, eso colo que davezu tenten de tapecer les coses que de verdá tán rellacionaes con fechos tan escuros como esti. Verán, quixere dir un poco más alló. Comentaba más arriba que nun nivel superior al fechu en sí de pone-y fueu a un monte d’un xeitu o otru, puen tar -y taránlo de xuru- unos intereses siempre indecentes y despiadaos.
Tirando de la cuerda una migaya más, alcuentro qu’entá hai otru nivel de comportamientos y actitúes, otru estratu ideolóxicu que desplica, pa min, esa falta tan radical d’escrúpulu que lleva a equis persones (enfermes o sanes) a acabar col pocu o munchu padremuñu natural de la so propia tierra, a actuar de manera, simplemente, homicida, dende’l mesmu güeyu’l furacán. Toi refiriéndome al tremendu vacíu de cultura forestal esistente -de manera xeneralizada- na nuesa sociedá. Asina, namás en dalgunos ámbitos concretos, bien tradicionales o bien de militancia ecoloxista, tiense constancia qu’heba un procuru axustáu y merecíu col monte. (más…)
Agostu 2, 2009
Pa comprender la lliteratura nacional d’un pueblu debemos estudiar la so situación social y política, teniendo en cuenta’l fechu de que los sos escritores yeren un productu de les mesmes y que los fíos de los sos cerebros fueren concebios y sacaos a la lluz en condiciones hestóriques determinaes.
James Connolly, en Les clases trabayadores na historia d’Irlanda.
Xunetu 24, 2009
Javier Cubero de Vicente
(Resume de la conferencia pronunciada’l xueves 26 de marzu de 2009 nel Atenéu Obreru de Xixón)
«Nación» y «provincia» nun son categoríes hestóriques inmutables, sinon categoríes que dependiendo del especificu marcu históricu y xeográficu nel que mos centremos pueden alagamar un significáu non menos especificu. Por exemplu el términu «nación» na Edá Moderna solía equivalir a «llugar de nacimientu» o «grupu de xente d’orixe común» (xeográficu, llingüísticu, racial, etc.) siendo asina aplicáu a mui diverses colectividaes, mientres que tres la Revolución Francesa la «nación» va a identifícase col conxuntu de ciudadanos que comparten Estáu y col nuevu modelu d’Estáu que surde cola sociedá capitalista. Asína, como esplica l’hestoriador Faustino Zapico («La concreición n’Asturies del Estáu lliberal español», en N’AST. Cartafueyos d’ensayu, nº 2, Asociación Cultural N’Ast, 2008): «Si pa los escritores hasta’l sieglu XVIII Asturies (…) yera un país –espaciu xeográficu definíu y estremáu de los vecinos- y una provincia –unidá política con instituciones- y en delles ocasiones una nación –territoriu con personalidá ya historia definíes-, a lo llargo del XIX pasa a ser una provincia –unidá alministrativa- integrada nel país o nación españoles, y a lo cabero’l sieglu una rexón». (más…)
Marzu 11, 2009
Carlos X. Blanco.
Dalgún díi, si nós y los que vengan inmediatamente nun lo aparamos, a esti país naide lu va reconocer. Les tierres más barriales, aquelles que precisamente destaquen por tener homedancia y dar muncho granible, tán siendo asfaltaes. El formigón, el cimentu, el fierro y el paisaxe “duru” propios de la estética urbanícola y postindustrial tan desanciándolo too. Dellos arquiteutos, urbanistes y xeógrafos meritaben talmente dir a prisión. Más entá debíen ser separtaos del poder y del texemanexe de les perres públiques los milenta políticos y xestores que premiten esos atentaos. Cuando la estetica nativa del País siempres foi la de lo verdi, lo irregular, lo desnivelao, l´alternancia ente los usos campesinos (y polo tanto “civilizaos”) de la ñatura colos picaratos y biesques más xabaces, vemos güei n´Asturies un trunfu de la xeometría, de la llinea recta, del achaplamientu d´apisonaora, de los caxones de formigón armao, de los paisaxes golfísticos, como islluques de verde artificial (non la herba espontáneo) metanes fileres enormes de cases adosaes, yá asonsoñando l´arquitectura de Liverpool nes peores dómines del industrialismu, yá faciendo lo propio cola estética moruna de les canes blanques y mediterránies, que dexen a ún cégaru col sol meridional. Tantu nun casu comu nel otru, un gustu foriatu ya importáu. El gustu que impón el Colonizador sobre´l Colonizáu.
Marzu 11, 2009
Carlos X. Blanco.
¿Qué ye robar un paisaxe? No fondero ye igual qu´arramplar cola cultura, dexar a la xente ensin un llar, matar a toa una nación. Eso asocede agora mesmo con Asturies. Ye nidio pal que quiera güeyar alrodiu. Nun ye un esmolecimientu “específicu” de militantes ecoloxistes. Ye un puru fechu oxetivu. N´Asturies tamos quedando sin Asturies. Nun hai más. Y naide ye quien a paralo.
Va munchos años qu´esti procesu arrincó. La Revolución Industrial nel país foi tardiega en comparanza con otres fasteres d´Europa Occidental, pero emprimó bien ceo dientro l´Estáu Español. Les mines y l´aceru llenaron de fumu y prieto un paisax que siempres toviere mozcáu pel verde y l´azul. Una Asturies de carbón, de fierru, de fumu, de contaminación. Una Asturies proletaria, y yá nun sólo aldeana. Un país pal asfaltu, pa la villa camudada en ciudá, pa l´aldega tresformada en barriada. Quedaron pa güei los cordurones llaceriosos nel paisaxe. Pero tamién nes concenxes, na memoria coleutiva, nes menes d´entender la vida y de trabayar n´ella. Memoria d´un Pueblu Trabayador campesín y obreru, fundamentalmente. Y arriendes, con munchos pasiellos comunicando aldea con mina o con fábrica, y viceversa, un fechu específicu asturiano ésti que nun se da en tolos llaos. (más…)
Marzu 11, 2009
Xaviel Vilareyo y Villamil
Nesti añu de 2008 celebramos el 1100 aniversariu del cubrimientu con oru y piedres valioses de la Cruz de la Victoria de Pelayu, que según la tradición lexendaria la llevaben tolos reis asturianos nes batalles, yá que con esi signu d’amuletu protector venceríen a tolos enemigos del Reinu d’Asturies. Nel añu 908 el rei Alfosu III el Grande dona esta cruz a la ilesia d’Uviéu coles lletres alfa y omicra, siendo dende estós símbolu del estáu asturianu y símbolu de l’asturianidá, por tar representada en mariello y azul na bandera d’Asturies. La cruz de carbayu asturianu, diz la lleenda que la llevó el mesmu Pelayu na batalla Cuadonga, siendo esta cruz símbolu tamién de la continuidá dinástica de los reis astures. La lleenda de la batalla de Cuadonga tien relación cola batalla de Constantinu con Maxenciu na ponte de Milviu, aparecióse-y al primeru la Cruz nel cielu azul coles palabres con esti signu vencerás. Alfonsu III el Grande arriqueció la cruz de Pelayu y tresformóla na xoya más fermosa y bayurosa. Fízose nel castiellu de Gauzón, nel Peñón de Raíces, en Castrillón. El rei cubrióla d’oru y piedres valioses y, enantes de llevala n’Uviéu, permaneció na Ilesia la Santa Cruz de Cangues d’Onís, edificada baxo la so advocación. Donóla, xunto cola reina Ximena, a la Ilesia Catedral de San Salvador en 908.
Marzu 11, 2009
Xabiel Vilareyo
Ún de los conceptos xurídicos más controvertíos dientro de la más recién doctrina constitucionalista ye’l de la precisión y les llendes de los llamaos Derechos históricos de les nacionalidaes. Xunto a ello tamién podríemos amestar otres discusiones paraleles acerca del significáu y alcance, en términos doctrinales, de los propios conceptos de nacionalidá o de comunidá iestórica a los que repetidamente se refieren los modernos y vixentes testos llegales.
Marzu 10, 2009
Xaviel Vilareyo y Villamil
Dende los primeros tiempos del vieyu Reinu d’Asturies, la esplotación de la tierra y de los grandes dominios nobiliarios o eclesiásticos llevóse alantre mediante concesiones d’esplotación de llugares nomaos acasaraos, bien a través d’arriendos a mui llongu plazu o per foros que a lo cabero convirtiéronse en trespasos de propiedá a favor d’un gran númberu de llabradores, obligaos destamiente a residir nos terrenos, favoreciendo con ello cierta política de colonización interior del reinu astur y posteriormente facilitando la espansión del estáu dica’l sur cuando se llevó alantre la nomada Reconquista y Repueblación.
Asina, la casería asturiana, como unidá d’esplotación económica xenérica, surde yá na Edá Media calteniéndose prácticamente incamudable na so estructura y esencia hasta güei. Familia y casa vense estréchamente xuníes nel so mesmu destín o proyectu vital. Poro, dende los sos oríxenes la casería resultaba una fonte de producción de gran diversidá de bienes, servicios y funciones, esto ye, una unidá d’autoabastecimientu, según la so idea orixinaria de servir d’elementu básicu pa la colonización y civilización de llugares anteriormente despoblaos. Esta diversidá productiva camuda lóxicamente según avanza’l procesu industrializador hacia una especialización de les caseríes, en concretu enfocándose especialmente n’actividaes pecuaries ensin abandonar tampoco otres xeres agrícoles o productives de tipu complementariu. (más…)
