Carlos X. Blanco.
Dalgún díi, si nós y los que vengan inmediatamente nun lo aparamos, a esti país naide lu va reconocer. Les tierres más barriales, aquelles que precisamente destaquen por tener homedancia y dar muncho granible, tán siendo asfaltaes. El formigón, el cimentu, el fierro y el paisaxe “duru” propios de la estética urbanícola y postindustrial tan desanciándolo too. Dellos arquiteutos, urbanistes y xeógrafos meritaben talmente dir a prisión. Más entá debíen ser separtaos del poder y del texemanexe de les perres públiques los milenta políticos y xestores que premiten esos atentaos. Cuando la estetica nativa del País siempres foi la de lo verdi, lo irregular, lo desnivelao, l´alternancia ente los usos campesinos (y polo tanto “civilizaos”) de la ñatura colos picaratos y biesques más xabaces, vemos güei n´Asturies un trunfu de la xeometría, de la llinea recta, del achaplamientu d´apisonaora, de los caxones de formigón armao, de los paisaxes golfísticos, como islluques de verde artificial (non la herba espontáneo) metanes fileres enormes de cases adosaes, yá asonsoñando l´arquitectura de Liverpool nes peores dómines del industrialismu, yá faciendo lo propio cola estética moruna de les canes blanques y mediterránies, que dexen a ún cégaru col sol meridional. Tantu nun casu comu nel otru, un gustu foriatu ya importáu. El gustu que impón el Colonizador sobre´l Colonizáu.
