Anarcoindependentismu: La facción más desconocida del movimientu llibertariu

Xune Elipe

“Cada nación, grande o pequeña, tien el derechu indiscutible a ser ella mesma, a vivir acordies cola so propia naturaleza. Esti derechu ye namás el corolariu del principiu xeneral de llibertá”. Ésta ye la tesis que defendía nel sieglu XIX el principal impulsor del anarquismu, Bakunin, y de la que surde l’anarcoindependentismu, una corriente d’esti movimientu onde se conxuguen les idees independentistes coles anarquistes, y que se desarrolló nel sieglu XX, en delles nacionalidaes europees apostando pola lliberación de los territorios y la so autoorganización.

¿Pueden concasar les idees independentistes y les anarquistes? ¿La lliberación nacional y la individual son compatibles? ¿Pa qu’una comunidá humana diferenciada seya llibre necesita d’un estáu? A estes y otres preguntes intenta da-yos respuesta un sector del movimientu llibertariu conocíu como anarcoindependentismu. La so incidencia nel anarquismu internacional ye más bien minoritaria. Esti pensamientu desarrollóse en grupos pequeños, surdíos siempre en distintes nacionalidaes europees.

Antecedentes

A pesar de la creyencia xeneralizada de qu’esta ye una teoría “moderna”, los sos antecedentes vienen de lloñe. Un teóricu del anarquismu como Bakunin (1814-1876), na so obra “Patria y Nacionalidá” dicía cosas como: “La nacionalidá ye un principiu; ye un fechu llexitimáu, como la individualidá. Cada nación, grande o pequeña, tien l’indiscutible derechu a ser ella mesma, a vivir acordies cola so propia naturaleza. Esti derechu ye namás el corolariu del principiu xeneral de llibertá. (…) Un principiu ye’l respetu que caún ha tener polos fechos naturales, sociales o reales. La nacionalidá, como la individualidá, ye ún d’esos fechos; y por eso tenemos que la respetar. Forzala sería cometer un críme; y (…) conviértese nun principiu sagráu cada vez que ye amenazada y forzada. Por eso, siéntome siempre y sinceramente’l patriota de toles patries oprimíes”.

 

Recuerdos d’ayeri y güei (Güei, nº33, marzu 2001)

Hai ventiún años, nel mes de marzu de 1980, la Policía detenía a siete persones n’Asturies pola so presunta relación col atracu a la sede central del Bancu Herrero n’Uviéu y la organización ETA (p-m). Siete mozos y moces que militaben nel partíu güelu del movimientu nacionaliegu astur, el CNA. Anguañu, na Asturies del entamu del sieglu XXI poco se sabe d’aquella mocedá que creyó que’l so llabor taba al lláu de la llucha de mases, puxando pola emancipación social y nacional del pueblu trabayador asturianu. La manera dramática en qu’acabaron los fechos, los intereses partidistes del restu de la llamada “izquierda revolucionaria” y la mera supervivencia propia ante l’emburrie represivu, ficieron que los mozos que cayeron en manes de la Brigada Político Social lluéu d’estrenase el nuevu réxime políticu quedaren nel más triste de los olvidos, por nun cuntar siquiera col sofitu de los sos mesmos collacios. Pa que dalgún eche la vista atrás y recuerde un migayín lo que pasaba n’aquella Asturies que volvía a reivindicar el so raigañu revolucionariu, y pa que la xente más mozo descubra lo que nadie nun-y contó, tuvimos charrando con Gerardo, al que d’aquella lu conocíen por “el Guaje”, pa que mos contare estes coses, que yeren realidá y güei naide cuenta.

 

Al pueblu trabayaor de Mieres (CNA, 1979)

Güei, que nun queda na más que la tercera parte la batería funcionando, (per pocu tiempu, ya que ta tan estropiá como la “B” que trancó-se dafechu fai dos selmanes), ve-se a les clares la política’l gobiernu no que cinca al futuru social/endustrial de Mieres y Asturies: el desmantelamientu como’n fechu consumau. Y tien, ca vegá, que ser más ñidio pa toos, que delantre unos fechos que se mos imponen na más pue opone-se la fuercia d’otros fechos, na más van valir les baces de fuercia que tienen los trabayaores y xente’n xeneral: l’ación fuerte na cai y nos tayos.

Delantre la crítica situación na que s’enserta el Conceyu Mieres y Conceyos del Caudal, los nacionalistes revolucionarios, sopelexamos afayaízo falar de tres coses, ya dend’equí, y sabiendo que ye la nuestra primera y insuficiente toma postura; y partiendo dende’l sofitu dafechu militante de nuestru a toles aciones entamaes y programaes pelos trabayaores de la Fábrica y la xente de Mieres.