Moldavia quier camudar el nome de la so llingua

D. Barreiro

El presidente de Moldavia, Mihai Ghimpu, quier que la llingua del so estáu pase a llamase rumanu, en llugar de moldavu. Anguaño, la Constitución del país fala del idioma como moldavu, sicasí, la declaración d’independencia noma a la mesma llingua como rumanu. Ghimpu quier integrar de nuevu la fala del Estáu nel tueru llingüísticu al que pertenez.

Pa ello, quier camudar la Constitución na que se llame al idioma como rumanu. Declaraciones que causaron grande polémica en Moldavia, onde la oposición pidió que se fixera un referendu pa que sía’l pueblu quien decida. El país ta anguaño camín d’unes elecciones anticipaes.

Moldavia ye una ex república soviética, independiente dende 1991 y falante d’un idioma prácticamente idénticu al de Rumanía, yá qu’enantes de la II Guerra Mundial yeren un estáu únicu.

En 1940 Moldavia foi invadida pola URSS y la so llingua pasó a llamase moldavu, dexando d’escribise en carácteres llatinos y entamando a utilizar l’alfabetu cirílicu, hasta qu’en 1989 adoptóse de nuevu’l llatinu pola presión popular.

En 2003 foi publicáu un diccionariu rumanu-moldavu, que provocó gran conmoción y polémica en Rumanía y Moldavia.

Fonte: http://www.asturies.com/node/7984

Anuncios
Esta entrada fue publicada en Internacional. Guarda el enlace permanente.