Convocáu el Premiu “Asturies” d’Ensayu na so segunda edición

El plazu pa presentar los ensayos a esti premiu fina’l 1 de payares.

Col enfotu de da-y puxu al estudiu de la rialidá política, económica, social y cultural d’Asturies, asina comu al so pensamientu, la editorial Espublizastur vien de convocar publicamente la segunda edición del Premiu “Asturies” d’Ensayu pa obres escrites en Llingua Asturiana. El premiu d’esta segunda edición ta dotáu con 1.700 euros y la editorial espublizará de la obra premiada. Hia de plazu pa presentar los ensayos hasta’l 1 de payares y el xuráu d’esta edición ta compuestu pol economista y escritor David M. Rivas, Antón Fuertes, sicólogu y escritor fundador xunta Rivas y otros del Conceyu d’Asturies en Madrid, Bruno Gómez ganador de la primer edición  con “Turismu ya identidá Nacional”, l’escritor Xaviel Vilareyo que recibió una mención del xuráu na primer edición del premiu y Javier Cubero, Premiu Fierro Botas d’Ensayu y Investigación 2009.

El premiu tien les BASES que vienen darréu:

Capítulu Primeru: Oxetu.

Artículu 1.- Les obres que se presenten al “2u Premiu d’Ensayu ASTURIES” tendrán que versar alrodiu la rialidá política, económica, social y cultural d’Asturies –nos sos territorios hestóricos- y los sos retos de futuru.

Artículu 2.- Valoraránse especialmente obres que combinen la esposición teórica, la so aplicación práutica y la so exemplificación al traviés de comparatives con otres rialidaes nacionales.

Capítulu Segundu: Condiciones de les obres

Artículu 3.- Les obres tendrán de ser estrictamente inédites y nun podran tar premiaes anteriormente.

Artículu 4.- Toles obres tendrán de tar escrites n’asturianu.

Artículu 5.- Les obres tendrán una estensión d’ente 120.000 y 240.000 caráuteres.

Capítulu Terceru: Conteníu del premiu

Artículu 6.- El “2u Premiu d’Ensayu “ASTURIES” ta dotáu con 1.700 euros (1450 en metálicu y 300 en llibros) que se fadrá efeutivu nel intre de la so concesión pública.

Artículu 7.- La obra premiada sedrá espublizada pola editorial ESPUBLIZASTUR

Artículu 8.- ESPUBLIZASTUR reservase’l drechu a espublizar aquelles obres nun premiaes, entendiendo que la presentación al mencionáu premiu supón la cesión a la editorial de los drechos d’edición.

Artículu 9.- Si el Xuráu lo camienta afayaízo, el premiu podrá ser consideráu desiertu y esceucionalmente concedíu ex aequo.

Capítulu Cuartu: Resolución del premiu

Artículu 10.- La resolución del “2u Premiu d’Ensayu “ASTURIES” dirá a cargu d’un Xuráu compuestu por David M. Rivas, Antón Fuertes, Bruno Gómez, Xaviel Vilareyo y Javier Cubero xunta un representante d’Espublizastur.

Artículu 11.- Nun entamu, la resolución del 2u Premiu d’Ensayu “ASTURIES” intentará decidise por consensu ente los miembros del Xuráu. Si ello nun fore posible procederáse a una votación que decidirá por mayoría simple.

Artículu 12.- La resolución del premiu fadráse pública’l 7 de payares.

Capítulu cincu: Presentación de les obres

Artículu 13.- El términu de presentación d’orixinales fina’l día 1 de payares. Almitiránse toles obres cuya fecha d’envíu postal seya anterior al cierre de la convocatoria.

Artículu 14.- Habrán d’unviase a la dirección postal ESPUBLIZASTUR La Caleya’l Ríu, 205 CP 33394, Xixón, Asturies.

Artículu 15.-  Recurriráse a la forma de plica, ello ye, adxuntaránse 2 sobres zarraos ónde s’escribirá: “Premiu d’Ensayu ASTURIES”, faciendo constar nos dos el títulu de la obra y el seudónimu del autor. Nunu d’ellos introduciránse l’orixinal y 5 copies, en cuyes portaes namás apaecerá’l títulu de la obra y el del autor o’l seudónimu. Nel otru sobre figurarán los datos personales del autor o autores (nome, direición postal, teléfonu y  e-mail). Nesti segundu sobre axuntaráse una copia en formatu dixital del orixinal.

Artículu 16.- L’autor/es comprométense a nun retirar la obra enantes de faese pública l’alxudicación del premiu y a nun presentala a otros concursos en cursu nin en xeneral, a tener comprometía la so espublización. La obra tien que ser inédita, nun tener cedíos los derechos con anterioridá.

Artículu 17.- La presentación d’orixinales implica l’aceutación destes bases, qu’actúen en valor de contratu d’edición.

Anuncios
Esta entrada fue publicada en Noticies. Guarda el enlace permanente.