Declaración conxunta Asturianistes por Nava/ Izquierda Asturiana (2006)

Na semeya Iván Huerga, Vitor Peruyero (IAS), Patricia Teja (APN), José Ángel García “Allende”, Faustino Zapico (IAS) y Eduardo Torga (APN) durante la firma del alcuerdu.

Les organizaciones polítiques Izquierda Asturiana (IAS) y Asturianistes por Nava, aconceyaes en Nava el 13 de xunu de 2006 declaren:

1. La so voluntá d’estrenchar la so collaboración y coordinación d’equí p’alantre, a través d’alcuerdos n’asuntos concretos d’interés pa Piloña y Nava que se tratarán en conceyos periódicos bipartitos nos que s’analizará la realidá d’entrambos conceyos.

2. La so convicción compartida de la importancia que pal asturianismu políticu tien la implantación nel ámbitu municipal como llugar más cercanu a la ciudadanía y más afayadizu pa facer política pa la xente y cola xente.

3. La necesidá de coordinación de les distintes opciones asturianistes que trabayen anguaño nos conceyos d’Asturies a través de marcos de collaboración como l’alcordáu nesta declaración.

4. La nuesa voluntá d’esparder y de dar a conocer esti alcuerdu a otres agrupaciones, grupos o persones que comparten la nuesa visión n’otros conceyos, buscando alcuerdos más amplios, y apoyando iniciatives asemeyaes a les nueses n’otros conceyos d’Asturies, pa lo qu’entamaremos darréu un procesu de contactos.

5. El convencimientu de que la esistencia d’opciones asturianistes locales fuertes (independientes o ascrites a partíos políticos) nun va contra la posibilidá de construcción d’un proyectu nacionalista sólidu n’Asturies, sinon que l’afitamientu, el trabayu conxuntu y l’entendimientu ente opciones asturianistes locales tien de ser el primer pasu pa la construcción d’un proyectu que pueda constituir la necesaria alternativa dende posiciones progresistes qu’Asturies precisa y que nun cubrió hasta agora de forma afayadiza nenguna de les opciones presentes nel mapa políticu asturianu.

En Nava a 13 de xunu de 2006

Anuncios
Esta entrada fue publicada en IAS, Nacionalismu. Guarda el enlace permanente.