Llope: “Empeñase en fechar otru Día de la Nación Asturiana ye inútil”

Asturies.com

04/09/2010

Ignaciu Llope (Cuideiru, 1962) ye mélicu y escritor. Venceyáu al asturianismu en dellos ámbitos, ye un fondu defensor del 8 de setiembre como fecha correcta pa celebrar el Día de la Nación Asturiana. D’ello y del significáu d’esti día fala na entrevista.

Día d’Asturies, Día de Cuadonga, Día de la Nación Asturiana ¿Son les tres interpretaciones compatibles?
La realidá diznos que sí; y nun ye una bona idea dir a la contra de la realidá. Realmente pa un bon sector de la sociedá asturiana, mayormente los creyentes, ye’l Día de la Santina de Cuadonga, que lu interpreten dende la fe católica. Esi ye un porcentaxe, cada vuelta menor, pero enforma grande.

Día de la Nación Asturiana; tamién. Hai otru sector, más pequeñu, que lu interpreta como Día de la Nación Asturiana por estremaos motivos; anque se caltenga una especie de polémica ente’l 25 de mayu y el 8 setiembre, a la que yo nun-y veo’l mínimu xacíu.

Y depués Día d’Asturies, que de dalguna manera debería recoyer consensualmente toles postures. Dende’l puntu vista oficial, de les instituciones, del Gobiernu asturianu ye’l Día d’Asturies. Polo tanto sí, son eses tres coses.

¿Qué simbolismu tien esta fecha dientro de la tradición histórica asturiana?
Ehí entramos nel noyu del problema. Porque ye una fecha polisémica. A esta fecha se-y dota d’un sentíu dende’l sieglu XIX, que tien que ver cola construcción de los mitos de los oríxenes de los estaos y les naciones na Europa occidental. Trátase esto de construir xenealoxíes cuasimente que divines que pasen inmanentes a lo llargo la historia, independientemente de la voluntá de los homes y muyeres que poblen esos territorios.

¿Qué pasa n’Asturies? Pues que dende los principios del XIX esa fecha dotóse d’un significáu nacionalista español y foi constituyéndose un discursu, el Cuadonguismu, nel cual se supedita la identidá asturiana a otra, que se supón superior, colos oríxenes de la nación española. Esti ye un discursu esencialista, fundamentalista, a partir del cual lo que naz en Cuadonga, l’ochu setiembre, ye la nación española.

Esto marca, condiciona y fai d’esta fecha un día mui complexu, dende’l puntu de vista simbólicu, y un día mui conflictivu, dende’l puntu de vista de dotalu de sentíu asturianu y, inda más, nacionalista.

¿Y por qué cree qu’esta interpretación en clave española tien tanto puxu na sociedá asturiana?
Por delles razones. Una, de tipu estructural, que ye la debilidá de la burguesía asturiana históricamente. Estos discursos d’oríxenes suelen ellaboralos una clase social emerxente qu’intenta llexitimase como cadarma fundamental d’una sociedá. Esa clase suel ser la burguesía, tanto la industrial, como la lliberal, como la pequeña burguesía.

Históricamente n’Asturies hubo una burguesía mui feble, subsidiada y subsidiaria que lo que fizo foi representar intereses económicos y sociales foriatos. Nesi sentíu nun necesitaba dotase nacional pa nada; lo que necesitaba yera dotase d’un discursu llexitimador dientro de les cordenaes del nacionalismu español. Esto ye asina porque nun representaben intereses asturianos; sinón intereses españoles, vascos, belgas, alemanes, ingleses…

D’esti mou, la constitución del discursu de los oríxenes ye’l de los oríxenes de la nación española, porque’l grupu social que n’Europa Occidental representaba esi papel, n’Asturies desertó d’ello y lo que fizo foi ellaborar el Cuadonguismu. Trátase esti d’un discursu disparatáu, pero que tien una gran eficacia social nel sen de que se recompensa a la sociedá asturiana por parir a España; ye decir, Asturies nun existe porque sacrifícase nun altar históricu pa parir a la nación española. Esto tien que ver tamién cola interpretación del nacionalismu español del 25 de mayu na qu’Asturies volvió a salvar a España y, dende cierta izquierda xacobina, la del 34, na que la clase obrera asturiana volvió a salvar el honor revolucionariu d’España.

¿Cómo cree que podría frayase con esti mitu del Cuadonguismu?

Cola verdá. Cola realidá. Con un discursu históricu desaveráu de lo que son los Principios Fundamentales del Movimientu, que diríen nel franquismu. El problema ye que les narratives históriques son construcciones a posteriori de los fechos, inda más cuando esos fechos tán inxertos nun procesu de sobresignificación simbólica, que nesti casu ye’l de la xustificación de la nación española y el de dotala d’una xenealoxía llarga nel tiempu y espaciu.

Entós lo que toca ye ellaborar un discursu, lo más axustáu posible a los fechos, dende perspectives claramente autoctonistes y que doten de coherencia y sentíu a la explicación que se dea sobre los oríxenes del Reinu d’Asturies; los oríxenes políticos, sociales, culturales y económicos. Esto se pue facer. De fechu, la escuela de Javier Fernández Conde na Universidá d’Uviéu foi la que dotó de sentíu a esti discursu.

Pero equí tamién tenemos el problema de que la mayor parte de la Universidá d’Uviéu ye constructora d’una narrativa identitaria nacionalista española. Los investigadores que caltienen otres tesis dientro d’esta universidá tán claramente arrequexaos; hai un entemecimientu pervesu ente políticu y historiografía.

Volviendo al entamu de la entrevista, col Día D’Asturies ¿Falamos d’una fecha relixosa o d’un actu fundacional?
Ye too al empar. Yo creo que’l Día de la Nación Asturiana ye’l Día d’Asturies. Nun se pue afuxir d’una fecha con esa sobresignificación simbólica enorme y dexala n’ermu en manes del nacionalismu español; eso ye suicida. Amás ye qu’hai argumentos históricos y arqueolóxicos pa contraponer que lo que nació en Cuadonga ye’l Reinu d’Asturies, non España. Polo tanto hai que dar batalla nesti sen, y hai que ganala.

Tamién hai que ganar Asturies nos símbolos, y equí entramos na cuestión relixosa. La parte creyente de la población tien tol derechu del mundu a manifestar la so fe al traviés de la virxen de Cuadonga. Pero Cuadonga ye la patrona d’Asturies y una virxen asturiana, nun ye nin patrona d’España nin virxen española. Esto, anque non esplicitáu d’esta manera, la sociedá tienlo claro.

Y col tema de la fecha como día nacional, a dalgunos-yos paez más afayadizu’l 25 de mayu…
Empeñase en construir otru día de la nación asturiana ye inútil, y ta condergáu al fracasu. Otra cosa estremada ye que se puea, nesti procesu de simbolización de feches, escoyer el 25 de mayu y dotalu d’un sentíu cívicu asturianu; neso nun hai nengún problema. Pero’l día de la nación asturiana, queramoslo o non, ye’l 8 de setiembre. Ye imposible pelear contra una dinámica que fai que la mayoría de la sociedá asturiana faiga esa llectura.

Ye qu’amás, nun hai suficiente capacidá nin fuercia pa facer esti tresbase de significación simbólica del 8 setiembre al 25 de mayu. D’otra banda, tamién hai que señalar que’l nacionalismu español yá fexo ofensiva sobre la fecha, queriendo significala como’l nacimientu de la nación constitucional española que tuvo’l so reflexu na Constitución de Cádiz de 1812, y esto ye una falsedá.

Pa entrar na parte final… ¿Qué opinión tien sobre cómo vien reivindicando históricamente l’asturianismu el 8 de setiembre?
Foi una reivindicación cola boca pequeña; o más bien dexase llevar pola inercia social y histórica d’esa fecha na sociedá asturiana. Pero en nengún momentu se fexo una reflexón fonda na que se tente de dotar de sentíu nacional asturianu al 8 setiembre, y eso creo que ye lo que tenemos que facer.

Lo que nun se pue facer baxo nengún de los conceptos ye dexar esa fecha en manes del nacionalismu español; eso ye una barbaridá. Pa ello tenemos que facer un llabor con, per un llau, la parte festiva, simbólica, reivindicativa; pero tamién cola parte de la construcción d’una narrativa histórica y identitaria qu’impugne’l cuadonguismu relativamente dominante.

Y sobre les instituciones ¿Cuál cree que debería ser el so llabor pa con esta fecha?
Les instituciones relixoses faen lo que lleven faciendo cien o doscientos años. Lo que sería mui conveniente ye desespañolizar esi discursu relixosu, que tampoco ye tan difícil, porque a la fin Cuadonga ye la patrona d’Asturies.

No tocantes a les instituciones polítiques, celébrenlo porque nun-yos queda más remediu. El pecáu orixinal de l’autonomía asturiana ye que tuvo xestionada dende los anicios por xabaces antiautonomistes, xacobinos y centralistes. Refugaben l’autogobiernu; polo tanto, y especialmente nos ámbitos simbólicos, siempre tentaron de vaciar el conteníu nacional, identitariu y reivindicativu que puea tener un día d’Asturies y dotalo namás que de conteníos de folixa, gastronomía y alcohol.  Obviamente, esi nun ye’l llabor d’una Institución, pero esto ta fecho a conciencia porque esa ye la so postura ideolóxica y política.

Esto, de dalguna manera desplica la percepción que tien la sociedá asturiana de l’autonomía; una institución inútil que namás que xeneró una eficaz rede clientelar que da trabayu a los amiguinos de la FSA o de quien toque. Por eso ta l’alloñamientu de la sociedá asturiana d’unes instituciones autonómiques que nun cumplieron nin ún de los oxetivos pa lo que taben diseñaes. Son incapaces de dotar a Asturies d’instrumentos políticos, económicos, sociales, culturales, pa solventar el futuru del país. Y claro, col 8 de setiembre’l resultáu ye La Pantoja, o Sergio Dalma o Chenoa.

Anuncios
Esta entrada fue publicada en Día d'Asturies. Guarda el enlace permanente.