Pieslla la llibrería Paraxuga

Pieslla la última llibrería asturianista que quedaba. Si primero foron llibreríes como La Xaronca, Seronda, Alborá y Trabe, agora Paraxuga anuncia que va trancar les puertes del so negociu, enllenu de llibros, camisetes, banderes, artesanía y más ilusiones. La fecha que marquen dende esti establecimientu uviedín, l’últimu del so xéneru, ye’l 31 de xunetu. «Nun se pue siguir», diz Dulce Xil, dolida y murnia a les clares. «Llevamos dos años aguantando’l tirón malu, pero yá les coses nun diben bien enantes». Dulce Xil diz que nun tuvieron l’ayuda de nenguna Alministración, nin de la Conseyería de Cultura, nin de la Oficina de Política Llingüística, nin del Conceyu, nin de los medios de comunicación, y que la única que los apoyó foi l’Academia de la Llingua Asturiana. Lo más positivo que saca d’estos quince años foi la «la xente que nos sofitó mercando, y a esos hai qu’agradece-yos too, amás d’a los autores que vinieron a facer equí presentaciones de los sos llibros».

Sicasí, Dulce Xil coméntanos que nosotros somos los cuartos que pasamos per ehí preguntando sobre’l tema, y quéxase de que nun los llamó «nengún artista, que, polo que se ve, nun-yos interesa tener abierta una llibrería asturiana». Pero d’estos 15 años saca tamién «munches coses mui positives, sobre too la xente anónimo». Ente les anécdotes que recuerda Dulce tán delles del día qu’inauguraron la tienda na cai Paraíso: «Presentóse tol grupu d’amigos col que salíemos a tomar sidra, y llegaron con un diputáu de Madrid en siella de ruedes que venía esclusivamente a la inauguración».

Fonte: Les Noticies

Anuncios
Esta entrada fue publicada en Noticies. Guarda el enlace permanente.