N’Ast agradez a Conceyu Abiertu la so coherencia (28/04/2011)

Testu integru del Comunicáu:

N’Ast felicita a Conceyu Abiertu pola proclamación de les candidatures presentaes n’asturianu en Llangréu y Samartín, que nun entamu fueren refugaes por nun dir en “denguna de les llingües oficiales del Estáu español”

Dende l’Asociación Cultural N’Ast agradezse-y a Conceyu Abiertu la coherencia amosada en tou momentu na defensa de la llingua asturiana y de la so plena normalización social. Frente a la negativa inicial de la Xunta Eleutoral de Llaviana a almitir comu valíes les candidatures de Conceyu Abiertu nos conceyos de Llangréu y Samartín del Rei Aureliu en base a que “nun s’utiliza denguna de les llingües oficiales del Estáu español”, esta plataforma política nun recursu basáu na sentencia 48/2000, de 24 de febreru, del Tribunal Costitucional (BOE nº 76, 29 de marzu de 2000), solicitó con ésitu que se proclamaren les candidatures, tal y comu se presentaren primeramente, na llingua asturiana, na llingua del País.

Aquella sentencia del Tribunal Costitucional del añu 2000, sentó un precedente hestóricu na llucha polos drechos lingüísticos de la ciudadanía asturiana, y  anuló’l  determín de la Xunta Elleutoral Provincial d’Asturies de nun proclamar les candidatures de la organización política Andecha Astur a les dos cámares del Parllamentu español  pola mesma razón.

La decisión inicial de la Xunta Eleutoral de Llaviana amuesa una vegada más el llastre que supon pa la sociedá asturiana’l réxime político-burocraticu d’anguañu, baxu’l que cualesquier mínima meyora llegal o social en materia de drechos llingüísticos ye continuamente saboteada de toles maneres posibles siendo precisa una costante xixilancia y reivindicación mientres nun se modifíque l’actual marcu estructural de la sociedá asturiana. Solamente camudando la rialidá d’Asturies dende la so base estructural los ciudadanos y ciudadanes d’esti País vamos ser quien a configurar un modelu social que seya quien a superar los procesos de diglosia y glotofaxa, garantizando asina unos drechos humanos tan fundamentales comu son los de calter llingüísticu.

Anuncios
Esta entrada fue publicada en Noticies. Guarda el enlace permanente.