8 Setiembre, día de la nación asturiana (1998)

Esti 8 de setiembre, día de la nación asturiana, foron 2 les manifestaciones que la izquierda nacionaliega entamó per separtao pa reivindicar esta fecha. De un llau Andecha Astur como tolos años n’Uvieu y de otru’l nomáu Bloque de la Izquierda Asturiana (BIA) formau pola escisión d’Andecha INA (Izquierda Nacionaliega d’Asturies) y el partíu d’intelectuales IAS (Izquierda Asturiana) (¡Puxa las sigles!).

Na manifestación d’Andecha Astur n’Uvieu participaron unes 150 persones, na mayoría xente mozo, empobinando peles cais d’alredor del gobiernín y finando frenti la puerta’l mesmu. Durante la mani glayóse a favor de la independencia d’Asturies, contra l’Estau Español y pola oficialidá del asturianu. Cuando acabó la mani quemóse una bandera de España. Desgraciadamente los discursos foron enantes de la mani pa que asina le xente nun pudiera colar; mientres el voceru d’Andecha Mocedá dicía que la situación d’anguañu d’Asturies necesitaba de tonelaes de llucha, el d’andecha Astur tresmanábase nun discursu enforma ambigüo del derechu de “tolos asturianos” a decidir ellos mesmos, ensin estremar les clases sociales a les que pertenecen.

A la manifa del BIA acudieron unes 250 persones, tuvo un tonu moderau y centrada nun discursu electoral d’atropar fuercies alredor de la so coalición, daqué que desgraciadamente remembra lo que ye’l BNG en Galiza, un proyeutu integrau dafechu nel xuegu democrático-institucional escaeciu de cualisquier mensaxe rupturista.

D’otramiente a les 6,30 en Xixón un grupo xente punxo na autopista una barricada de neumáticos prendios que cortó’l traficu durante 15 min.

Ye una pena que feches como esta nun tengan un conteníu de llucha más fondero. Col desaniciu que sufre’l pueblu asturianu las rempuesta tien de ser otra enforma estremada. Ye la xera de la xente que tamos pola lliberación social, l’autoorganización de la llucha, entamar la grieska ensin qu’electoralismos y intereses partidistas mos dixebren.

Puxa Asturies llibre ya dixebrada, ensin explota@s nin explotadores.

Hay qu’armala.

Espublizáu en: Agitazión nº30, Ochobre? de 1998.

Fonte: Blogue Asturies Llibertaria

Anuncios
Esta entrada fue publicada en Andecha Astur, IAS, Nacionalismu. Guarda el enlace permanente.