Va continúase col alderique elleutoral

¡Hai qu’entendese! Resume de la T. García Rendueles que continuará col tema’l prósimu xueves.

L’ascensu del Foru Asturies, el comu supo aprofitar la concenxa asturiana de ser un país marxináu y maltratáu pol Estáu español y xuncilo a la imaxe del so cabezaleru comu presona capaz y “de pallabra”, los patéticos intentos del PSOE por tapecer el componente nacional d’estos resultaos pretendiendo presentalos comu l’entamu de la estrema drecha (“¡pero si los facistes son el PSOE!!”, diríase na tertulia); la posible evolución del Foru; la situación na que queda URAS-PAS…

Custiones de forma ya imaxe de les formaciones polítiques asturianes, comu presentase, que papel tien de tener la llingua, la radicalidá o non del mensaxe, táutiques a siguir pa que la sociedá asturiana asuma dafechu la custión nacional… la curiosa apaición en cauna de les elleiciones autonómiques de “proyeutos millagru” qu’afirmen que van sacar un diputáu (nesti casu “un diputáu y una diputada”) y a la fin nun saquen más qu’unos miles de votos… lo curioso de qu’esos “proyeutos millagru” seyan siempres presentaos poles mesmes presones…

A la fin muncha crítica y autocrítica, porque ente los asistentes a la tertulia atopábense presones implicaes nes estreames formaciones polítiques presentaes nestes elleiciones, y un plantegamientu más o menos común: ¡Hai qu’entendese!

La necesidá de superar endiosamientos presonales, fabulaciones, mentires, autoengaños… analizar oxetivamente la rialidá asturiana y avanzar haza postures d’entendimientu que permitan a les formaciones polítiques asturianes caltener la so independencia pero presentar una alternativa elleutoral única, recurriendo a los aspeutos fundamentales que les xuncen al traviés de presones intermedies nun vinculaes coles formaciones esistentes y que representen namás que los aspeutos comunes de toes elles.

El xueves 2 de xunu continuará esta Tertulia abierta a tol mundiu. En L’Ayalga, Prendes Pando 11. Xixón

Anuncios
Esta entrada fue publicada en Actividaes del Atenéu. Guarda el enlace permanente.