Una “Andecha” pa l´Asturies d´anguañu (años 1990)

Asturies, dende les sos peculiaridaes propies, lo mesmo qu´otres naciones d´Europa, carez fonderos procesos de cambiu sociolóxicos, económicos y políticos. Poro, los naguares de soberanía política ya igualdá social que tien el nuesu pueblu, tan alquiriendounes formes d´espresión y contestación social que desixen rempuestes polítiques afayaíces.

Dende hai tiempu, ANDECHA ASTUR, consciente de les tornes que desixe la sociedá y dimpuesta a retrucar a los grandes problemes políticos que se mos averen, ta enfotada n´asoleyar y popularizar un procesu d´alderique y reflesión qu´afonde nos plantegamientos d´izquierda nacionaliega comu puntu de referencia pa los/es nacionaliegos/es progresistes y la izquierda en xeneral.

L´anchor d´esti alderique, xunta la nuesa voluntá de facelu abiertu y participativu, faen uq seya imposible condensalu nun poques llinies, nin ye esa la nuesa intención. Equí namás mos pruye afitar amenorgadamente les custiones cimeres que tien de cincar esti alderique y recoyer, lo más cenciellamente posible, les señes d´identidá d´ANDECHA ASTUR: Quiénes somos, qué queremos, au vamos. 

1. ANDECHA ASTUR, UN PROYEUTU POPULAR Y UNITARIU

Nun somos nin mos definimos comu partíu políticu.

Andecha Astur ye una organización sociopolítica na que tenemos l’enfotu de ser un marcu de converxencia pa les sensibilidaes polítiques y societaries asitiaes na izquierda nacionaliega.

Creyemos nuna organización plural, na que conviva la bayura de sensibilidaes idiolóxiques, polítiques, culturales y sociales que se dan. Esi respetu al pluralismu pue xuncise cola unidá nun proyeutu común.

Poro, préstamos ufiertate un verdaderu proyeutu de “andecha”. Ye un modelu hestóricu de trabayu en común nesti país. Pero tamién ye un modelu de futuru, vien valible pal puxu col que les clases populares trabayamos por torna-y la dinidá nacional y social al Pueblu Asturianu.

2. UNA NUEA POLÍTICA CREATIVA MAXINATIVA Y NON CONVENCIONAL

Refugamos del sistema partidocráticu d’anguañu que, anque vixente, apodrigaña nuna fonda cris.

N’Andecha Astur tenemos otra idega de lo que ye Asturies. Pero tamién queremos ser una alternativa na forma de facer política nesti país.

Somos un movimientu políticu abiertu y plural. Autocríticu y en permanente reflesión. Radical, coherente y creativu nes propuestes. Maxinativu na rellación cola sociedá. Tresparente y ayenu al politiquéu y al pautismu. Abiertu a les aportaciones y a la participación del pueblu. Sometíu sólo a los intereses del país y guetanto siempre rempuestes pal so futuru.

3. DEMOCRACIA INTERNA: EL PROTAGONISMU DE LA MILITANCIA

Asturies siempre escoyó un modelu social participativu y protagonista. Ello tien d’espeyase na democracia interna d’Andecha Astur.

Fuximos del modelu de partíu tradicional tamién pol so furrulamientu monolíticu, vertical y elitista.

Andecha Astur encadármase comu una organización horizontal y abierta, garantizándo-y a la presona militante’l so protagonismu nes decisiones polítiques.

Los Conceyos son la estaya básica na vida interna d’Andecha. Nellos aplicamos otra fórmula social hestórica: el Conceyu Abiertu.

Andecha Astur ye un movimientu asambleariu y los sos Conceyos Autónomos l’espaciu llibre d’intercambiu, alderique y decisión pa tola xente enfotao na lliberación social y nacional del nuesu Pueblu.

4. DARRÉU: BALTAR ESTI ESTATUTU

Asturies ye una nación a la que se-y ñega’l drechu a la so propia identidá.

Los partíos tradicionales, col discursu políticu de la “autonomía” y les sos diferentes variantes, quien tapecer la vergoña d’una Asturies ensin soberanía política y sometía al gobiernu del Estáu español.

La fase moderna d’esti procesu entamó cuandu tolos partíos presentes n’Asturies mos impunxeron en 1981 l’Estatutu d’Autonomía. Y siguió anguañu cuandu tuvieron d’asoleyar les alternatives que defendíen pa la reforma d’esi testu.

L’Estatutu d’Autonomía, el Pautu Autonómicu, la reforma estatutaria y la política autonómica de los partíos tradicionales son y sedrán un nidiu fracasu y un gran dañu p’Asturies.

Con too ello sólo quien asegurase de que’l pueblu asturianu nun tenga nes sos manes el poder políticu de decidir el so futuru.

N’Andecha Astur guetamos un nueu modelu de rellaciones ente Asturies y l’Estáu español, que pase pola reconocencia de la nuesa soberanía política

5. NACIONALIEGOS/ES QUE DESIXEN EL DRECHU D’AUTODETERMÍN

El drechu d’autodetermín, incluyía l’alternativa dixebriega, ye un drechu fundamental colleutivu y democráticu qu’asiste a toa nación.

Ye’l drechu inalienable ya imprescriptible a decidir el modelu social, económicu, cultural, políticu y d’integridá territorial, asina comu la so rellación colos demás estaos y naciones.

Denguna istancia o istitución pue exercer esi drechu nel nuesu nome, el Pueblu Asturianu tien de ser el protagonista únicu y direutu a la hora d’escoyer el so futuru.

El nuesu apueste pola soberanía d’Asturies va acompangada tamién d’una fuerte actitú de solidaridá internacionaliega. Asina condergamos l’imperialismu y asumimos el compromisu de defender el drechu de tolos pueblos al so autodetermín, a nun ser esplotaos nin primíos.

6. L‘ASTURIANU: LA NUESA LLINGUA NACIONAL

L’asturianu ye la llingua nacional de toa Asturies, la seña cimera de la nuesa identidá coleutiva.

Güei la nuesa llingua ta indefensa, sometida a un agresivu procesu de sostitución pol castellán. Poro, Andecha Astur defende la única política de normalización llingüística que garantiza’l futuru la nuesa fala:

Que seya la llingua oficial y prioritaria’l país.

Que l’usu la nuesa llingua seya precisu pa toa triba de rellación social.

Que seya necesaria nun territoriu fixu, determináu, ye dicir, en tol territoriu nacional.

D’ehí que tamién ye una xera perimportante y un compromisu destacáu de tola militancia l’emplegu normal de la nuesa llingua nel llabor internu y públicu d’Andecha Astur.

7. LA UNIDÁ POLÍTICO-TERRITORIAL: BASA DE LA COSTRUICIÓN NACIONAL

El Pueblu Asturianu forma una nación afincada nos 78 conceyos allugaos ente’l Deva y l’Eo, coles carauterístiques comunes propies d’una nación. Al traviés de la hestoria formemos un pueblu con carauterístiques comunes de llingua, cultura, territorialidá, socioeconomía y política.

Poro, siempre dende’l respetu a la voluntá soberana de los sos ciudadanos/es, vindicamos la unidá territorial y política de tolos territorios hestóricos asturianos: Babia, Llaciana, Palacios del Sil, Los Argüeyos, Lliñu, Oseya de Sayambre, Posada de Valdeón, La Liébana y otros.

8. UN PROYEUTU DE NUEA SOCIEDÁ

Andecha Astur ye un proyeutu pa la unidá de la xente nacionaliego y de la izquierda que trabaya por una nuea sociedá asturiana.

Ente los nuesos enfotos queremos destacar éstos:

Dixebra y socialismu.

Un nueu modelu de rellaciones Asturies-Estáu español, sofitáu nel mutuu respetu y reconocencia.

Soberanía política, cultural, económica y social.

Drechu inalienable a exercitar l’autodetermín.

Un modelu social y económicu xustu ya igualitariu, al sirviciu los/es más esfavorecíos/es.

Una sociedá llibre, non autoritaria, antimilitarista, solidaria ya igualitaria pa muyeres y homes, ansí comu pa toles opciones sesuales.

Un modelu económicu que respete la ñatura.

9. UN MODELU SOCIO-ECONÓMICU ASTURIANU ESPEYU DE LA NUEA ASTURIES

El proyeutu socioeconómicu pol que trabayamos ye un nuéu modelu de democracia económica, guiáu polos porgüeyos populares, qu’arreblague tanto penriba l’inxustu mercáu capitalista comu de la burocracia alministrativa. Tien de ser un modelu asturianu y apareyáu a les necesidaes de fortalecimientu de la nuesa identidá nacional.

Dellos de los criterios que defendemos nesta estaya son;

Encadarmamientu del trabayu con control efeutivu por parte los/es trabayadores.

Socialización de la cencia y el dominiu la teunoloxía.

Desendolque socioeconómicu equilibráu, con esplotación racional de los recursos.

Defensa de los nuesos recursos y vindicación d’un plan integral de revitalización económica y reindustrialización de la nación.

Recuperación de la nuesa cultura industrial, agraria y pesquera.

10. NACIONALIEGOS/ES Y ECOLOXISTES PORQUE DEFENDEMOS LA NUESA TIERRA

Puxamos por xuncir un nueu modelu de producción y de vida ecolóxicamente caltenible, porque la ecoloxía y el modelu socioeconómicu son partes complementaries del modelu social que defendemos.

Creyemos que la tresformación del mediu tien de caltener l’equilibriu ecolóxicu y que l’usu los recursos tien de llendase en fonción d’una redefinición de les necesidaes societaries que güeye tanto pola calidá de vida y la salú coleutiva comu pola reposición y reserva pa les xeneraciones futures.

El pueblu que llucha pola so identidá tien de pescanciar y asumir la defensa de la tierra cola que s’identifica.

11. LOS MOVIMIENTOS SOCIALES: BASA DE LA DEMOCRACIA PARTICIPATIVA Y DE LA NUEA SOCIEDÁ

Trabayamos por una democracia participativa que garantice’l respetu, l’encadarmamientu y potenciación de les estremaes manifestaciones de la voluntá popular.

La democracia participativa nun apareya la suplantación del sistema representativu, sinón la superación de les formes d’actuación qu’anguañu carautericen a talu sistema.

L’autoorganización de la sociedá en movimientos societarios garantiza la participación del pueblu na xestión pública y caltién valores comu la solidaridá y la defensa de los porgüeyos propios y comuñales.

Los movimientos societarios son imprescindibles p’algamar una nuea Asturies, n’andecha col conxuntu de muérganos ciudadanos y populares.

12. UNA ANDECHA DE PUNTOS MÍNIMOS

La clave fondera de la nuesa propuesta ye: Soberanía Nacional. Poro, los fundamentos nos qu’Andecha Astur se sofita son:

La rialidá nacional asturiana. Asturies ye una unidá xeográfica, política, hestórica, social, cultural y llingüística que la conforma comu un país estremáu, ello ye, una Nación.

El drechu d’autodetermín. L’exerciciu del drechu que tien el nuesu Pueblu a autogobernase, decidiendo por sigo mesmu’l so modelu económicu, cultural, social, políticu y llingüísticu y a encadarmar comu-y pete les sos rellaciones colos pueblos y estaos que lu arrodien.

Unidá política y territorial. Comu basa de toa nación, Asturies tien drechu a la so integridá territorial y a una organización política común pa tolos sos territorios hestóricos.

L’asturianu, llingua nacional. Ensin la capacidá del Pueblu Asturianu pa comunicase nel so propiu idioma enxamás nun algamará la so braera identidá. Soberanía asturiana quier dicir tamién que la llingua nacional y prioritaria del nuesu Pueblu ye l’Asturianu y qu’esa seña d’identidá básica y fundamental tien de ser recuperada por toos/es, porque ye padrimoniu de tolos/es habitantes d’Asturies.

Poder políticu pa la recostruición nacional. La Soberanía y l’Autodetermín del Pueblu Asturianu y les instituciones qu’ésti encadarme pasen por recuperar la capacidá y el poder políticu afayaizu pa garantizar la reconstruición económica, cultural, política, social, llingüística ya hestórica d’Asturies ensin dependencia dala nin inxerencies de poderes ya instituciones foriates y que mos permita ser suxetu y parte activa en tolos foros ya instituciones onde s’igüen les temes que cinquen a los nuesos llexítimos progüeyos.

Pola clas trabayadora. La inxusta realidá na que s’atopa la sociedá asturiana fae necesario l’algame d’un sistema social más xustu y llibre onde les clases populares y trabayadore protagonicen una fonda tresformación que les empobine haza la so lliberación, nuna sociedá socialista, igualitaria, non sesista, desmilitarizada, ecolóxica y con especial pricuru haza los seutores qu’anguañu s’atopen marxinaos o amenorgaos.

Anuncios
Esta entrada fue publicada en Andecha Astur, Nacionalismu. Guarda el enlace permanente.