La Santina de Cuadonga

07/09/2011
L’ocho setiembre ye’l nuesu “Día de la Patria”, por más que seya cosa discutía dende los entamos del réxime autonómicu. Naquella dómina la sociedá asturiana tuvo plantegase cuálu diba ser el día de la comunidá. Descartaes dalgunes propuestes perminoritaries de calter ermunamente partidista d’óptica d’esquierdes –llegara plantegase la data la proclamación de la comuna, n’ochobre de 1934- dos fueren les feches que se discutieran: el 25 de mayu ya’l 8 de setiembre.
La primera unvíamos a la declaración de la Xunta Xeneral de 1808. Entóncenes, escontra la situación qu’el reinu d’España vivía tres l’abdicación de Carlos IV y la entronización de Xosé I col abellugu les bayonetes del so hermanu Napoleón, la Xunta Xeneral proclamó la soberanía d’Asturies, declaró la guerra a Francia, reclutó un exércitu ya unvió embaxadores a Llondres p’algamar un pautu con Inglaterra. El conde de Toreno crució la mar nel nome de la Xunta y, non namái que consiguió’l respaldu británicu, sinon que traxo a Asturies al duque de Wellington, que fora arrecibíu en Xixón pol alcalde de villa y conceyu.
De xuru que’l 25 de mayu, en viendo los fechos, sedríe la fecha afayadiza pa la fiesta d’un país que recuperaba la so autonomía, anque mutiláu tarrentorialmente porque quedaba arrequexáu na borbónica y xacobina “provincia de Oviedo”.
Pero’l pesu l’ochu setiembre yera mui grande. Pueden aducise delles razones pa que, a la fin, la Xunta Xeneral (nome históricu retomáu pa denomar al parllamentu asturianu) decidiere optar por esi día. En primer llugar, el 8 de setiembre ye’l día de la Virxe de Cuadonga, tradicionalmente festivu y tamién consideráu como “Día de Asturias” pola disuelta Diputación Provincial de Oviedo. En segundu llugar, el consensu col que se realizó la transición política fixo ser a los socialistes y a los comunistes más católicos que’l papa ya espavoriáranse de tomar decisiones que fueren ser apellidaes d’antirrelixoses. En tercer llugar, la diócesis uvieína apertó les tuerques hasta onde pudo, lo que yera bastantina naquellos años. Ya, en cuartu llugar, nun había ente los llexisladores –franquistes reconvertíos, socialistes y comunistes, nuna alcordada impensable enantia y dempués- nin un mínimu afoguín polos valores de la identidá política d’Asturies, colo que dexar de lláu’l 25 de mayu nun namái yera fácile sinon inclusive mui recomendable.
Podríamos dar por resueltu’l problema con estos apuntes breves, pero ye necesario ameter un ellementu más. El discutiniu de feches dábase, como paez evidente, ente aniciaos, ente persones conocedores de los pormenores históricos, políticos y sociales, pero taba lloñe de ser una custión popular. La mayoría de los asturianos nun entraba nel alderique, dando por sentao que’l “Día d’Asturies” yera’l 8 de setiembre. Pertrás d’esa opinión taba –y sigui tando- la gran identificación que’l pueblu asturianu tien cola Virxe de Cuadonga, cola so “Santina”, independientemente de les creyencies o non creyencies de caún:
“los nuestros padres los güeyos a ti volvieran
y una patria nos tos güeyos aldovinaran,
col to nome nos llabios por ti llucharan,
col to amor nes sos almes por ti vencieran”.
Pa nun quedamos nun llugar común, podemos analizar la odisea que la Santina protagonizó durante la última guerra civil, momentu nel que se sopelexa claramente la so identificación como símbolu nacional inclusive pa los más encamentaos llaicistes. Pa que la Virxe nun careciera de la xixa descontrolada de dalgunes faiciones frentepopulistes, el mélicu d’Izquierda Republicana Luis Laredo y la so muyer Ángeles, una ferviente católica, escuenden la imax nun armariu del Hotel Pelayo, embaxo la custodia de mozos socialistes de Cangues d’Onís y a les ordes d’una neña de nome Marina, fía d’un mecánicu al que llamaben Xulio el de los Ingleses. Dempués, pa que nun cayere nes manes de los faxistes y, particulamente, de los tabores de marroquinos, el presidente Belarmino Tomás ordena treslladala a Xixón, onde residía’l Conseyu Soberanu. El conseyeru comunista Ambou firma un decretu nel que castiga cola pena capital al que profane la imax. La Santina llega a Xixón escoltada por milicia de la Federación Anarquista Ibérica (FAI) ya ye agospiada nel Atenéu Obreru, onde s’espón al públicu conforme a un vieyu proyeutu de Xovellanos. Más sero, cuando’l gobiernu asturianu capituló y afuxó pa Barcelona, la Santina salió nun barcu británicu nel cuello’l teóricu anarquista Eleuterio Quintanilla, que nun s’apartó d’aquel bultu en toul viax. El Conseyu Soberanu quería tener consigo esi símbolu de l’Asturies irredenta. Eso motivara l’apaición d’una canción inspirada notra perconocida.
Diz asina la tradicional:
“la Virxe de Cuadonga
ye pequeñina y galana
y anque baxara del cielu
nun hai pintor que la pintara”.
Y asina reza la de 1937:
“la Virxe de Cuadonga
ye pequeñina y galana
y marchó con Quintanilla
porque ye republicana”.
La Santina nun llegó a Barcelona y acabó na embaxada española en París. Cuando Franco ganó definitivamente la guerra dalgunes llegaciones diplomátiques carecieron d’espolios y robos, tanto por personal que necesitaba sobrovivir nel esiliu como por delincuentes aprovechaos. Escontra esta posibilidá, un comunista preséntase nel domiciliu d’un claretianu francés pa desplicá-y que la Virxe de Cuadonga ta na embaxada y qu’elli nun quier que-y pase dengún mal. Ente los dos deciden escondela nun falsu techu na caxa l’ascensor. Nel momentu que’l gobiernu faxista ye reconocíu por Francia, el cura preséntase al nueu embaxador y cúnta-y la historia. Y tirando’l falsu techu apaeció una caxa na qu’un comunista asturianu escribiera en lletres roxes “Santina”. Dientro taba la virxe con tolos ornamentos, tal y como saliere tres años enantes de la santa cueva.
El nueu réxime aprovechó la circunstancia pa facer una pelegrinación cola imax hasta Cuadonga, pasando per media Asturies, falando de milagru: la Santina defendiérase del “terror roxu”. Nun yera, como vemos, cosa tala. La imax salvárase porque los asturianos tiénenla como símbolu, dalgunos por veneración y cultu, pero toos por una fondera indentificación.
De fechu, un encamentáu republicanu como Casona, esiliáu n’Arxentina, estrena en 1964 un llargu poema nel teatru Colón, na ciudá de Bonos Aires, nel que nun s’entaramanga n’escribir lo siguiente:
“allá en los verdes prados,
allá entre las nieblas altas,
allá en los montes bravíos,
verdes de musgo y manzana,
allá en las duras Asturias
ha nacido la esperanza;
“allá en las verdes Asturias
se alzan tu cruz y tu espada”.
Estes histories evidencien el sentimientu de los asturianos pa cola so Virxe. La lleenda cúntamos qu’a ella s’encomendara Pelayo cuando, abellugáu nel monte Auseva con un garapiellu de guerreros vadinienses, taba nel carel de la capitulación. El “princeps” clamió a la Santina ya ésta fixo’l milagru: los montes argayaron, los rigos esbardiáronse y les fleches de los moros xiraben no alto y diben clavase nos sos propios peitos. La masacre fora descomanada, los invasores afuxeron escorríos polos revitalizaos defensores ya’l reinu asturianu entamó la so historia. ¿Cómo, nel inconsciente collectivu, diba competir con esti sucesu de la nueche les dómines una “simple” declaración política d’una institución del sieclu XIX?.
Por eso, pesie a que’l 25 de mayu ye, ensin dulda denguna, la fecha más afayadiza pa cellebrar el día nacional, yera mui difícile –y sigui siéndolo- convencer a la ciudadanía, que, posiblemente, nun lo diba entender. Amái, munchos nacionalistes –básicamente la esquierda- cometieron l’erru de menospreciar el 8 de setiembre y, d’esta forma, el rellatu míticu fundacional d’una de les naciones más vieyes d’Europa quedó monopolizáu pola ilesia y pol españolismu más cotrosu. Por eso yo siempres comenté que, pente los aciertos qu’Andecha Astur tuvo dende un principiu –ya nun fora cosa mía porque yo apaecí más sero-, tuvo’l de cellebrar les dos feches, una como día nacional ya otra como día de la organización.
El mitu de la Virxe de Cuadonga ye una cristianización del cultu a la diosa madre y podemos decatanos con namás adicar pa la escenografía’l llugar mesmu nel que la lleenda afita los fechos. Trátase d’una deidá femenina abellugada nuna cueva, representación del úteru maternu de la tierra, onde ñaz un rigu, representación de la vida y la fertilidá. Ye más, esi rigu que ñaz col mesmu nome de Cuadonga, acaba convirtiéndose en Deva, el nome de la antiga diosa madre. La pallabra “deva” procede del sánscrito, la llingua sagrada del oriente, y d’ella deriven les pallabres “divino” y “divinidá”, y la mesma pallabra “dios”. Por si esto nun abastara, lo más probable ye que la Santina seya una virxe negra, como apaez nuna copia de la imax primitiva que ta nun pueblu de Burgos, en Castiella. Pero la imax actual ye del sieclu XVIII porque la otra amburó nun incendiu.
Ye mui probable qu’entóncenes, principios del sieclu VIII, les xentes d’aquella Asturies entá escosamente cristianizada tomaren la decisión de, escontra l’avance musulmán, aportar a la cueva de la madre na idega de defender el so santuariu o na de morrer nel so somatu. Lluéu la historia cuerrió per otros caminos y, de fechu, paez tar demostrao, que’l primer amarrexu nun se diera en Cuadonga sinon nos montes d’alfrente, concretamente nel Priena, mientres que la victoria definitiva algamola Pelayo nel llanu de les bárcenes del Güeña, cerca yá de Cangues. De fechu, la Virxe nun se-y apaeció al peleón rei. Lo que sucediera, diz la tadición, ye qu’una cruz rellumó nel cielu ya una voz repiló pente los gumiales: “in hoc signus vinces”. Ye la mesma lleenda que se cuenta del Pontem Milvius, onde Constantino, l’emperador cristianu, venciera al so rival Magencio. Esa cruz ya esa divisa son dende hai más de dos sieclos les armes d’Asturies, llevantaes pol exércitu asturianu, precisamente, un 25 de mayu, el de 1808. La continuidá histórica nun ye denguna casualidá.
Anuncios
Esta entrada fue publicada en Cuadonga. Guarda el enlace permanente.