Sobre l’asturianismu y les sos perspectives

Les Noticies (15/10/2011)

Tino Brugos

La inexistencia d’un movimientu asturianista afitáu sólidamente, con raíces sociales fondes y que permita una representatividá n’instancies polítiques estremaes ye un asuntu que fai surdir debates frecuentes tanto ente los que faen un apueste seriu pola so medría como n’otros sectores sociales o académicos que busquen respuestes a esta particularidá asturiana. El casu ye que, depués de tres décades de modelu autonómicu, son poques les comunidaes que nun foron quién a estructurar un sistema o subsistema de partíos onde tea presente polo menos una opción política que se presente como defensora acérrime de los sos intereses particularistes, sía presentándose como movimientu nacionalista o como rexonalista. El casu asturianu resulta más llamativu al tratase d’una comunidá con unes señes d’identidá bien asentaes y reconocíes d’antiguo. Con estos datos, muncha xente pregúntase’l porqué d’esta debilidá del movimientu asturianista.

Nel ámbitu académicu, los nacionalismos convirtiéronse, dende hai munches décades, nún de los oxetos d’estudiu más frecuentes, hasta l’estremu de que s’ellaboraron delles propuestes que tienen como oxetivu clasificar y analizar los movimientos nacionalistes atendiendo a les sos característiques más significatives. D’esta manera, pue reconocese la existencia de teoríes etno-nacionales, que ponen l’acentu nos componentes étnicos del movimientu nacional. Otru enfoque ye’l que pon como elementu central el papel de la modernidá pa esplicar l’aparición de los nacionalismos, o tamién el que se centra nel papel que tienen les clases sociales y l’impactu del capitalismu na so formación. Existe otra escuela qu’analiza’l desarrollu desigual de los procesos nacionales y qu’intenta comprendelos a partir de les rellaciones económiques, culturales y polítiques que se dan nes sociedaes. Ente estos últimos podemos mentar a Benedict Anderson, Tom Nairm y Miroslav Hroch, profesor checu d’Historia Contemporánea especializáu n’analizar la historia comparada de los movimientos nacionales europeos.

El modelu de Hroch

El so modelu teóricu de desarrollu parte de la diferencia qu’hai ente lo qu’él llama naciones mayores y menores. Les primeres son aquelles que se van formando dende la dómina medieval, lo que permite qu’apareza l’Estáu modernu nel Renacimientu. Nestos casos, asístese a una transición hacia una sociedad civil moderna a partir d’una partida de reformes progresives, como ye’l casu d’Inglaterra, o pente medies d’una serie de revoluciones, casu onde se pue incluír a Francia o a España.

Les naciones menores, según Hroch, son aquelles nes que grupos étnicos qu’ocupen un territoriu compactu nun tienen una clas gobernante propia, una unidá política de referencia o una tradición lliteraria continuada. Trátase de grupos étnicos non dominantes que tán presentes tanto nel este (checos, estonios, serbios) como nel oeste d’Europa (irlandeses, noruegos, catalanes). En toos estos casos, estos grupos impulsen un movimientu nacional que se desenvuelve en delles fases. La fase A recueye los antecedentes del movimientu nacional y nella atopamos entidaes que nun llegaron a constituíse n’Estáu o perdieron l’autonomía, anque caltuvieron la etnicidá (búlgaros, catalanes o irlandeses). Esta fase caracterízase por conservar la memoria del pasáu propiu ensin qu’existan esixencies específiques nacionales.

La fase B refierse al empiezu de l’axitación nacional y estrémase ente una fase B-1, el llanzamientu, y la fase B-2, la consolidación del movimientu nacional. Lo normal ye que la primer etapa tea al cargu d’un grupu d’intelectuales qu’empiecen a valorar la llingua, la cultura, la conciencia histórica o la presencia d’ilesies, que se convierten en factores identitarios centrales. Estos activistes lluchen pola existencia de la nación cuando se produz el cambiu hacia la revolución burguesa. Hai dellos requisitos, ente los que ye mui importante la existencia d’un conflictu d’intereses con llectura en clave nacional. Equí les clases sociales son importantes pero, si’l movimientu nacional se consolida, va acabar desbordando les fronteres de clas.

La fase B-2, de consolidación, ye central. Nella, el mensaxe del movimientu nacional espárdese ente les mases y l’axitación patriótica afítase usando dellos resortes: restos d’una autonomía política anterior (húngaros, croates, finlandeses), la memoria d’un pasáu independiente (Bohemia, Cataluña, Lituania) o la modernización de la vieya llingua medieval, que va permitir un renacimientu lliterariu llamáu a tener un papel central nel procesu d’axitación nacional. Con toos estos datos, Hroch cree que los movimientos nacionales pueden agrupase en cuatro modelos: los que se consoliden en mediu de los grandes cambios de metá del sieglu XIX (húngaros, checos, noruegos), los que se consoliden nel víspora del sieglu XX coincidiendo con revueltes constitucionales (nacionalidaes del Imperiu Rusu), los que lo faen ensin que se desarrollara’l réxime constitucional (pueblos balcánicos sometíos al Imperiu Otomanu) y, al final, aquellos que se consoliden nun marcu avanzáu con un réxime de llibertaes. Equí mete a Cataluña, País Vascu o Flandes. Pero señala que, en dellos casos, l’Estáu dominante pue albortar el procesu, como en Gales, Escocia o Bretaña. Equí pue incluíse tamién el casu asturianu.

Nel últimu pasu, na Fase C, el movimientu nacional faise masivu, con presencia en tolos estratos sociales y una composición plural con visiones y programes estremaos. Equí, los patriotes aprovechen una crisis de llexitimidá pa constituíse n’Estáu, como pasó al acabar la I Guerra Mundial o al desfacese la URSS o Yugoslavia.

Parez evidente qu’estudiar la fase B, coles dos etapes diferentes, ye la clave pa conocer les circunstancies y posibilidaes de desarrollu del movimientu nacional y, nesti sentíu, ye importante comparar el desarrollu del asturianismu con otros procesos socedíos nel ámbitu peninsular. Quiciás ún de los aspectos más llamativos sía la diferencia cronolóxica existente ente’l saltu a la fase B-1, que n’Asturies faise con munchu retrasu, amás de la prolongación d’esta etapa a lo llargo de bona parte del sieglu XX. Pa esplicar esta circunstancia había que facer referencia al papel que desempeñaron les élites polítiques, poco interesaes na axitación patriótica, y la capacidá del Estáu pa interceptar el desarrollu del movimientu, porque nun marcu de llibertaes faise difícil atopar un puntu central que se convierta na exa del enfrentamientu. La llucha pola normalización llingüística nun se convirtió nun conflictu que la sociedá analizara en términos nacionales, sinón democráticos. A pesar del avance producíu a últimos del sieglu XX, parez difícil poner l’asturianismu na fase B-2.

Otru aspectu interesante sobre’l que se pue reflexonar fai referencia al momentu en que’l movimientu da’l saltu al campu políticu. En Cataluña o País Vascu hubo un periodu anterior, el fuerismu, que dexó poner les bases sociales pa encontar nelles el desenvolvimientu del movimientu nacional. Nel casu asturianu, la movilización de la década de los setenta del sieglu pasáu foi una fase curtia que nun permitió atropar fuercies de cara al saltu cualitativu que supunxo la propuesta política nacionalista. La respuesta electoral foi escasa y tuvo que resalvar un periodu de retrocesu de les movilizaciones sociales cuasi hasta güei. Neses circunstancies, afitar un espaciu políticu nuevu ye una xera muncho más revesosa. De toles maneres, nun dexa de ser llamativu l’impactu social tan estremáu del asturianismu cultural en comparanza col políticu. La reivindicación llingüística gana siguidores y ye la base de la que se nutre l’asturianismu políticu, que sigue lloñe, a pesar de too, de convertise nun movimientu de mases.

En cualquier casu, el modelu de Hroch nun ofrez respuestes ciarraes. Namás apurre ferramientes pa facer un análisis más axustáu a partir del marcu comparativu. Hroch fala de procesos albortaos y cita, ente otros, el casu escocés. Sicasí, nos últimos años asistimos a un aumentu bárbaru de les propuestes nacionalistes colos trunfos del Partíu Nacional Escoces y del Partíu Nacional Escocés, lo que significa que siempre pueden aparecer factores imprevistos –esplotación del petroleu nel casu d’Escocia– que permitan empezar una batalla frente al Estáu central nun marcu políticu y social más afayadizu.

El casu asturianu

Al aplicar el modelu de Hroch al casu concretu del movimientu nacional asturianu, obsérvase, como s’apuntaba más arriba, que nun se pasó tovía de la fase B-1 –la del empiezu de l’axitación nacional–, amás de qu’esta fase allárgase más nel tiempu de lo que pasó con otros movimientos nacionales del Estáu español.

La fase A del movimientu nacional asturianu arrinca na época moderna, anque tien los raigaños na Baxa Edá Media, cola creación del Principáu d’Asturies y la Xunta Xeneral del Principáu. Nel sieglu XVII asístese al desarrollu d’una corriente lliteraria qu’usa la llingua asturiana de forma intermitente a partir d’Antón de Marirreguera y que tien la utilidá de caltener el contactu col campesináu, clas social mayoritaria. Yá nel sieglu XVIII, atópense les primeres ellaboraciones historiográfiques asturianes col Padre Feijoo y, a últimos de la centuria, destaca la figura de Xovellanos, representante de la Ilustración asturiana, que muestra una sensibilidá grande pa cola llingua vernácula, qu’usa en dellos escritos. Xovellanos propón la necesidá d’una gramatica, un diccionariu y una institución académica.

El procesu de construcción d’un Estáu lliberal centralizáu lleva, en 1839, a la disolución de la Xunta Xeneral del Principáu y, na segunda metá del sieglu xix, produzse’l nacimientu del rexonalismu asturianu col grupu de La Quintana, onde un piñu d’intelectuales asturianos fai trabayos importantes d’investigación y erudición que tienen la base n’elementos rexonales (tradiciones, folclore, música popular, etc.). Fermín Canella, Julio Somoza, Braulio Vigón, Fuertes Acevedo, C. Miguel Vigil, Félix Aramburu, nomes destacaos d’esti grupu, faen los sos trabayos, sicasí, dientro d’una visión nacional española, de la qu’Asturies ye l’orixe. Amás, la revisión historiografica del romanticismu consolida’l mitu del cuadonguismu como elementu fundacional de la nación española. Per otra parte, empieza nesta época’l procesu d’industrialización, pero la burguesía asturiana, que nun ye mui numberosa, siente defendíos los sos intereses pola política económica proteccionista del Gobiernu central, polo que nun hai traza d’enfrentamientu. La industrialización trai tamién el nacimientu de la clas obrera.

La fase B-1 empieza na segunda década del sieglu XX, cuando otros nacionalismos periféricos, como’l catalán o’l vascu, yá la teníen ciarrada al empezar la centuria. En 1915 surden los primeros movimientos rexonalistes nel ámbitu políticu, que se caractericen por priorizar los aspectos económicos. Los protagonistes d’estos movimientos son los sectores conservadores y les élites sociales vinculaes a la Diputación y los conceyos. La coxuntura na que se desenvuelve ye la de la crisis económica provocada pola I Guerra Mundial y la quiebra del sistema de la Restauración. Destaquen dos organismos dientro d’esti movimientu incipiente: la Junta Regionalista del Principado (tradicionalista, con Vázquez de Mella como figura sobresaliente) y la Liga Pro-Asturias (conservadora, encabezada por Nicanor de las Alas Pumariño). Produzse tamién un desarrollu de la prensa rexonal: Región, Revista de Asturias, El Regionalista Astur, El Ideal, Alma Astur…

Ente les característiques d’esti primer movimientu hai que destacar l’inclín a identificar el rexonalismu con intereses económicos particulares, la consideración de la industria del carbón como un fechu diferencial de la rexón, l’articulación de demandes rexonalistes que busquen un proteccionismu pal carbón y el comerciu, la importancia subalterna de los factores culturales de la rexón, la percepción de los rexonalismos como un elementu disolvente, la defensa d’un rexonalismu integrador que refuercia’l papel xerminal d’Asturies n’España, la convicción de la dificultá pa convertir el sentimientu rexonal en conciencia rexonal –lo que configura una identidá asturiana como conciencia dormida–, la entidá escasa de los oxetivos políticos –reducíos a la defensa de dellos intereses económicos– y la concepción de la rexón como un ámbitu de conciliación y concordia.

Cola II República –que val n’otres nacionalidaes pa consiguir autonomía política del Estáu central y dotase d’instituciones propies–, n’Asturies ponse la solución de los conflictos sociales per delantre de l’autonomía. Con too, surden dellos proyectos d’Estatutu que nun lleguen a fraguar. La Guerra Civil y el Franquismu asitien un proyectu nacionalista español escluyente de los demás componentes culturales que lleva a desaniciar tolos referentes culturales y ideolóxicos non identificaos col nacionalismu español. Nesta dómina, la creación del IDEA permite al sector más conservador siguir col procesu d’ellaboración de trabayos de temática rexonal que nun amenacen la ideoloxía oficial. Caltiénse un nivel ruin de producción lliteraria n’asturianu pero de pocu prestixu social. Nel terrén del asturianu, asístese tamién al aumentu de los estudios monográficos dialectales, que van posibilitar más alantre abrir una etapa nueva nel procesu de recuperación de la llingua.

Nos años 60 asístese a la medría de los nacionalismos nuevos n’Europa occidental y l’Estáu español, renovación que permite l’aparición d’ETA, UPG, PSAN, MPAIAC y otros movimientos en Valencia y Andalucía. Nestos años, empieza n’Asturies la crisis nos sectores básicos de la economía, una crisis llamada a convertise n’estructural nes décades siguientes. En 1969 aparez la revista Asturias Semanal y aumenta la conciencia de la gravedá de la crisis industrial. El mesmu añu créase l’Asociación d’Amigos del Bable. En 1973 faise la I Asamblea Rexonal del Bable y un añu más tarde surde Conceyu Bable, que supón l’empiezu de la fase d’axitación patriótica. Ello lleva a una interpretación nueva de la realidá asturiana basada nes particularidaes rexonales y impónense conceptos nuevos como colonialismu interior o normalización llingüística del asturianu.

En 1977 fúndase’l Conceyu Nacionalista Astur (CNA), primer partíu políticu nacionalista asturianu. Dende entós, desarróllase despacino un movimientu nacional que promociona la diferencialidá asturiana, anque va producise una diversificación nel movimientu ente un ala moderada no social (PAS) y otra llinia partidaria de caltener la identidá política orixinaria de los primeros años, más radical no nacional y nes cuestiones sociales. D’entós p’acá, asístese al nacimientu d’organizaciones de mases que nun son a consolidase nel tiempu y a una riestra de fracasos electorales siguíos.

Anuncios
Esta entrada fue publicada en Tradición rexonalista. Guarda el enlace permanente.