Una visión sobre’l día nacional

30/05/2012
A ver ho, nun voi aburrivos colo de siempre. Toos sabemos lo que pasó’l 25 de Mayu de 1808. el llevantamientu popular, la creción de la bandera, la declaración de soberanía… Apostaría que ye’l mayoritariu, ente los que tenemos una concencia nacional, como’l Día d’Asturies por escelencia  y como preba tenemos la encuesta de Frayando Cadenes anque tampoco ye que les encuestes sían fiables al 100%
Estos son los 4 díes propuestos:
25 de Mayu, pola declaración de soberanía de 1808 y pola creación de l’Asturina.
8 de Setiembre, el más popular ente les asturianes por ser el día la Virxe y l’oficial. Un 8 de Septiembre, cellebrando el 1200 cabudañu de la Batalla de Cuadonga, foi coronada la virxe en presencia de los reis españoles. Tamién un 8 Setiembre se-y concede’l títulu de ciudá a Cangues d’Onis y un 7 de Setiembre de 1901 diose por terminada la basílica de Cuadonga (polo que’l 8 foi el so primer día) D’ehí el so orixe y non l’aniciu del Reinu d’Asturies como se cree popularmente
24 d’Agostu, pola declaración de soberanía de 1937 na llucha contra’l facismu.
5 d’Ochobre, pola revolución y la creación de la ROCA de 1934.
Lo que de mano ye un problema, pola dificultá de que toos queden a gustu, yo veolo como una bayura d’escuses pa salir a la cai, interactuar cola “población civil” y espardir la nuesa visión d’Asturies.
La importancia de que cellebramos y cuando ye importante y voi ponevos un exemplu:
El 1u de Mayu ye’l Día Internacional de lxs Trabayadores, conmemorando les revueltes de Chicago. Curiosamente nos EEXX nun lo cellebren esi día sinon que tienen la tradición de facelo el primer llunes de setiembre pa conmemorar un desfile de los Knights of Labor, un sindicatu de trabayadores, en Nueva York en 1884.
Asina un día hestóricu, que recuerda la muerte de sindicalistes p’ameyorar la vida de los trabayadores (pasaron de trabayar un máximu de 18 hores al día a 8…) ye escaecíu na tierra que los vio nacer y “gracies” al sindicatu de los trabayadores que dieron la so vida agora esi día nun tien xacíu nengunu. L’estáu fizo bien la so llabor.
Veamos que pasa n’Asturies:

25 de Mayu, Andecha cellebra’l día del so partíu. BxA-UNA suelen facer dalgún actu. FAI! intentó recuperar la vieya reivindicación entamando una Folixa pol día nacional
8 de Setiembre, Andecha convoca una mani pol día de la nación.  BxA-UNA, que  yo recuerde ficieron una xuntanza en Xixón hai 2 o 3 años pero suel pasar el día ensin más pena que gloria con dalgún actu nos sos conceyos “fuertes”. Ye’l día institucional y asociaciones neonazis como “Asturies Non Conforme” tamién la cellebren como Día d’Asturies.
24 d’Agostu, que yo sepa naide fai nada sacantes dalgún comunicáu de Darréu.
5 d’Ochobre, anque non concretamente esi día, suel haber una montonera d’actos, conciertos y charres alredor de la revolución. Los más activos suelen ser Darréu.
Como podemos ver, y esto ye un analis de la situación non una crítica, l’actuación por separtáu debilita, amenorga y fai invisibles les nueses reivindicaciones que son, añu tres añu, mas minoritaries cuando la lóxica diz que con un calendariu d’actos tan grande tendría que llevanos a tolo contrario.
Esti 25 de Mayu diose una novedá: La robla d’un manifiestu conxuntu de gran parte del soberanismu d’izquierdes d’esti país, poques o nenguna vez se vio, que paez que mos da un aliendu a los que ya creyíamos que nunca lo veríamos.
Paez qu’agora que vemos les oreyes al llobu, la fin de l’autonomía,  empezamos a ponenos d’acuerdo nes coses importantes. Esperemos qu’esti primer pasín sía daqué más nel futuru.
Ye hora de que falemos y lleguemos a alcuerdos globales, al “mira, nun toi 100% d’alcuerdo pero me val”, no que cinca a les bases del movimientu y falar ensin miéu a ser criticáu (como ya fice na mio entrada sobre la territorialidá) con unos fundamentos:
-Hai qu’aceptar lo que pida la mayoría de les bases. Anque pa eso hai qu’entruga-yos.
-Xuntos tenemos muncho más capacidá.
-Ye meyor salir a la cai 5 dies que 4. Meyor ser 1000 que 100.
-Yo, que soi defensor de les manifestaciones, reconozo que son agotadores y amás poco atractives al públicu en xeneral. Hai qu’echái imaxinación.
No tocante al 8 Setiembre
– Entiendo equivocáu los argumentos pa defendelu. Personalmente creo qu’Andecha cayó na trampa de cellebrar el 25 de Mayu, ante’l vacíu institucional, como’l día del partíu y eso llevalos a nun dar marcha atrás.

-Ye cierto que’l 8 Setiembre ye’l más cercanu al sentir popular pero creo que nós tamos equí pa remover conciencies y nun considero científicu cellebrar como un día nacional el día qu’un rei foriatu punxo una corona a una virxe, por mui popular que sía. Amás, l’argumentu de “popular” ye un arma de doble filu pos más popular ye la bandera ensin la estrella o l’himnu oficial.
Si tuviera na mio mano la cosa faeriamosla asina:
-El 25 Mayu cellebrariamos el Día Nacional y de l’Asturina.  Pidiendo que por esi día la xente escolingue la bandera d’Asturies de les ventanes ayudaremos a espardir la importancia d’esti día, a lo qu’hai que sumar los actos qu’entamemos.
-El 8 Setiembre cellebrariamos el Día Popular d’Asturies. Como contrapesu al Día oficial podiemos facer, como ellos, un actu que vaiga xirando polos estremaos conceyos d’Asturies. Cola collaboración d’asociaciones de vecinos podemos salir de les grandes ciudaes y averanos a los conceyos. De mano tenemos conceyales en Nava, Noreña, Carreño y Morcín…

El 5 d’Ochobre cellebraríamos el Día de la República y la revolución d’Ochobre. Cola intensidá, ya avezada, d’actos, charres y homenaxes.
-El 24 d’Agostu cellebrariamos el Día de la Soberanía y pol derechu a decidir. Pola importancia que tien esti día, y aprovechando que’l so epicentru foi Xixón, ye una bona fecha pa ufrir otra visión d’Asturies a los visitantes.
Too esto, o otra versión dame lo mesmu, namás ye posible ente toos con espiritu de collaborar.
Como na tema de la territorialidá namás ye simbólica pos, a la fin d’esti procesu, tendriamos un Día de la Independencia, que ye lo importante.
Anuncios
Esta entrada fue publicada en Día d'Asturies. Guarda el enlace permanente.