INTERVENCIÓN D’EZEQUIEL SÁNCHEZ NEL MITÍN DEL DÍA DE LA NACIÓN ASTURIANA (1998)

Güei atopámosnos equí cola voluntá de camudar el sentíu d´esti Día de la Nación Asturiana, un día que pa munchos asturianos y asturianes pasara dafechamente desapercibiu, desapercibiu por mor d´un gobiernu y d´unos partios estatalistes que nun tienen dengún interés en facer de güei una fecha pala revindicación, pala llucha pol futuru d´esti pequeñu y queridu País.

En sin embargu n´ANDECHA ASTUR volvemos a salir a la cai pa glayar al altu la lleva, que nun mos presta esta Asturies que mos ufierten, que nun tamos d´alcuerdu colos cuentos que nos cunten, que tamos fartos de mentires y de qu´intenten engañamos con capes de pintura de calter rexonalista, porque tres d´elles atopamos lo de siempres, un montón de políticos col únicu finxu de medrar personalmente, de ganar puntos ante los sos xefes de Madrid, de asitiase na cultrona ya intentar caltener los privilexos la mayor cantidá de tiempu posible, en sin que-yos importe un res, nin Asturies, nin por supuestu los asturianos.

Güei tamos equí pa “lluchar pol futuru d´Asturies”, esi ye´l lema de nueso y esa ye la nuesa intención, porque, cada vegada más, los asturianos y asturianes somos conscientes de que naide mos va regalar ná, de que se nos ñega´l presente y de que tan hipotecándomos el futuru, cada vegada más, la sociedá asturiana va decatándose de que frente a los mensaxes triunfalistes qu´esparden los políticos profesionales, hai una rialidá que vivimos día ente día y que nun respuende a eses espeutatives que quieren xenerar&hellip que les soluciones personales nun son más que remiendos, y que lo qu´esiste ye una rialidá colleutiva, que mos afeuta comu persones y comu pueblu, y que desixe rempuestes colleutives, una rempuesta global p´Asturies.

El desmantelamientu industrial, el paru, la probitú, ufiertamos un presente mui triste y un futuru d´emigración pa les prósimes xeneraciones. Tan faciéndonos perder la propia identidá d´asturianos, reprimiéndonos llingüística y culturalmente y faciéndonos asimilar cultures ayenes a nos, en vede potenciar la de nueso. Les agresiones al mediu ambiente camuden l´Asturies verde que toos conocemos y preparen el pasu a la masificación turística y a la destruición del País. ¿Comu quedar impasibles? ¿Comu nun responder a ello? ¿Y comu facelo si nun ye dende la nuesa condición d´asturianos y asturianes, de trabayadores, de pueblu que sufre y siente estes rialidaes?

Semos la risión de tou l´Estau cola imaxen parlamentaria que tamos dando, una imaxen que espeya a la perfeición la nuesa realidá comu pueblu, y pa enrriba nun hai denguna posibilidá llegal de da-y fin a tanta incapacidá política, equí nun podemos facer elleiciones anticipaes, el nuestru Estatutu nun recueye esa posibilidá, lo qu´evidencia, una vegada más, la falta de voluntá de los nuesos gobernantes pa dexar de ser una simple sucursal alministrativa y de ñeru de fartones que secuestren la voluntá política del conxuntu del Pueblu asturianu pa los sos fines particulares y de partíu.

Engañífenmos colos fondos mineros, simple devolución d´unes perres que son de nueso hestóricamente, y estos fondos repártenlos ente los sos acólitos, ente la so xente afín pa emplegalos comu seguru de sumisión, comu moneda de cambeu pa la venta de tou un pueblu.

Pero ya ta bien, dende ANDECHA ASTUR queremos decir que ya basta de rise de nos, que tamos fartos de tantu vividor y fartón que solu piensa en si mesmu y nun nel porvenir del pueblu que lu voto, y al que representa, y por eso mos atopamos güei equí, y non notru llugar, equí y non na Llamuergal cellebrando nun se que cosa, nun se que fiesta de prau, comu si esta patria de nueso, comu si esti pueblu asturianu fartu de sofrir tantu despropósitu y tanta negación política de los sos representantes tuviera pa munches folixes, pa munches celebraciones

Equí y non en Xixón, cellebrando nun se que xunidá del nacionalismu asturianu, o ye que puede esistir un Bloque nacionalista nesti País en sin ANDECH ASTUR; comu se puede decir que se quier la unidá y facer les manifestaciones por separao, comu ye posible que mos quieran vender una realidá que nun ye tala, porque ye hora y momentu, esti de güei, pa esclariar dalgunes coses. L´añu anterior, de xuru que dalgunu s´alcordará, ficimos esta manifestación en xuntura cola IAS, y esti añu díbamos repetir, díbamos facer una manifestación en xuntura con tolos nacionaliegos, y cuala nun sedría la sorpresa de nueso, al enteranos, comu non, pola prensa de que ya tienen organizada una manifestación conxunta un tal BIA, que va aprovechar pa facer la so presentación pública, manifestación a la que nun fuimos convitaos, porque cenciellamente la única intención d´esta xuntura ye facer un bon xuegu a IU y presentase a unes elleiciones col finxu de resta-y votos a ANDECHA ASTUR, nuna pallabra una vegada más vamos a asistir al intentu de desfacer una organización que ya ta asitiada dafechamente n´Asturies, y con posibilidaes riales de sacar varios conceyales, ya tenemos una, cola esculpia d´una unidá que a naide interesa, y muncho menos a los sos promotores. Pero enquivoquense si camienten que mos van a desfacer, ya nos conocemos y sabemos de lo que semos capaces caún, nos seguiremos trabayando pa construyir una Asturies meyor, xunto al pueblu, en sin entelequies mentales nin grandes frases rimbombantes, solo col trabayu diariu ente la xente, el que quiera trabayar con nos sedrá bien recibíu, los que solo-yos pete estorbar, poner pilancos al procesu nacionalista que nun cunten con nos, nun tamos pa perder más tiempu, nin pa esperimentos a unos pocos meses de les, que raro, elleiciones, momentu ideal de xuntura pa los que na tienen que ufiertar pero a los que-yos encanta, cuandu menos figurar y vese reflexaos na prensa, comu másimu símbolu d´adoración personal.

Ye hora d´entamar a trabayar, en serio, pol nuesu futuru, y eso nun se fai nin nel chigre, nin en casa sentau delantre la televisión mientres mos siguen aculturando pa que mos sintamos menos asturianos y más, nun se sabe que, menos solidarios y más egoístes y consumidores de lo que mos den, seya esto bono o malo. Ye hora d´entamar a facer una Asturies meyor, más solidaria, más humana, un pueblu onde naide mos ñegue´l drechu a decidir por nos mesmos cual queremos que seya´l nuesu futuru, en sin imposiciones de fuera, siendo nosotros los asturianos y asturianes los que mos equivoquemos o los que acertemos coles nuestres decisiones, pero coles nuestres non coles de los demás, a los que pa enrriba importamos-yos un res.

Asturies tien futuru, pero tienlu siempre y cuando seya´l pueblu asturianu el que decida cual va ser esti futuru, y dende ANDECHA ASTUR semos conscientes de que nun esiste futuru pa esti Pueblu en sin el nacionalismu, en sin una organización nacionalista con puxu, con ganes de trabayar por llevantar a esti País, d´aportar idegues y de tar dimpuestos a sacrificar tiempu, trabayu y perres pa, xunto colos trabayadores d´esti País, ser capaces de facer una Asturies cuandu menos más asturiana, más digna, onde nun mos sintamos foriatos nel nuesu propiu País, nuna pallabra un País onde los asturianos y asturianes seyamos bramente llibres y esfrutemos d´un sistema dafechamente democráticu, onde tengamos la capacidá política rial pa decidir soberanamente lo que comu pueblu queramos ser, ú queramos dir, cómu y con quién.

Poro tamos güei equí, pa lluchar por esi futuru pol que naguamos, esi futuru que mos prestaría tener ya, pero pol que tendremos que trabayar enta munchu tiempu, nos, los homes y muyeres que militamos, que trabayamos xuníos n´andecha, comu´l nuesu nome indica, los que facemos posible qu´ANDECHA ASTUR seya lo que ye, tamos dimpuestos al sacrificiu, sobre tou porque creyemos nel, porque creyemos qu´esti País merez abondo más de lo que tien, y tamos dimpuestos a dar lo más de nosotros pa llograr algamalo. Nos tamos pola llabor de siguir lluchando por esi futuru nel que creyemos, ¿y tú? Si ye asina ya sabes onde mos tienes, si non, cuandu menos nun estorbes, dexa trabayar, nun critiques lo que tu seyas incapaz de facer. Daveres yo toi dafechamente convencíu de qu´As turies, anque a dalgunos-yos pese, tien futuru, y de qu´esi futuru pasa pol nacionalismu seriu, rial, d´ANDECHA ASTUR.

Anuncios
Esta entrada fue publicada en Andecha Astur. Guarda el enlace permanente.