Resolución del IV Alcuentru Nacional: Izquierda Asturiana y el BIA (2001)

A más de tres años de la constitución del Bloque de la Izquierda Asturiana (BIA), por parte de les organizaciones Izquierda Asturiana (IAS) y Izquierda Nacionaliega d’Asturies (INA), cola incorporación posterior del Partido Comunista de los Pueblos de España-Asturies (PCPE), y depués d’un procesu de debate internu de más d’un añu, el IV Alcuentru Nacional d’Izquierda Asturiana entiende que yá llegó’l momentu de tomar una decisión definitiva sobre la nuestra presencia nel mesmu.

Izquierda Asturiana apostó cola constitución del BIA por llevantar un movimientu sociopolíticu ampliu y de mínimos que fuere quien a axuntar a toles corrientes de la esquierda nacional baxo un programa común que supunxera una alternativa efectiva y creible al actual modelu políticu. La evolución esperimentada pol Bloque nestos tres años permítenos constatar qu’esi oxetivu nun s’algamó. Entamar un procesu de reorientación de la llínia política del BIA cola actual correlación de fuercies qu’hai dientro del mesmu implicaría unes lluches internes que namás valdríen pa xenerar resentimientu y rencores qu’hipotecaríen les posibilidaes d’una nueva converxencia cuando les condiciones lo permitieren. Si el preciu a pagar pola redefinición del BIA ye una reedición de les engarradielles que tantu dañu lleven faciendo a la esquierda nacionalista, Izquierda Asturiana prefier renunciar a intentalo.

Son munches les razones que fexeron que’l BIA nun se convirtiere na ferramienta d’acción política que nós queríemos. Izquierda Asturiana asume la parte de responsabilidá que-y toca por ello, y nun pretende entrar nuna dinámica de reproches y acusaciones. Cenciellamente, reconoz lo que ye evidente: esti nun ye’l Bloque pol que nós apostamos, y yá nun vemos posibilidaes de facer que lo seya.

En tou casu, Izquierda Asturiana nun fai una valoración totalmente negativa de la esperiencia unitaria d’estos tres años: reconoz lo qu’hubo de positivo nel valir mesmu de la unidá, empondera el llabor positivu desendolcáu en dellos conceyos y fai votos porque esi trabayu podia siguir rializándose.

Por too ello, el IV Alcuentru Nacional d’Izquierda Asturiana decide:

1º) La salida d’Izquierda Asturiana (IAS) del Bloque de la Izquierda Asturiana (BIA), que será efectiva dafechu en faciéndose la notificación oficial de la mesma a los restantes miembros del Bloque.

2º) Que la Dirección Nacional del partíu proceda, nel plazu de tiempu lo más breve posible, a dar los pasos llegales necesarios pa ceder la propiedá de les sigles BIA a les persones que’l propiu Bloque designe.

Al mesmu tiempu, el IV Alcuentru Nacional d’Izquierda Asturiana proclama:

1º) La so intención de nun entrar en polémica pública col BIA sobre la salida del partíu del mesmu.

2º) El so enfotu en caltener a INA como interlocutor privilexáu a la hora de buscar esi espaciu de converxencia tan necesariu, asina como la so voluntá de retomar un procesu unitariu, tanto con INA como con otres organizaciones, sectores y persones de la esquierda nacional, cuando les condiciones lo permitan.

Uviéu, 10 de payares de 2.001

Anuncios
Esta entrada fue publicada en IAS. Guarda el enlace permanente.