Unidá d’aición AA-PAS (2009-2010)

El PAS y Andecha Astur roblen un acuerdu coincidiendo col Día de la Nación Asturiana

06 de Setiembre de 2009

 Partíu Asturianista y Andecha Astur vienen de facer públicu un alcuerdu de collaboración ente les dos organizaciones basáu nel intercambiu d’información y na táutica de xunidá d’aición.

Mariu Arbesú (Andecha Astur) y Lluis Anxel Nuñez (Partíu Asturianista) roblaron l’acuerdu de xunidá d’aición ente les dos organizaciones nacionaliegues con un simbólicu apretón de manes.  L’alcuerdu espresa  “la voluntá de les dos partes de caltener una comunicación permanente, intercambiar información y buscar puntos d’analís políticu compartios sobre la rialidá d’Asturies asina como, a partir de los elementos de coincidencia, entamar iniciatives de trabayu conxuntu sobre problemátiques concretes dende’l respetu a los sos compromisos particulares y quedando dende’l entamu asegurada la soberanía de les organizaciones pa continuar coles sos dinámiques y actividaes propies.”

Pa Mariu Arbesú  “Esto ye una amuesa mui importante de voluntá d’entendimientu ente Andecha y el PAS. Andecha Astur fizo esta apuesta táutica y entama a dar resultaos pero queda munchu trabayu, paciencia y mano izquierda. Queremos que la sociedá asturiana perciba altravies de xestos como esti que son posibles y necesaries otres alternatives a la política destructiva del gobiernu PSOE-IU.

Andecha Astur y Partíu Asturianista píden-y al “Principado” la torna de la seleición asturiana absoluta de fútbol

01 de Avientu de 2009

D´igual mena encamiénten-y al Gobiernu asturianu la promoción de toles federaciones deportives asturianes y la defensa de la so oficialidá y reconocimientu internacional.

Andecha Astur y PAS nun comunicáu conxuntu remembren como dempués de 64 años ensin la participación de la nuesa selección de futbol, los partíos amistosos de 2000, 2001 y 2002 que tuvieron llugar en Uvieu, Xixón y Avilés respeutivamente amosaron el sofitu abrumaor del pueblu asturianu pa con la so seleción y supunxeron una fiesta deportiva y de vindicación identitaria. Dempues d´esitos talos la supresión de la seleción namái se pue pescanciar como una amuesa más de la política antiasturiana del gobiernu del PSOE ya IU, que na so estratexa de negación,  reprimen cualesquier manifestación d´identidá coleutiva del nuesu país.

Andecha y PAS consideren que ye momentu d´iguar esta situación y píden-y al Gobiernu del “Principado” que faiga les xestiones afayaices pa garantizar la torna  de la seleción  asturiana absoluta de fútbol, nel prósimu  mes d ´avientu   y .el so afitamientu como representante futbolísticu de los asturianos y asturianes.

Arriendes d´ello encamienten  la puesta en marcha de toles midíes  necesaries p´algamar la oficialidá  y  el reconocimientu internacional de toles federaciones deportives asturianes, oficialidá que conllevaría una induldable promoción y afalamientu del deporte asturianu y una mayor capacidá económica y de xestión.

Andecha Astur y PAS refuguen que barcos gallegos pesquen n’agües interiores asturianes

01 de Febreru de 2010

Les organizaciones polítiques Andecha Astur y Partíu Asturianista refuguen la posibilidá de qu’ente cincu y diez cerqueros gallegos pesquen nes agües interiores d’Asturies (les llendaes poles llínies imaxinaries que xunen los cabos del país), sumándose asina a la postura amosada estos díes por Rafael Rodríguez, presidente de los armadores de cercu asturianos, y Dimas García, de la Federación Asturiana de Cofradíes.

Los barcos del país vecín quieren pescar nes nueses agües interiores pa “garantizar la llegada a la rula de materia prima en cantidá abondo p’abastecer el mercáu”, pero los armadores de cercu asturianos (anguañu hai cuatru n’activu) refuguen tala posibilidá yá que los caladeros asturianos tan lloñe del so meyor momentu y afiten que’l desembarcu de más kilos de pescáu tendría comu consecuencia una baxada de los precios, yá de por sí ruinos.

Permitir esta primer entrada a los gallegos (que yá esquilmaron les sos propies agües)  lo que va suponer ye esquilmar les agues asturianes, y non sólo impedir el desendolque de la flota asturiana (d’alcuerdu a la demanda que se reconoz qu’esiste) sinon esaniciar lo poco que queda, al tener que competir colos gallegos y les sos téuniques esquilmaores.

Poro, Andecha Astur y Partíu Asturianista esixen a la Direición Xeneral de Pesca del “Principáu”, la entidá con competencies p’apurrir les llicencies que necesiten los armadores gallegos, que nun-yos permita faenar equí, atendiendo a les razones espuestes polos pescadores asturianos, igual que se fizo en 2008, cuandu, de la mesma manera, denegaron les llicencies a los barcos foriatos porque la flota llariega que pescaba n’agües interiores yera suficiente p’abastecer el mercáu del país.

Andecha y PAS quierem conseñar la responsabilidá política del “Principado” nel esanicu del seutor pesqueru asturianu destacando que nun se trata sólo de la so incompetencia na materia sinon del resultáu d’una planificación fecha a la escontra de los intereses d’Asturies dientru de la dinámica de sumisión del “Principado” a los intereses gallegos y a la política del Estáu español de desaniciu de los seutores económicos tradicionales n’Asturies y facer, pola contra, del nuesu país una provincia de xubilaos y camareros.

D’otra miente, Andecha Astur y Partíu Asturianista van a pidir a los Ayuntamientos d’Avilés y Colunga (los barcos de cercu asturianos que furrulen anguañu abellúguense nos puertos d’Avilés y Llastres) que se posicionen sol tema y asina presionen a la Direición Xeneral de Pesca, organismu dende’l que se tien de tomar un determín nos prósimos díes, tres aconceyase coles partes afeutaes.

Anuncios
Esta entrada fue publicada en Andecha Astur, PAS. Guarda el enlace permanente.