Izquierda Asturiana celebró el VI Alcuentru Nacional del partíu (2006)

L’otru 28 de xineru celebróse en Xixón el VI Alcuentru Nacional d’IAS, l’asamblea añal onde se fai balance del llabor partidariu, se desendolca la llinia política salida del congresu y s’elixe la nueva dirección. Nesti casu, tocaba facer balance dende’l V Alcuentru (mayu de 2004) tanto del llabor partidariu como de la situación política asturiana, asina como de les perspectives de trabayu pa los prósimos meses, col envís de celebrar el III congreso del partíu anantes de que fine l’añu.

Apurrimos equí a los llectores de http://www.ias.as los documentos esternos aprobaos na asamblea: un estractu del informe de la Dirección Nacional saliente y les cuatro resoluciones polítiques (sobre l’archivu de Salamanca, Navia-Eo, política ambiental y reforma estatutaria).

Ye de valorar mui positivamente’l tonu de los debates, yá que participaron nos mesmos la mayoría de los asistentes, habiendo una gran coincidencia política en toles intervenciones pero con una gran bayura de matices, que valió pa facer aportaciones mui arriquecedores.

P’acabar elixóse la nueva Dirección Nacional, que pasa a tar formada por siete persones fixes, más el representante de MIAS y ún por cada agrupación, que van actuar como vocales. A falta de completar el procesu poles agrupaciones, apurrimos equí la llista d’electos y la responsabilidá que van desendolcar:

Naciu Llope (Portavoz de la Dirección Nacional)

Iván C. Buznego (Secretaría de Prensa y Propaganda)

Llucía Fanjul (Secretaría Técnica)

Iván Huerga (Secretaría d’Acción Política)

Camilo Sousa (Secretaría d’Ayalguería)

Ana Tuero (Secretaría d’Organización)

Faustino Zapico (Secretaría de Formación política y

Relaciones esteriores)

Resolución aprebada nº1

SOBRE LA REFORMA DEL ESTATUTU D’AUTONOMÍA*
* Nota: Amás d’aprebar esta propuesta IAS decidió la creación d’un grupu de trabayu específicu pa desarrollala y matizala.

Nun momentu nel que paez que s’abre definitivamente la discusión sobre la reforma del estatutu d’autonomía nel nuesu país dende Izquierda Asturiana enetndemos que cualquier reforma tien de dir na llínia d’asitiar a Asturies como una nación ente les componen nesti momentu históricu l’estáu español, nun moementu nel qu’otros países van ver reconocíos esti estatus.

Nesi sen un estatutu de mínimos tendría d’asegurar los siguientes puntos:

1. Reconoce-y a Asturies la so entidá nacional al mesmu nivel qu’el restu de les naciones que formen l’estáu español.

2. Contemplar la posibilidá de convocar referendums y de disolver la Xunta Xeneral ensin restricciones.

3. Asegura-y a Asturies un modelu fiscal y financieru soberanu y que respuenda a les característiques demográfiques y poblacionales del país, teniendo en cuenta la delda histórica acumulada.

4. Algamar un techu competencial másimu, asumiendo les competencies qu’inda nun tán tresferíes, ye dicir, toles que’l marcu constitucional vixente anguaño nun acuta como propies del estáu y les que puedan esistir por reformes del marcu xurídicu-políticu d’equi n’alantre.

5. Declarar esplicitamente la oficialidá de la llingua asturiana del gallego-asturianu nel so ámbitu nos términos nos que se recueye esti derechu n’otros estatutos d’autonomía.

Una reforma estatutaria que nun atienda a estos preceptos nun diba ser otro qu’un llaváu de cara impuestu poles circunstancies del estáu pero que nun diba solucionar los problemes sociales, económicos y culturales del nuesu país. Izquierda Asturiana (IAS) entendería qu’un estatutu nel que se recoyeren los 5 puntos conseñaos supondría un verdaderu avance nel nuestru autogobiernu y nel camín hacia la soberanía efectiva.

Resolución aprebada nº2

SOBRE LA ZONA NAVIA-EO

La falta del estatus llegal d’oficialidá del asturianu y del gallego-asturiano, asina como d’una política cultural clara de reafirmación de la cultura y de les señes d’identidá asturianes en toa Asturies, y sobre manera nel territoriu comprendíu ente’l Navia y l’Eo, constituin una xida amañosa pa que ciertos sectores en Galicia tenten d’imponer polítiques actives n’Asturies teledirixíes dende Galicia, y inclusive la incorporación a Galicia de territorios que dende siempre foron una parte constituyente del nuesu país.

Especialmente preocupante resulta qu’estes propuestes se faigan per parte d’un partíu, el BNG que fai parte del gobiernu gallegu, nun momentu nel que paez que dende les instituciones del país vecín se multipliquen los intentos de fomentar la idea de qu’una parte d’Asturies ye culturalmente gallega o que pertenez a Asturies por una carambola del destín qu’allongó ciertos territorios d’un supuestu ámbitu natural. Esta visión respuende a una concepción esencialista del nacionalismu que nun tien xustificación nenguna nin histórica nin n’apoyu social nos territorios afectaos.

IAS camiéntase que ye especialmente importante remarcar que les tentatives d’imponer una política llingüística dende Galicia n’Asturies son graves, pero más grave entá ye l’ausencia d’un discursu y una política cultural pa la zona d’un partíu, el PSOE que fai dexación flagrante de la so obligación de defender la cultura del país na zona más occidental y nel restu d’Asturies.

Poro, dende IAS esixese al gobiernu y les instituciones defender ensin prexuicios nin ambiguedaes la cultura y identidá de la zona y fomentar económica y socialmente una zona secularmente escaecida, respetando, en tou casu, la palabra y los sentimientos de los habitantes que reivindiquen abiertamente la so asturianidá.

Resolución aprebada nº3

SOBRE LA DOCUMENTACIÓN ASTURIANA NEL ARCHIVU DE SALAMANCA

De la qu’entraron les tropes franquistes n’Asturies nel añu 1937 fueron incautaos y requisaos per parte de les fuercies golpistes a diferentes instituciones públiques y privaes asturianes. documentos, llibros y revistes y tol material tanto asturianu como d’otros territorios que nun fo convertíu en pasta de papel unvióse al Archivu de la Guerra Civil de Salamanca.

La documentación asturiana d’esti material historicu tien gran importancia. Nesi archivu esisten polo menos 742 caxes con documentos asturianos dende 1902 a 1937, perteneciendo gran parte de la documentación incautada pertenecía al Conseyu Soberanu d’Asturies y Llión, una institución que, poles circunstancies históriques del momentu asumió la representación del pueblu asturianu como depositariu tanto de la llegalidá democrática como de la soberanía y autogobiernu del país, lo que conlleva un gran valir simbólicu. Esta documentación asturiano incauto yá ta microfilmao na so práctica totalidá, polo que’l llugar físicu nel que s’atope nun esclúi la posibilidá de copia y de ser consultada en Salamanca o cualisquier otru llugar.

Per otru llau, el Reinu d’España ratificó (9 de xunu de 1960) el Conveniu Internacional de La Haya sobre Protección de Bienes Culturales en Casu de Conflictu Armáu (14 de mayu de 1954), que defende la inmunidá de los bienes y el derechu de la so salvaguarda énte cualisquier tipu de requisa o d’apropiación, seyan los conflictos internacionales o non. Igualmente’l Conseyu Internacional d’Archivos, adscritu a la UNESCO, manifestóse yá bien de veces no relativo al derechu de los lexítimos propietarios a desixir la restitución de la documentación oxetu d’espoliu o substracción por motivu de conflictu bélicu (Resolución 46/10 de l’Asamblea Xeneral de la ONU, 1991).

Izquierda Asturiana (IAS) entiende que la vuelta de la documentación sustraída al Conseyu Soberanu d’Asturies y Llión constitúi una lexítima aspiración col oxetivu de normalizar l’anómala situación producida cuando la Guerra, nun habiendo xustificación pa siguir en tiempu de paz les actuaciones d’un actu de guerra.

Poro, dende Izquierda Asturiana (IAS) solicitase al Gobiernu del Principáu d’Asturies, como depositariu de la lexitimidá democrática y de la voluntá d’autogobiernu del pueblu asturianu que nel so momentu representó’l Conseyu Soberanu, a reclamar un procesu de negociación asemeyáu al entamáu con Cataluña pa la restitución de la documentación asturiana esistente nel Archivu Históricu de Salamanca y que fo espoliáu a les autoridaes asturianes del momentu. Igualmente IAS alcuerda instar al Gobiernu del Principáu d’Asturies a que promueva la criación d’un Muséu Históricu del Pueblo Asturianu nel que s’incluya de forma digna pal so conocimientu y consulta dicha documentación.

Resolución aprebada nº4

SOBRE POLÍTICA AMBIENTAL

Izquierda Asturiana (IAS) como suxetu políticu que tien de dar cuenta de la realidá d’un tiempu y un llugar cola voluntá de tresformar les rellaciones sociales y del pueblu col mediu, entiendo que tien d’exercer la denuncia permanente de la perversión del mediu natural, y ello por delles razones:

Ello ye que vivimos nun momentu críticu de la historia de la humanidá. Nun momentu nel que l’equilibriu natural ta argayando pola aición de los seres humanos. Pero pa nun cayer nel humanismu filosóficu, digamos que IAS entiende que les rellaciones de producción actuales, nuna economía globalizada no mercantil, onde el poder económicu ye cada vez más concentráu y oligopólicu, dicten una dinámica depredadora del mediu natural, al que traten como mera mercancía pal beneficiu. La economía capitalista de mercáu siempre lo fexo, el problema actual ye que la grandísima acumulación de capitales y el pesu de lo especulativo sobre la racionalidá productiva tien efectos a dos niveles:

-Per un llau, subvierte les propies regles tradicionales del mercáu en función de la especulación pura y rápida, frutu del fluxu globalizáu de capitales, arrasando colos mecanismos correctores qu’a nivel local poníen la racionalidá y la tradición.

-Pel otru, les propies dimensiones qu’algamó la maquinaria productiva, al concentrase en poques manes, ponen en xuegu un sistema económicu que tien escala planetaria y que, por definición, tien que medrar ad infinitum porque esa ye la so naturaleza.

Como tol mundu sabe, los recursos, anque pa la lóxica capitalista seyan infinitos, na realidá nun lo son. Nun son infinites les fontes de enerxía fósiles o los metales, pero –y esto ye la clave- tampoco lo ye’l suelu pa plantar, nin el suelu pa construyir, nin el suelu pa pisar, nin l’agua disponible, nin l’horizonte dende la ventana de caún. Pa IAS esto tien de ser una cuestión de planteamientu económicu y social, pero tamién y siacasu tan importante como ello ye’l planteamientu étnicu que supón el compromisu históricu y de comunidá cola tierra que mos tocó.

Nel casu concretu d’Asturies, vivimos nun sistema onde el valor de les coses ta artificialmente impuestu por un sistema irracional y suicida dafechu, que obedez les sos propies lleis ensin mirar pa la tierra onde pisa. La falta de mecanismos propios pa correxir dende planteamientos culturales la depredación absoluta (pa falar concretamente, la falta d’una élite económica con “proyectu de país” y la asunción del liderazgu económicu dende sectores ayenos o alienaos nel españolismu tradicional o contemporáneu) agrava les coses: La estroza ye mui acelerada y garra velocidá hasta facela aparentemente imparable y intocable.

Pero la sociedá asturiana nun percibe esta amenaza con claridá, por tar educada –como sociedá post-agraria- nunos valores que totemicen “el progresu” y condenen el sistema autosuficiente de la sociedá agraria tradicional. Ello ye asina tamién y esto ye importante pa nós, pol planteamientu de la izquierda institucional (representada pola FSA-PSOE y PCE-IU básicamente) pero tamién polos sindicatos). A pesar de la vieya tradición federalista n’Asturies d’a primeros del sieglu XX, esta izquierda tradicional ye históricamente fiya d’una filosofía positivista y desarrollista y tovía nun fue pa facer la dixestión de la posmodernidá. Podía dicise que ye una secta del pior marxismu filosóficu. Los valores y sistemes económicos y culturales de les comunidaes asturianes tradicionales fueron y son, continuamente machacaes y despreciaes, educaes nel autoodiu. Con too ello, el caldu de cultivu ta servíu y l’argayu globalizador conviértese nuna combinación esplosiva que ta arramplando absolutamente con tolo que fai esti país un sitiu habitable económicamente, socialmente, éticamente, culturalmente… ta acabando incluso cola memoria de lo que somos, cola historia, cola llingua, col paisaxe, cola manera de ser; en resultes: cola identidá. Pero precisamente la identidá, por ser un pilancu pa la marea globalizadora capitalista y un pilancu pa la velea “progresista” de los xestores del desastre, tien de ser pa nós una exa fundamental.

Pa IAS ta claro, dende la so fundación, que’l trabayu na defensa del mediu natural nun ye una estratexa, sinón parte esencial de la so llucha global y la existencia de la organización. En resume, propongo que IAS trabaye na llucha ambiental dende estos principios:

• Cuestionando la necesidá de los usos del suelu pa actividaes non reversibles y especulativos: vivienda, campos de golf, suelu industrial ensin planificar, tresporte y xeneración d’enerxía. Cualquier usu non reversible del suelu tien de tar debidamente xustificáu nel bien común y nos intereses económicos del país. Pa IAS, el asturianu, como pa cualquier indíxena tien de facer suyu el principiu de que “el suelu ye sagráu. Nesti sen, hai que reivindicar el carácter éticu del derechu al paisaxe y a la tresmisión xeneracional del mediu.

• Esixendo control y planificación públicos (y populares) sobre les subvenciones pa infraestructures.

• Definiendo los mecanismos de sostenibilidá dende presupuestos autóctonos, faciendo un esfuerzu por comprender y ser parte d’usos tradicionales y proponiendo polítiques productives modernes non agresives, que fixen población y seyan comprensibles pa la xente.

• Denunciando la política de producción enerxética impulsada polos poderes públicos asturianos como falseada, ayena a los intereses de la xente, mala pal país, mala pal mediu ambiente, mala pa la salú y abiertamente colonialista, por nun xenerar valor añadíu y sí grandes beneficios que nun repercuten en trabayu, renta nin calidá de vida.

• Denunciando la rede clientelar y mafiosa que ta “vendiendo” lo que nun ye d’ellos sinon “de toos” enayenando recursos nuna hipoteca pal futuru. Nesti sen nun mos tien de cayer embaxo el papel de les alministraciones municipales, verdaderes correes de tresmisión de la especulación. Hai que garantizar la autosuficiencia financiera de les mésmes y puxar por esparder la idea de los presupuestos participativos. Hai que aneciar na idea de la xestión ética. El políticu ye un xestor “de pasu” y nun ye quien pa disponer del bien común.

• Aneciar na idea de la sostenibilidá ensin cayer en demagoxes ambientalistes incomprensibles pa la xente, pero dende una concepción integral. Dando exemplu personal y ensin facer escepciones por populismu.

• Trabayando con y dende movimientos sociales y ciudadanos que comparten estos principios o dellos, ensin sectarismu nin partidismu, pero dexando claro que lo nuestro ye un compromisu políticu que ye parte integral del nuestru proyectu de país.

• Trabayando con tolos medios llegales que permite el marcu estatal y comunitariu y combinándolos cola aición directa.

• Faciendo por esparder estos principios nes comunidaes asturianes nun llinguaxe asequible pa implicar a sectores amplios y ser pa tornar situaciones d’agresión. Esto al mesmu tiempu xenera llazos sociales y d’autoconfianza nes propies comunidaes; esto ye: Fai País.

Anuncios
Esta entrada fue publicada en IAS. Guarda el enlace permanente.