Bases Constituyentes d’Izquierda Asturiana (aprobaes nel I Congresu, xineru de 1.995)

ENTAMU.

Asturies vive nesti momentu nuna dómina importantísima pal so futuru. El negru presente de crisis xeneral en toles fasteres de la vida del nuestru país (económica, social, política, cultural…) asina como les bien poco prestoses llinies xenerales del Nuevu Orde Internacional, faen camentar a daquién que tamos viviendo un auténticu “finis Asturiae” cuasi apocalípticu y ensin salida posible.

Énte esa revesosa situación, un grupu de ciudadanos y ciudadanes d’Asturies, exercitando la nuestra condición de talos, reivindicamos el derechu a nun ser simples espectadores de la nuestra vida colectiva. Teniéndonos por asturianos y asturianes anantes que d’otru ámbitu, talantamos Asturies como’l marcu dende’l que facer un llabor políticu qu’afite a esti pueblu nun planu d’igualdá y respetu con tolos pueblos del mundu, dende’l comecimientu de qu’ha de ser la xente que vive del so trabayu lo protagonista de la tresformación social que lo faga autor de la so propia historia, y tamién dende’l comencimientu de qu’esa tresformación pasa necesariamente pela dignificación de la propia identidá como pueblu, que ta nun llaceriosu procesu d’esborriamientu. Esta realidá ye la que mos fai conscientes de la necesidá d’una IZQUIERDA ASTURIANA.

Paezmos qu’oxetivos talos como’l derechu d’autodeterminación permanente, esto ye, l’exerciciu continu de la soberanía nacional; la construcción d’un socialismu democráticu que recueya, nun exerciciu de síntesis, los tradicionales valores solidarios del pueblu asturianu colos universales del socialismu; una concepción ecolóxica de la sociedá, dende una perspectiva global non antropocéntrica y qu’armonice les necesidaes d’un desenrollu económicu sostenible col caltenimientu del ecosistema; la defensa a ultranza de tolos derechos humanos, denunciando tanto les sos vulneraciones como les causes de les mesmes; el trabayu na solidariedá ente los pueblos, la dignificación de la nuestra cultura, y el puxar por una nueva ética política y l’espardimientu de los valores democráticos y solidarios, son los pegollos fundamentales sobre los qu’iguar una alternativa global al actual estáu de coses.

La voluntá d’estructurar alredor de bases afitaes a la mayoría social d’izquierdes d’esti país; l’enfotu de dignificar al conxuntu de los nuestros paisanos y paisanes a la categoría de ciudadanos y ciudadanes integrales, y non meros consumidores nel mercáu publicitariu de l’alta política, llévamos a puxar por una izquierda ilusionante y d’amplia capacidá movilizadora: socialista, adogmática y non mesiánica. Una izquierda que seya a interpretar el mundu dende la nuestra realidá. Una izquierda que sofite la cultura y respete l’ecosistema. Una izquierda, en fin, fondamente asturiana y, precisamente por eso, auténticamente internacionalista.

Pensamos que la espresión más perfecha d’esi proyectu tien de ser un partíu, una contrucción colectiva síntesis de los enfotos y aspiraciones individuales, y que globalice les estremaes reivindicaciones sectoriales y plantegue alternatives no xeneral y no concreto. Pero nun queremos un partíu-máquina, que coarte, o suplante, la llibre espresión de les persones, sinon un partíu-ferramienta pa la tresformación social y non un fin en sí mesmu. Nun queremos qu’IZQUIERDA ASTURIANA tenga el poder, sinón que seya’l preséu col que’l pueblu asturianu exercite el so poder, güei secuestráu poles maquinaries partitocrátiques y tou tipu de minoríes oligárquiques. En definitiva, creemos que la única manera de construyir una democracia nel sen más auténticu del términu ye fortaleciendo la sociedá civil, talantada ésta como la suma de toos y caún de los ciudadanos y ciudadanes que viven del so trabayu, pues pensamos que l’interés del pueblu ye l’interés xeneral, mentres que l’interés de les minoríes oligárquiques ye siempre l’interés particular.

A más d’ún abultaran-y los nuestros plantegamientos como alloñaos de la realidá. A lo llargo la historia, acusóse una y otra vez d’utópicu a tou aquel que quería camudar la sociedá. Mas, yá fuere ceo o sero, la sociedá acababa por camudase. Eso amuesa que la historia nun ye solo una riestra d’acontecimientos ún detrás d’otru; ye un procesu, resultáu d’una actividá consciente, y la nuestra voluntá ye la d’actuar colectivamente pa qu’esi procesu vaiga empobináu hacia un futuru de mayor xusticia y llibertá. Con esi pruyimientu constituyímonos n’IZQUIERDA ASTURIANA y asoleyamos a la opinión pública les Propuestes Constituyentes que vienen darréu.

I. El proyectu socialista democráticu d’Izquierda Asturiana.

                LES FONTES DEL PENSAMIENTU D’IZQUIERDA ASTURIANA.

1. La llucha pola constitución de la Nación Asturiana, la conquista de la soberanía nacional y la construcción de la democracia tan inevitablemente xuníes a la llucha pola incorporación del país a les fuercies que tán güei pola causa de la llibertá y el progresu social.

IZQUIERDA ASTURIANA (IAS), como preséu de tresformación social que ye, y, en tanto qu’obra colectiva dende una filosofía determinada, resultáu del pensamientu y los raigaños históricos que-y dieron orixe, basa’l so discursu políticu nes estremaes fontes del pensamientu qu’organicen güei lo que se entiende xenéricamente como la izquierda política. Somos un partíu abiertu porque nun tamos comprometíos nin con antiguos nin nuevos o futuros partíos-guía o países-paraísu, y porque reconocemos y analizamos el valir de toles aportaciones que se fixeren, dende cualisquier posición, y independientemente de que trunfaren o non, en favor de la emancipación de los pueblos. Estes aportaciones concrétense, pa nós, nel pensamientu racionalista ilustráu, los movimientos populares presocialistes, les lluches revolucionaries de los sieglos XIX y XX y el pensamientu ecoloxista y les reflexones de los nuevos movimientos sociales.

2. Reconocemos de los ilustraos y del legáu de les revoluciones burgueses l’aniciu de la concepción de la democracia moderna, el conceptu de ciudadanu, la declaración universal de los derechos de la persona y la demostración empírica de que nun hai un orde social inmutable nin eternu, especialmente cuando esi orde ta asitiáu na arbitrariedá y la inxusticia. Rousseau, Sieyes, Marat o Robespierre, con tolos sos errores y aciertos, son patrimoniu de tola xente enfotao na llucha poles llibertaes individuales y colectives.

Analizamos críticamente la evolución del pensamientu lliberal al democráticu-burgués, y la llucha constante por da-y conteníu a eses declaraciones de derechos de la persona. Al empar, valoramos positivamente la introducción del racionalismu como pegollu fundamental de toa teoría política. Precísamente por eso, refugamos del idealismu y de cualisquier concepción esencialista o mecanicista de la historia de les sociedaes. Entendemos al sistema lliberal como un modelu políticu a superar col oxetivu de construyir una sociedá que seya a combinar la democracia política cola democracia económica. Reclamánonos del pensamientu del rexeneracionismu asturianu de Xovellanos y valoramos les aportaciones federalistes de Pi i Margall, que xunen la idega d’autodeterminación individual como persona cola d’autodeterminación colectiva como integrantes d’una comunidá humana.

3. Recoyemos de les lluches populares del Vieyu Réxime (movimientos campesinos antifeudales, herexíes socializantes…) y de los movimientos emancipadores non específicamente socialistes -nel sen modernu del términu- de la dómina contemporánea (babuvismu, socialismos utópicos, socialismos agrarios, movimientu llibertariu) la so fe dafechu nos individuos y nel futuru y la so llucha incondicional escontra cualisquier mena de primición. De los “socialismos arcaicos”, de base campesina, reconocemos la so voluntá d’algamar una sociedá democrática basada nes estructures sociales cornuñalistes.

4. La nuestra filosofía política presenta fondes influencies de los acontecimientos revolucionarios de la dómina contemporánea. Son, fundamentalmente, los movimientos y revoluciones socialistes, les lluches anticoloniales y los movimientos de lliberación nacional. Paezmos indispensable pa construyir güei una izquierda emancipadora l’análisis críticu del legáu políticu y teóricu de les revoluciones socialistes, que tienen el so aniciu na Comuña de París y na Revolución de los soviets de’l917, y los sos continuadores políticos nes tradiciones revolucionaries surdíes de la II y III Internacional, asina como nes lluches, a lo llargo del sieglu pasáu, del movimientu obreru y popular. Entendemos al marxismu como un métodu d’análisis fundamental, tovía ensin superar, pa caltriar les formes de primición y alienación inherentes al sistema capitalista.

Como partíu de lliberación nacional que somos, nun podemos escaecer les aportaciones a la emancipación de los pueblos de les lluches anticoloniales d’Asia, África y América, que depués de la Segunda Guerra Mundial xeneraron toa una riestra de guerres campesines escontra la dominacion feudal y eurocolonial o neocolonial. De toes maneres, la llucha escontra la dominación nacional nun ta solo reducida al ámbitu tercermundista. El nuestru proyectu ye permeable a les lluches nacional-lliberadores que medraron a lo llargo del sieglu XX en toa Europa y l’América industrial, y que conocen dos españíos fundamentales: nos principios del sieglu, sobre too depués de la Primera Guerra Mundial (dixebra de los Imperios austriacu y turcu, independencia d’Irlanda y autodeterminación de los pueblos del Imperiu Rusu) y dende los años 60 (Quebec, Euskadi, Córcega, Chipre…). D’esta riestra d’acontecimientos nun podemos escaecer la llucha antifacista de los pueblos d’Europa na segunda Guerra Mundial.

N’Asturies, la nuestra tradición revolucionaria ta fondamente condicionada pol puxu que’l socialismu algamó nel nuestru país dende finales del sieglu XIX, de la mano d’homes como Francisco Cadavieco, Eduardo Varela o Manuel Vixil Montoto, asina como Isidoro Acevedo, fundador de la FSA y, venti años depués, del PC n’Asturies. Les lluches sindicales y polítiques de les primeres décades, la Revolución d’Ochobre de’l934, primer casu conocíu de procesu revolucionariu socialista de vanguardia compartida, la guerra civil o la llucha antifranquista son patrimoniu común de tolos demócrates y xente d’izquierda, d’Asturies y del mundu. Persones como’l socialista González Peña, el comunista Carlos Vega o l’anarquista Higinio Carrocera nun pueden nin deben ser reducíos a oxetos de cultu esclusivista de tala o cuala tradición emancipadora, sinón que tán inscritos na llarga riestra de persones y acontecimientos de la llucha pola lliberación de los pueblos.

IZQUIERDA ASTURIANA reclámase como una modesta heredera más de tou esi patrimoniu común de la causa de la llibertá y la xusticia.

5. IAS ta tarnién abierta a les aportaciones de los nuevos movimientos sociales que crecen na Europa Occidental dende la década de los 60. Les lluches estudiantiles escontra la dictadura franquista, la guerra del Vietnam o los movimientos antirracistes demostraron como amplísimos sectores de la intelectualidá y les capes medies yeren claramente incorporables a procesos lliberadores más amplios. D’esta dómina surden los movimientos pacifistes y antimilitaristes, resultáu de la guerra fría, l’espardimientu de la conciencia solidaria, el resurdimientu de la llucha pola emancipación de la muyer, de les cultures minorizaes y el movimientu ecoloxista. Esti últimu tien una especial importancia nel actual contestu internacional d’esborriamientu progresivu de la Naturaleza, y les sos reflexones, xunto coles de los otros movimientos sociales, llenen de conteníu y contribúin a torgar la dogmatización o interpretación mecanicista del pensamientu socialista. De toes maneres, nun iguamos coles interpretaciones que tienden a la reconstrucción de la izquierda colos nuevos movimientos sociales como úniques referencies polítiques, pues esos movimientos puen nun cuestionar, en sí mesmos, el conxuntu del sistema, sinón solo dellos efectos del mesmu (discriminación racial o cultural, l’amenorgamientu de la muyer o l’esfarrape del ecosisterna), colo que, si nun tán enartaos nun proyectu lliberador global, tienden a ser asimilaos pol propiu sistema y a volvese inofensivos, viéndose esto claramente na institucionalización d’un ciertu ecoloxismu o feminismu, presentaos como la interpretación más razonable y moderada de los mesmos, y quedando el so sector más combativu y militante arrequexáu y vistu delantre la opinión pública como una minoría masimalista y alloñada de la realidá.

LA RECONSTRUCCIÓN DEL DISCURSU DE LA IZQUIERDA

                6. El socialismu atopó una metodoloxía con Marx y Engels. El marxismu ye una síntesis teórica de la llucha de la clase trabayadora pola so lliberación, guía pa la so acción consciente, esto ye, pa la construcción poles persones de la so propia historia. Nesi sen ye tamién una filosofía de la praxis y tien delles dimensiones: ye visión del mundu y métodu revolucionariu, programa políticu y códigu éticu. Implica una concepción materialista del mundu opuesta al idealismu y a la metafísica. Una visión llibre de concepciones ideolóxiques y basada na observación de los fenómenos del mundu real. Poro, nun inventa la realidá; interprétala.

7. El marxismu ye una teoría, non una ideoloxía. Cuando Marx y Engels entamaron a ellaborar les sos teoríes refugaron tou plantegamientu que se basare nuna idega preconcebida. Ye la realidá material la qu’esiste y a curtiu plazu nun puede ser pescanciada. Solo cola observación a llargu plazu pueden adivinase les sos lleis xenerales. Asina, el marxismu nun ye la comprensión estética y global del mundu, sinón una metodoloxía pa desplicalu. Les idioloxíes son apriorístiques y dogmátiques, y con ello pasen a ser falsa conciencia de la realidá, un discursu destináu a tapecer una situación de primición y inxusticia. L’actual crisis del marxismu ye’l resultáu de la so conversión, nos países del nomáu socialismu real n’ideoloxía oficial, esto ye, nun discursu dogmáticu qu’intentaba tapecer l’alienación de la revolución y la llucha de clases neses sociedaes.

8. La filosofía marxista axunta per primera vez na historia del pensamientu una concepción materialista de la Naturaleza, la sociedá, la historia y l’home col métodu dialécticu pa interpretar y asina tresformar la realidá. Con Marx y Engels, la teoría y el métodu interrelaciónense dafechu. El materialismu dialécticu ye una teoría y un métodu en construcción y autoconstrucción permanente: interpretando al mundu tresfórmase y tresformando al mundu, interprétase y realízase a sí mesmu.

El materialismu históricu ye una teoría y un métodu pal análisis de la sociedá que se sofita nos estudios de les ciencies sociales particulares; estos estudios son averamientos a la verdá oxetiva que van siendo afondaos y/o sustituyíos polos resultaos de nueves investigaciones que s’incorporen como aporte a la síntesis del materialismu históricu. Esti métodu, que podríemos nomar científicu, foi lo que fexo da-y al socialismu marxista esi axetivu del que s’abusó tanto y que sirvió pa xustificar la so dogmatización y ideoloxización. Pero esi mesmu métodu demuéstranos que la conciencia ta determinada pol ser social y que nun ye más qu’un aspectu del devenir social, colo que toa verdá nun ye nunca absoluta, sinón relativa; y nun ye nunca abstracta, sinón concreta.

9. Dende’l so nacimientu, la teoría marxista nun solo quixo ser el preséu teóricu de la clase trabayadora na so llucha pola emancipación, sinón qu’ún de los mayores enfotos de los sos fundadores foi que la propia clase trabayadora fuere l’arma material de la so realización como teoría revolucionaria. Asina, a la teoría y al métodu améstase’l factor suxetivu, la voluntá colectiva, la llucha de la persona, como condición pa midir la propia capacidá analítica y tresformadora de la realidá del propiu marxismu. La historia ye asina l’escenariu d’esi alcuentru y la praxis el camín a percurrir. El marxismu ye asina tamién una praxis alimentada pola propia historia. Y ye tamién una praxis d’idegues. Al traviés del discutiniu, la crítica, l’alderique, enriquez la cultura contemporánia y al mesmu tiempu apaez como una teoría abierta y susceptible d’incorporar nuevos elementos. Nun espoxiga como pensamientu francedor cola historia de les idegues, sinón como una continuidá de la mesma nuna nueva síntesis teórica partiendo de les sos interpretaciones y aportes.

10. Nestos tiempos de crisis del pensamientu marxista surde la dulda de si l’actual espoxigue científicu confirma o non les sos tesis. Pero la cuestión nun ye esa. Marx y Engels nunca nun se plantegaron atopar nes ciencies naturales la confirmación de les sos teoríes filosófiques, socioeconómiques y polítiques; por contra, queríen conocer, al traviés de les ciencies, el comportamientu dialécticu de la Naturaleza. Les conclusiones podrán o non camudase. El métodu sigue vixente.

11. Recuperar asina la capacidá crítica del marxismu pa repensase y tresformase a sí mesmu, ye noyu fundamental de tou proyectu qu’aspire a llevantar la bandera d’un socialismu superador de dogmes y verdaes absolutes. Pa ello ye indispensable analizar críticamente la teoría y la praxis socialistes a lo llargo tola so historia, los sos aciertos y errores, pa ser a camudar tou esi legáu teóricu y políticu nun preséu de tresformación de la realidá.

                12. Marx y Engels tuvieron el méritu descomanáu d’asoleyar les lleis inherentes al modu de producción capitalista y da-y a la clase trabayadora una estratexa de poder resumida na conseña de conquista de la hexemonía. Tamién aceleraron col so llabor políticu, el procesu de constitución d’esta clase en proyectos políticos autónomos. En llínies xenerales, podemos dicir que punxeron los pegollos de la filosofía que los sos continuadores hubieron de facer espolletar.

Nos anicios del sieglu XX, Lenin foi a interpretar el cambeu del capitalisrnu hacia la so etapa imperialista. Al mesmu tiempu, tuvo la gran capacidá d’afayar el marxismu a les condiciones específiques del Imperiu Rusu, nun momentu históricu concretu, ellaborar una táctica revolucionaria de toma del poder y conducir con ésitu un procesu insurreccional, la Revolución d’ochobre de 1.917, que concretó les posibilidaes del socialismu y marcó l’aniciu d’una nueva dómina na historia de la llucha los pueblos.

13. Na so llucha por afitase y desndolcase como teoría del cambiu históricu, el marxismu esperimentó deformaciones y tracamundios, y tamién aportes enforma importantes y interpretaciones orixinales.

Ente los tracamundios nun iguamos col reformismu, qu’intenta tapecer el so calter tresformador y reducilu a ura filosofía positivista y alloñada de la praxis, col oxetivu de xustificar polítiques conciliadores que nun solo nun tienden a revolucionar el sistema sinón a afitalu. Ye esi’l papel xugáu pola socialdemocracia y tola riestra de recién conversos al lliberalismu. Al mesmu tiempu, manifestamos la nuestra oposición al dogmatismu, visión esquemática y mecanicista que xeneraliza pal conxuntu de realidaes y esperiencies un mesmu programa y una mesma estratexa, pretendiendo universalizar les contradicciones específiques d’un ámbitu. Con esa concepción de socialismu esportable tien muncho que ver tol abanicu políticu de la izquierda enllantada n’Asturies y subordinada a estratexes estatales non alcordes cola realidá asturiana.

Ente les aportaciones y interpretaciones orixinales del marxismu sulliñamos, ensin enfotu d’apurrir equí una riestra completa, nin amenorgar a naide pola so esclusión, delles de les que más mos puean servir güei pa la interpretación de la nuestra realidá nacional asturiana: valoramos los intentos de Gramsci y Togliatti por adaptar la teoría y la llucha pol socialismu y la democracia a les sociedaes del capitalismu avanzáu; los interesantísimos estudios de Mariátegui sobre’l papel de les estructures democrátiques comuñalistes na construcción del socialismu, asina como’l valir del mitu, dándo-y un conteníu social y nacional; l’exemplu moral d’Allende, asina como la concepción pluralista y democrática de la revolución chilena; pudiéremos siguir cuasi indefinidamente. Valga namás que con estos pocos nomes p’amuesar que talantamos al socialismu como un proyectu inacabáu nel tarrén teóricu y tovía por entamar como esperiencia política.

14. Nes condiciones concretes del momentu que mos toca vivir, momentu de crisis económica y ecolóxica, de reforzamientu de les contradicciones interimperialistes, resultáu del Nuevu Orde Mundial, afondamientu del fosu ente Norte y Sur y de diversificación y mayor complexidá de les esperiencies nacionales de la izquierda, el marxismu atópase nun momentu de gran debilidá

Fáise necesario estremar los conceptos de crisis del marxismu y crisis del socialismu. El marxisrnu ye ura filosofía y un métodu. El socialismu, un proyectu de sociedá, y en tantu qu’un proyectu tovía por realizar, nun ye dable una crisis en dalgo inesistente. Pero’l marxismu, en tantu que teoría dialéctica, precisa d’un desendolque permanente y si esi desendolque se detién, ye lóxico qu’entre en crisis. Yá que’l so oxetu d’estudiu ye la historia de les sociedaes, precisa nuevos preseos pa interpretar les nueves realidaes y, cuando eso nun se fae, ye una ferramienta inútil.

Poro, nun tán en crisis nin la so basa materialista y dialéctica, nin los sos suxetos históricos, pero sí munches de les formulaciones surdíes nos momentos previos de les esperiencies revolucionaries, asina como les sos deformaciones y distorsiones.

Asistimos a una crisis terminal de los plantegamientos ideolóxicos del dogmatismu que no político cuayó na tesis de los modelos únicos y partíos guía, nel monolitismu y que nun foi a interpretar nin solucionar acertadamente cuestiones como la conquista del poder, el papel de la vanguardia, la interpretación totalitaria del conceptu de dictadura del proletariáu, les fases de la transición al socialismu o la identificación mecánica de la praxis internacionalista cola política esterior de talu o cualu Estáu presuntamente modélicu. La crisis del dogmatismu nun ye solo teórica, sinón tamién política y organizativa, yá que la so aplicación práctica nos países del socialismu real recién amuesó’l so fracasu históricu, y ta llevando a los sos últimos defensores al naufraxu.

Al mesmu tiempu que’l dogmatismu, la socialdemocracia tamién esperimenta la so propia escayencia. L’acabu del socialismu real sirvió p’asoleyar les contradicciones d’un proyectu que se presentaba a sí mesmu como’l socialismu democráticu y que, nin construyó’l socialismu nos países nos que llegó al poder, nin pretendió facelo. El so papel consistió en desendolcar les polítiques neolliberales y antipopulares d’axuste duru en tiempu de crisis que los gobiernos conservadores nun s’atrevíen a facer. Predicando la paz social nos momentos d’espoxigue económicu, y faciendo polítiques reaccionaries nos momentos de crisis, el so papel nun foi progresivu, sinón claramente regresivu. Nin siquiera nos países del capitalismu avanzáu, onde hai más riqueza pa repartir, tien la socialdemocracia el futuru aseguráu. Más bien tolo contrario: la crisis económica ta faciendo a los gobiernos occidentales esaniciar l’Estáu del bienestar construyíu décades atrás, y la so corrupción moral ta llevando a una situación llaceriosa a los partíos socialdemócrates chiscaos pol lladrociniu institucional. Nin nes formes, nin nos conteníos, representa la socialdemocracia al socialismu, y, cada vez menos, a la propia democracia.

15. Ante esa situación, y partiendo de que les idegues son invencibles mentanto nun camuden les condiciones sociales que les enxendraron, y que’l marxismu nun ye solo una metodoloxía pa desplicar la historia, sinón, y principalmente, pa facela, plantégase la necesidá d’un desendolque teóricu y prácticu nuevu que supere la fosilización del marxismu y renueve teórica y metodolóxicamente al socialismu. Esti procesu yá ta faciéndose n’otres partes del mundu y IZQUIERDA ASTURIANA vese como integrante del mesmu. Los sos trazos principales son:

15.1. La redefinición y actualización de les tesis sobre l’Estáu y la democracia intentando atopar la mena más afayadiza d’exercitar la hexemonía popular al traviés de les estremaes formes d’autogobiernu que recueyan y puxen poles tradiciones de democracia directa que nacen de la esperiencia cotidiana de los y les productores o son el resultáu de la esperiencia histórico-cultural específica de cada marcu nacional.

15.2. La revalorización de los mecanismos de sufraxu universal y d’estructuración de la soberanía popular caltriándolos como una función social y non solo como derechos individuales que s’exercen cada ciertu timpu.

15.3. El reconocimientu del final del monolitismu y del modelu únicu de socialismu, asina como la valoración crítica de les estremaes esperiencies nacionales.

15.4. La construcción de nueves formes de relación y coordinación a nivel internacional de los partíos y organizaciones de la izquierda tresformadora, partiendo de la propia soberania, la igualdá y el respetu.

15.5. La constatación de que’l pensamientu marxista ye daqué abierto al discutiniu y a les aportaciones de los nuevos movimientos sociales y esperiencies resultantes de les mutaciones esperimentaes poles sociedaes capitalistes.

Esti procesu de renovación caltién viva la idega de la necesidá del usu permanente del arma de la crítica. La nuestra concepción de la crítica supón la superación de conceptos y definiciones yá perpasaos pola historia nuna síntesis superior no que cinca a la so capacidá de retratar y analizar la realidá presente. Ye esa la razón de la vixencia de la metodoloxía leninista del análisis concretu de la realidá concreta, o la reivindicación d’un desenrollu independiente del marxismu atendiendo al desenrollu nacional y nacional-estatal en cada país; y ye asina tamién como’l marxismu recupera la so auténtica identidá como métodu de tresformación revolucionaria de la realidá vixente.

LA PRAXIS SOCIALISTA Y LA REALIDÁ NACIONAL

                16. IAS quier significar la irrupción na historia d’Asturies d’un nuevu puntu de vista: el puntu de vista del pueblu asturianu. Dende esta perspectiva, nueva dafechu nel nuestru ámbitu, queremos facer una nueva síntesis teórica y programática del socialismu n’Asturies, que tien de concretase nel alcuentru ente marxismu y realidá nacional.

Atendiendo a la necesidá d’ellaborar el proyectu socialista en cade país partiendo de la so propia especificidá cultural, social, económica, política… vemos como imprescindible la construcción d’una alternativa democrática y nacional concretada organizativamente nun partíu que seya a realizar esos oxetivos partiendo del fondu y rigurosu análisis de l’actual realidá asturiana, tanto en relación a ella mesma como a los restantes marcos xurídico-políticos nos que ta enserta (estáu Español, UE, OTAN, UEO…). Y esa necesidá d’un proyectu socialista específicamente asturianu ha facese analizando toa una riestra d’elementos d’estremación que determinen qu’Asturies seya un marcu concretu de reflexón y práctica política.

Pa ser a concretar política y organizativamente esos pruyimientos, tien importancia fundamental la necesidá d’estudios fondos de la estructura social actual d’Asturies, de les sos causes históriques y del so allugamientu dientro los marcos estatal y européu. Ye nesa cuestión del métodu, del usu correchu de les sos armes metodolóxiques, onde se ve la capacidá d’un partíu pa tar al altor del so pretendíu papel históricu.

17. El noyu central d’IAS ta asina en que la opción socialista asume dafechu los intereses y oxetivos nacionales, partiendo de que l’únicu camín pa facer internacionalista la izquierda n’Asturies ye que’l socialismu funda los sos raigaños nel suelu asturianu. Estremámonos asina del xovinismu aislacionista y talantamos la nuestra llucha pola lliberación nacional y social como parte de la llucha mundial de los pueblos pola democracia y el socialismu. El nuestru proyectu nacional ponse asina en relación coles lluches emancipadores del restu del mundu, y la nuestra voluntá de construcción d’una izquierda asturiana ponse en relación col procesu de redefinición de la izquierda y el socialismu a nivel mundial.

Estos puntos de vista, que combinen el desenrollu universal y nacional del marxismu, intenten superar tanto les tesis del nacionalismu esencialista y aislacionista como les de los que talanten al socialismu como reedición d’otres esperiencies nacionales (fracasaes les más de les veces) o les de los qu’intenten tapecer una realidá nacional asturiana qu’entra en fonda contradicción cola so estratexa sucursalista. IAS quier francer con esa visión dogmática del marxismu y fai l’apuesta d’atopar na nuestra historia, nos nuestros vezos y tradiciones, les bases universales del socialismu.

18. Delantre esa voluntá de llucha nacional pol socialismu, surde la cuestión de si IAS ye o non un partíu nacionalista, y de si eso ye o non contradictorio col internacionalismu propiu de la tradición de la izquierda. Pa nós, esi problema ye irreal. L’internacionalismu de cada partíu mídese, principalmente, pola so capacidá de construyir un proyectu socialista propiu. N’otres pallabres, el movimientu más internacionalista ye, al mesmu tiempu, el más apegáu a la propia realidá nacional.

De toes maneres, nun vamos negar que, históricamente, el marxismu presentó al internacionalismu proletariu como l’antítesis del nacionalismu burgués (ente otres coses, porque’l nacionalismu decimonónicu solo podía ser burgués). Hai asina una evidente contradicción de calter dialécticu formal, solo formal, porque’l términu nacionalismu tien güei un significáu conceptual munchu más ampliu qu’hai sieglu y mediu, y lo qu’entós se talantaba por nacionalismu identifícase güei con xovinismu, esencialismu, racismu o imperialismu.

                Arriendes d’esto, ta la famosa afirmación marxista de que los obreros nun tienen patria, frase favorita de los dogmáticos qu’intenten con ello tapecer la realidá nacional asturiana en nome d’un presuntu internacionalismu puru (tres del cualu ta, les más de les veces, un inconfesable nacionalismu españolista, munchu más peligrosu y reaccionariu en tantu que ye xovinista por definición). Pero esa interpretación ta errada, yá que la frase nun resume dafechu’l razonamientu que Marx y Engels fixeron nel Manifiestu Comunista. En tanto qu’escluyida del poder políticu de la nación, la clase trabayadora nun tenía nación, nun tenía patria. Pero los propios autores afirmaben que la misión d’esa escluyida clase trabayadora taba en conquistar el poder políticu, elevase a la condición de clase nacional (clase dirixente) anque de nenguna mena nel sen burgués. Esta cuestión tien una capital irnportancia, yá qu’enarta de modu directu cola noción gramsciana de nación popular, porque, cola construcción del socialismu, la patria pasa a ser de toos, pero non solo nun sen ideal y simbólicu, abstractu, como fai el nacionalismu esencialista, sinón nun sen material, inmediatu, concretu, yá que ye’l pueblu, la clase trabayadora, la inmensa mayoría del país, la poseedora del poder, esto ye, la clase nacional. D’esta mena, solo cola construcción del socialismu ye a constituyise la nación dafechu.

Con esto amosamos el fondu calter nacional de la clase trabayadora, pero ésta ye tamién internacionalista porque, históricamente, al tar escluyida del poder políticu, nun tenía capacidá de decisión sobre’l futuru del so país (esto ye, a autodeterminase). Yera la clase dominante la que lo decidía too. Pero la clase dominante dexó de ser nacional cuando se fixo imperialista, o vasalla del imperialismu. Sustituyó la defensa de los intereses del país, de la soberanía y la independencia, pola espansión violenta y la conquista, o la sumisión a la mesma, poniendo en peligru la llibertá de los demás pueblos y entamando una espiral na que llega a amenazar el futuru mesmu de les naciones, tanto cultural como, nos casos más sangrantes, físicamente. La clase trabayadora ye asina nacional cuando llucha escontra l’imperialismu esterior, pero ye internacionalista porque defende la independencia y la soberanía del propiu país y de tolos demás. Lliberándose a si mesma, ayuda a los demás a lliberase, y ayudando a los demás a lliberase, contribúi a lliberase a sí mesma.

19. ¿Ye entós IZQUIERDA ASTURIANA un partíu nacionalista? Somos un partíu socialista y consecuentemente, talantamos al marxismu como’l nuestru métodu d’análisis de la realidá que mos arrodia. Y resultáu d’esi análisis concretu de la nuestra realidá concreta, llegamos a la conclusión de que p’algamar los nuestros oxetivos cimeros (esto ye, la construcción d’una democracia socialista n’Asturies con tolo qu’ello implica) faise necesario desenrollar equí y agora una estratexa nacionalista. Al tar el país nuna situación de postración dafechu, faltu de soberanía política y económica, y permanentemente agredíu na so cultura y ecosistema, talantamos al nacionalismu como la estratexa política de defensa de la nuestra identidá y derechos nacionales que permita conquistar l’espaciu democráticu suficiente como p’algamar los nuestros oxetivos de soberanía nacional. Pero nun vemos al nacionalismu como consustancial al nuestru proyectu, como un códigu de valores apriorísticos, esencialistes, ideolóxicos en definitiva, y, poro, ayenos a la izquierda y al socialismu. Asina, IAS ye, políticamente, un partiu nacionalista; ideolóxicamente, non, porque nun entendemos al nacionalismu como un fin en sí mesmu.

20. Pa nós, nun se trata de cortar pela freba ente l’antigu movimientu obreru d’anicios de sieglu (socialismu, comunismu y anarquismu) y el nuevu nacionalismu d’izquierdes. Nun queremos una francedura col nuestru pasáu. Trátase d’entender al proyectu socialista soberanista, que llucha pola lliberación nacional, como la más consecuente continuación histórica de la llucha del movimientu obreru asturianu. Esto ye, IZQUIERDA ASTURIANA quier ser la referencia política del socialismu na nuestra dómina, un socialismu alimentáu pola nuestra y propia gran tradición de llucha obrera y popular, de les esperiencies históriques que-y tocó vivir al nuestru país a lo llargo de la so historia. Trátase, en definitiva, de reconciliar la llucha pola lliberación nacional col socialismu clásicu asturianu, y a esi socialismu asturianu cola especificidá nacional del país.

21. Esti razonamientu llévamos a la disxuntiva de la izquierda nacionalista-izquierda nacional. La izquierda d’Asturies tovía nun puede ser nacional en tanto que la especificidá nacional asturiana tovía nun ye asumida con toles sos consecuencies pol conxuntu la población; tien de ser nacionalista porque tovía ye necesaria la llucha por caltener la nuestra identidá escontra l’asimilacionismu nacionalista español, yá que tou nacionalismu naz siempre escontra otru. Cuando Asturies seya soberana y nun haiga dengún poder foriatu que mediatice o condicione’l so llibre desenrollu, entós la estratexa nacionalista será superada pola propia realidá, y, cola constitución dafechu de la Nación Asturiana, la izquierda pasará de nacionalista a nacional.

Pero IAS ye tamién un partíu nacional nel sen de partíu autóctonu. Somos una espresión de la nuestra historia, de la nuestra cultura, de la nuestra realidá sociopolítica y, tamién, de la nuestra idiosincrasia. Y esto ye asina porque entendemos que cada país ye una combinación única y irrepetible, non porque tengamos nengún petite aislacionista, sinón porque la combinación d’elementos de clase, económicos, culturales, sociales, xeográficos, históricos, son siempre únicos y irrepetibles; magar qu’haiga semeyances parciales con otros países o coyuntures. Y pa un partíu como IAS, qu’aspira a ser el motor del cambiu social, caltriar esa combinación ye indispensable p’algamar l’oxetivu de constituyise nel partíu de la clase auténticamente nacional y, como consecuencia, nun partíu nacional.

LOS TRAZOS DEFINITORIOS D’IZQUIERDA ASTURIANA

                22. Arriendes de la nuestra definición como partíu socialista qu’asume’l marxismu como métodu d’análisis de la realidá, y de partíu nacional, autóctonu, que desenrolla una estratexa nacionalista, IZQUIERDA ASTURIANA cree necesaria una mayor definición política que-y dea conteníu a esi modelu social por construyir -el socialismu- y a esa estratexa a siguir -la nacionalista-.

23. En primer llugar, IAS ye un partíu formáu por ciudadanos y ciudadanes. Esta constatación, qu’aparentemente podría entendese como trivial, tien pa nós munchu mayor significáu.

Ye la condicíón de ciudadanu/ciudadana llogru fundamental y irrenunciable de la llucha democrática de los pueblos, que pon a la persona en conesión cola colectividá de los sos iguales llenando de conteníu la espresión sociedá civil. Reivindicamos espresamente’l derechu inalienable qu’asiste a los ciudadanos y ciudadanes pa participar nel discutiniu y na xestión de les cuestiones que-yos afecten, tanto individual como colectivamente, y reivindicamos esi derechu col xeitu más efectivu posible, esto ye, exerciéndolu. Nuna dómina, amás, na que, dientro del nuestru ámbitu, paez que xorrez l’apatía, el desinterés o l’escepticismu pola participación política, y nel qu’asocede l’pergrave procesu pol que poderosos resortes d’influencia y control social consienten, o, más entá, afalen la desmobilización cívica, queremos iguar cola nuestra constitución en partíu políticu, una consolidación dafechu n’aquel derechu.

Paezmos qu’una ciudadanía integral, igualitaria y activa ye condición sine qua non pa la construcción d’una auténtica democracia, nel sen más auténticu y fondu del términu.

D’otra parte, una nación ye una comunidá de comunidaes y la pertenencia a una comunidá abondo pequeña como pa reconocer el valir del individuu ye fundamental pa enllazar a cada persona cola humanidá, pues fai que se sienta responsable directa de los sos propios asuntos. Asina entendemos el conceptu de democracia como insepartable del de descentralización, lo qu’empata col históricu carácter policéntricu d’Asturies, que tamos por reforciar.

24. Consecuentemente colo anterior, IZQUIERDA ASTURIANA ye un partíu demócrata, esto ye, partidariu del poder popular. Y ser partidarios del poder popular significa una concepción ascendentede la estructura política d’un país, entendiendo que ye la masa ciudadana’l pegollu sobre’l que dir edificando, d’abaxo arriba, tola estructura institucional qu’igüe, y nun torgue nin restrinxa, la soberanía popular.

Y ser demócrates va tamién fondamente amestao, y nun doble sen, cola idega de nación soberana. D’un llau, un pueblu solo ye soberanu cuando ye llibre de toa primición esterna, cuando nun ta ensertu, independientemente de la so voluntá, nuna estructura político-institucional más amplia; pero pa ser soberanu tien de tar tamién llibre de toa primición interna, esto ye, de toa triba de minoría oligárquica que suplante o condicione la voluntá popular. Al mesmu tiempu, la nuestra concepción democrática de nación soberana va xunida a la recuperación y actualización de les formes comunalistes y de democracia directa tradicionales na sociedá asturiana, güei cuasi esborriaes pol esmantelamientu del mundu rural y la suplantación d’estes formes polítiques poles instituciones oficiales.

Ser demócrates güei tamién tien pa nós otra connotación, que ye la de revolución. Somos revolucionarios porque queremos la tresformación fonda y estructural del país en porgüeyu de los sectores populares, y tamos por elevar esos sectores a la categoría de clase dirixente de la nación, siendo esto, en definitiva, la construcción de l’auténtica democracia.

25. IZQUIERZA ASTURIANA ye tamién un partíu ecoloxista, porque’l nuestru proyectu tresciende al simple ambientalismu y/o conservacionismu y sometemos a crítica toa teoría económica que nun contemple l’ecosistema nin la demografía. Consecuentemente cola concepción marxista de que les dos fontes de bayura son la tierra y el trabayu, paezmos imposible iguar un proyectu políticu progresista que nun asuma la ecoloxía política como parte integrante de só. Al mesnu tiempu, estremámonos tanto de les corrientes de la izquierda enfotaes nun llocu productivismu que tapez la realidá medioambiental, como de ciertes teoríes ecoloxistes qu’entienden la ecoloxía política como daqué independiente de la formación social y les relaciones de producción.

IAS tamién ye un partíu ecoloxista porque’l so compromisu cola Naturaleza va más allá de les declaraciones xenerales. El nuestru proyectu va tamién empobináu hacia la concienciación de la sociedá, puxando por una ciudadanía comprometío cola defensa de ecosistema, pues el respetu a les persones ye consustancial al respetu al mediu que mos arrodia.

26. IZQUIERDA ASTURIANA ye laica porque puxamos pola neutralidá dafechu del Estáu en materia confesional. Respetando’l fechu relixosu en tanto qu’espresión de la llibertá individual, entendemos ensin embargu que ye una cuestión privada de la persona que nun puede dir condicionada por nenguna triba d’institución o lobby. Vemos a les estructures relixoses como poderosos grupos de presión que, a lo llargo de la historia, xugaron, nos más de los casos, un papel negativu pa los puebios, pola so función ideolóxica de xeneradores de falsa conciencia, pola so identificación colos intereses de la clase dominante y pola so oposición dafechu a cualisquier tipu de progresu científicu o investigación filosófica, magar que reconozamos el papel que dellos movimientos relixosos xugaron, y xueguen na actualidá, pa la causa del progresu social, precisamente cuando les mases de fieles francíen cola tutela ideolóxica de les xerarquíes eclesiástiques.

Pero ser laicos nun ye solo ser aconfesionales. Trátase tamién de refugar cualisquier mena de dogmatismu, de mesianismu, d’interpretación cuasi-relixosa de determinaes filosofíes o de l’asunción de verdaes absolutes y inmutables, que lleven a l’alienación individual. IAS ye un partíu abiertu (y un partíu políticu, non un partíu idiolóxicu) qu’almite dientro de só a creyentes y non creyentes, y nun afita nin quier afitar más filosofía o códigu de valores que los oxetivos y reflexones del nuestru proyectu, llibremente asumíos polos sos militantes. Defendemos de mena irrenunciable l’autonomía moral de les persones p’asina reforzar l’espíritu cívicu que garantice la vitalidá de la democracia.

27. IZQUIERDA ASTURIANA ye un partíu republicanu porque asume que la base de la democracia ye la llibre asociación de ciudadanos y ciudadanes, y que les responsabilidaes y cargos públicos de la sociedá tienen de tar siempre suxetos a control y llibre elección de la ciudadanía. Refugamos asina de la teoría esencialista qu’entiende que la másima representación del Estáu tien de ser vitalicia y hereditaria por mor d’una cuestión de sangre. Entendemos la Monarquía como una institución incompatible cola idega democrática consecuente, y identificamos la República cola noción de saberanía. Si queremos un Pueblu Asturianu soberanu pa decidir el so futuru, queremos tamién la llibertá pa elexir tolos nuestros representantes.

Entendemos asina que la forma republicana del Estáu ye la estructura política más afayadiza p’algamar el nuestru modelu de democracia socialista

28. Resultáu de lo enantes espuesto, la definición política y señes d’identidá d’IZQUIERDA ASTURIANA resúmese en que ye un partíu socialista qu’asume’l marxismu como métodu d’análisis de la realidá, con voluntá de constituyise na Izquierda Nacional del país, y que concreta les sos aspiraciones polítiques nun proyectu de calter cívicu, democráticu, ecolóxicu, laicu y republicanu.

II.Los presupuestos básicos pa una alternativa d’izquierda n’Asturies.

                29. L’acción política d’IZQUIERDA ASTURIANA va empobinada a algamar unos oxetivos estratéxicos qu’entendemos como la realización dafechu del llabor políticu qu’agora emprimamos a desenrollar. Asina, el trabayu que se faga nel presente sirve pa da-y conteníu real a esos oxetivos a llargu plazu que güei puen abultar utópicos o excesivamete alloñaos de la realidá.

Estos oxetivos constitúin les llínies estratéxiques elementales y irrenunciables pa iguar un proyectu nacional y d’izquierdes, una alternativa global al actual marcu políticu, económicu, social, medioambiental y cultural nel qu’Asturies ta enserta.

El proyectu d’IZQUIERDA ASTURIANA resúmese en siete puntos: l’exerciciu consciente de la soberanía nacional, al traviés del derechu d’autodeterminación; la construcción d’una democracia socialista; el desenrollu d’una concepción ecolóxica global; el respetu y realización dafechu de los Derechos Humanos; l’apuesta pola solidariedá activa ente los pueblos; la dignificación de la cultura asturiana y l’espardimientu d’una nueva ética social.

POL DERECHU D’AUTODETERMINACIÓN, HACIA LA SOBERANÍA NACIONAL.

                30. La interpretación reduccionista d’esti términu tiende a velu namás que como’l derechu, exercíu nun momentu concretu, d’una nación a formar un Estáu propiu. Nós entendemos l’autodeterminación como la capacidá constante d’un pueblu de decidir llibremente’l so futuru; y esa capacidá cinca tamién a cuestiones económiques, sociales, culturales, etc., esto ye, a tou tipu de problemes que puean afectar a una comunidá humana. Ye por esto qu’entendemos l’autodeterminación non como un oxetivu concretáu nel tiempu, sinón como una ferramienta al traviés de la qu’una sociedá igua permanentemente la so soberanía.

31. La idega d’autodeterminación tien un doble aspectu que pon al individu en relación cola comunidá: l’autodeterminación ye personal -el derechu d’un ciudadanu o ciudadana a escoyer llibremente’l so futuru y, al traviés de la codeterminación o comuña d’intereses colos sos iguales, pasa a constituyir l’autodeterminación colectiva de la nación consciente de los sos derechos. Trátase, asina, d’iguar una estructura política que faga posible la realización dafechu de los individuos nel marcu más ampliu, colectivu, llibremente escoyíu por ellos mesmos; esto ye, facer que’l llibre desenrollu de caún seya condición pal llibre desenrollu de toos.

32. El conceptu d’autodeterminación ta tamién fondamente relacionáu con otros dos: los de democracia y soberanía nacional. El marcu democráticu ye l’unicu posible pa qu’un pueblu seya p’autodeterminase, exercer la so soberanía, non en términos abstractos o ideales, sinón concretos y materiales. Asina, asociamos una vez más la noción de democracia a la de poder o soberanía popular, y a ésta cola constitución de los marcos xurídico-políticos que posibiliten l’exerciciu continu d’esi derechu.

Por contra, l’actual marcu llegal del Estáu Español, estructuráu na Constitución de 1978 y el sistema de les Autonomíes, pon-y llendes a la capacidá d’autogobiernu de los pueblos del Estáu, nun reconociendo más qu’una insatisfactoria capacidá competencial. IZQUIERDA ASTURIANA afirma que nun puede haber poder nengún percima de la voluntá soberana del pueblu asturianu, y por ello’l primer puntu de los nuestros oxetivos ye la necesidá d’un marcu xurídicu-políticu que reconoza a Asturies como la única depositaria del derechu a decidir soberanamente’l so futuru.

33. El nuestru proyectu soberanista implica una concepción ascendente de la soberanía nacional (son los ciudadanos y ciudadanes los que formen la nación, y ye ésta, soberana, la que decide llibremente si quier, o non, ensertase nun marcu políticu más ampliu, como una Federación plurinacional) n’oposición a la descendente vixente (na que l’Estáu central ye soberanu per sé y decide voluntariamente si otorga o non competencies a los pueblos xuncíos a él). Lleva implícito tamién la defensa de les relaciones horizontales ente tolos pueblos (y non col Estáu central como intermediariu, como pasa agora), d’igual a igual, consecuentenente col nuestru pensamientu solidariu y abiertu hacia tolos pueblos d’Europa y del mundu.

                Esta concepción ascendente de la soberanía nacional identifícase, nesti momentu históricu, cola de soberanía popular, yá que, pol nuestru calter de partíu socialista democráticu, vemos al cuartu Estáu, al pueblu trabayador, como l’auténtica clase nacional, en tanto que ye la que col so llabor cría la riqueza del país frente a unes clases burgueses que n’Asturies cumplen un papel parasitariu dafechu, al tar subordinaes al mayor empresariu capitalista del nuestru país, que ye’l mesmu Estáu Español, dándo-y asina al marcu asturianu un calter cuasi colonial. La burguesía asturiana, al renunciar hasta’l momentu a constituyise en clase nacional, y asumir voluntariamente un papel subsidiariu de la oligarquía estatal y cómplice col procesu d’esborriamientu de la nuestra cultura, france dafechu colos intereses del conxuntu del país, asitiándose asina al marxe del mesmu. En tou casu, IAS nun asume un plantegamientu determinista d’esti procesu, y ye consciente de que na actual situación ye dable un cambiu de dirección nestos sectores sociales si estos apuesten por una salida nacional a l’actual crisis d’esti modelu dependencia económica. La posibilidá de qu’esto seya asina nun implicaría un cambiu cualitativu del nuestru oxetivu soberanista popular, sinon un replantegamientu de la nuestra táctica al esistir una articulación política d’esos sectores sociales colos que quiciabes pudiere ser posible la coincidencia na reivindicación d’unos puntos mínimos.

POR UNA DEMOCRACIA SOCIALISTA

                35. IZQUIERDA ASTURIANA afítase na necesidá histórica de la construcción d’una democracia socialista como la única solución al fatáu de problemes que güei sufre Asturies y el restu del mundu. Entendemos al socialismu non solo como un modelu económicu, social y políticu por facer, sinón como una etapa de mayor xusticia y llibertá, un pasu alantre, na evolución de la sociedá asturiana y les demás sociedaes. Estos dos conceptos nos que concretamos les nuestres aspiraciones -democracia y socialismu- precisen d’un fondu esclariamientu terminolóxicu col fin d’estremase d’otres corrientes polítiques que tamién faen usu d’esos términos.

36. Frente a los modelos de democracia históricamente esistentes nos dos últimos sieglos, la democracia lliberal o formal, na que la élite económica ye la que controla’l poder políticu real, y la democracia social o gobiernu pal pueblu, pero ensin el pueblu, na que domina una minoría burocrática y que foi la vixente nos países del antigu bloque del Este entendemos a ésta como’l gobiernu del pueblu, pal pueblu y pol pueblu, esto ye, el poder popular que ye’l so auténticu sen etimolóxicu. Vémosla asina como un ideal de llibertá, soberanía popular, igualdá, xusticia social, participación y solidariedá non realizáu dafechu históricanente. Esti ideal asitia nel centru de la preocupación democrática a la persona como ser social y a la sociedá como’l productu de la so voluntá y acción consciente.

37. La esperiencia histórica demuestra que na actualidá y nel entornu políticu nel qu’Asturies ta enserta el procesu de llucha de clases cuayó nuna institucionalidá políticoestatal de tipu democrático-lliberal, con un calter de clas definíu y unes llendes determinaes polos intereses de les élites económiques dominantes. En tou casu, la democracia como ideal nun ye reducible nin a los sos aspectos meramente institucionales, nin a una cuestión únicamente clasista.

Pero la democracia nel réxime capitalista tien munches inxusticies. Nel aspectu económicu y social, el control de los medios de producción por una minoría oligárquica lleva a la esplotación de les persones que vienden la so fuerza de trabayu y al paru estructural, y, nos casos más sangrantes, a la probitú y a la fame de peramplios sectores sociales; a la esclusión de gran númberu d’homes y muyeres en materia de salú, vivienda o cultura; a la falta de soberanía de munchos pueblos y naciones; a la marxinación social de toa triba de minoríes (étniques, relixoses, sexuales…); al esborriamientu de la Naturaleza por dir a la gueta’l beneficiu priváu a tou preciu; too ello nuna dómina na que la ciencia y la técnica tán en condiciones d’asegurar un modu de vida dignu a tolos habitantes del planeta.

Como consecuencia d’esta situación social, no político la democracia lliberal redúzse a la escoyeta de les élites dirixentes. Esto lleva a la espropiación política de la mayoría de la población, a la competencia ente grupos corporativos y al reforciamientu d’estructures estatales más burocratizaes y autoritaries. Ensin embargo, la gran habilidá del lliberalismu ye la d’apropiase del conceptu de democracia, oponiéndolu al modelu socialista, presentáu como antidemocráticu. Esta situación ye’l resultáu tanto de la propia capacidá de la propaganda lliberal como de los errores y insuficiencies de la izquierda.

38. Asina, al absolutizase l’afirmación de que solo esiste una democracia de clase, cayóse munches veces n’asumir al Estáu lliberal-burgués como una esencia inmutable nel tiempu, impuesta en bloque y d’una vegada pola voluntá de la clase dominante, y al enfotase na crítica al calter de clase de la democracia llegóse a tracamundiala cola crítica a la democracia mesma, dando asina la imaxe de ser antidemocráticos, mentanto’l pensamientu lliberal (que nel so orixe nun yera democráticu) pasaba a presentase como’l representante cimeru de la democracia, identificándola como daqué realizable namás que nun réxime capitalista.

Ensin embargo, históricamente’l procesu democráticu nun s’agotó na estructura político-institucional vixente. Foi la llucha y la participación de peramplios sectores sociales la que foi enanchando les llendes de la democracia, tanto nos aspectos políticos -como’l sufraxu universal- como nos sociales -como la xornada llaboral d’ocho hores o’l cubrimientu estatal de la salú, la educación o les xubilaciones frente a un réxime lliberal bien pocu dispuestu a les concesiones. Tolos llogros, toles ventayes sociales de les que güei esfruta la clase trabayadora del Primer Mundu capitalista, nun son el resultáu de les victories del lliberalismu, sinon de les sos derrotes.

39. La concepción socialista democrática que nós proponemos nun consiste na refuga de los postulaos de la democracia lliberal -que son vistos como un gran llogru de la revolución burguesa- sinón na materialización d’esos postulaos al traviés de tresformaciones económiques y sociales que desanicien los privilexos clasistes derivaos de la propiedá privada de los medios de producción. Retomamos asina los valores de la democracia como un ideal a realizar y unes conquistes reales a algamar, al traviés d’una concepción orgánica democracia-socialismu, asumiéndolos non como elementos complementarios, un anantes y un depués, un preséu y un oxetivu, sinón como componentes d’un mesmu principiu.

Pa nós, nun hai principios socialistes que nun tean asitiaos nel ideal democráticu. La democracia nun ye solo la vía pa llegar al socialismu, sinón la garantía mesma de la so realización, y el socialismu nun ye solo un oxetivu o un ideal sinón el preséu pa construyir la democracia dafechu. IZQUIERDA ASTURIANA ye asina demócrata porque tien una reflexón y una praxis democrática, que mos define pol socialismu.

40. La llucha de la izquierda pola democracia nun significa retroceder a la democracia lliberal-burguesa, porque ésta, en tanto que parte del presupuestu de l’atomización de la sociedá n’individuos abstractos, interpreta de mena formal y idealista el conceptu de voluntá xeneral en función de los intereses particulares d’una clase que domina sobre les demás y constitúi por tanto una forma de dictadura. La democracia dafechu que nós proponemos solo ye dable nun contestu nel que se constituya’l poder popular cola espropiación del poder políticu de toa minoría oligárquica, siendo asina l’Estáu’l resultáu de los intereses y de la voluntá política d’una mayoría social que dicta la so llei al conxuntu’l país, siendo, nesi sen, otra forma de dictadura.

Esto empata directamente col conceptu de dictadura del proletariáu, tan masuñáu como malinterpretáu por unos y otros. El lliberalismu y la socialdemocracia usáronlu pa presentar al socialismu como daqué antidemocrático, mentanto les corrientes más dogmátiques (y, poro, ideoloxizantes) de la izquierda fixeron una interpretación autoritaria del mesmu, entendiéndolu tamién como otra dictadura, nel sen más represivu del términu, nesti casu d’una minoría burocrática que, al marxe de tou control popular, dicía actuar en nome d’esi mesmu pueblu. El fracasu, bien conocíu por toos, d’esos modelos autoritarios truxo como consecuencia’l desprestixu del términu dictadura del proletariáu, cuando’l siqnificáu fondu y orixinal ye precisamente’l de dictadura de la mayoría, esto ye, la democracia dafechu. De toes maneres, y teniendo en cuenta que les palabres son pa comunicase, ye evidente que nel actual contestu históricu l’usu indiscrimináu d’esti términu nun sirve pa desplicar el so conceptu, colo que terminos como democracia socialista, democracia dafechu o poder popular cumplen muncho meyor esa función. Asina, cuando IAS s’alluga ente les fuercies que lluchen por un socialismu democráticu, nun lo dicimos porque entendamos que’l socialismu puea ser non democráticu, sinón como una axetivación que se fai necesaria, na actual situación, pa estremase d’otres esperiencies acabantes de finar y que la propaganda lliberal presenta como paradigmátiques de la izquierda.

41. Arriendes d’esto, IZQUIERDA ASTURIANA entiende necesario estremase tamién de la socialdemocracia, yá que si’l nuestru proyectu socialista democráticu tien como oxetu superar les llendes estructurales del sistema vixente, les propuestes y la esperiencia histórica d’esta corriente idiolóxica adáptense a la estructura capitalista, asumiendo voluntariamente la xestión del sistema y conformándose con facer curties reformes nelli, arrenunciando por ello a la construcción d’una nueva sociedá superadora de la qu’ellos intenten afitar.

Ye cierto que la socialdemocracia cola so estratexa de collaboración de clases, algamó en dellos países de capitalismu avanzáu ameyoramientos, inclusive enforma valorables, pero en dengún país foron pa subordinar l’espoxigue económicu capitalista a los intereses de la sociedá. Ye por esto qu’esta corriente tea tamién fundida nuna crisis cásique tan fonda como la de los partíos que sofitaron al socialismu real. Y ye porque la collaboración de clases furrula meyor nuna sociedá n’espansión, cuando hai daqué pa repartir. Pero la reconversión estructural de la industria, el desplazamientu d’un númberu pergrande d’empreses tradicionales poles multinacionales a terceros países traen pergraves problemes económicos y sociales. Nestes condiciones, la collaboración de clases pierde la base material de la so razón de ser, tanto nos países económicamente avanzaos, en procesu d’esmantelamientu del Estáu del Bienestar, como nos países del nomáu Tercer Mundu, nos que la probitú ye tala que la paz social nun ye dable.

42. L’oxetivu cimeru de construcción de la democracia socialista -estremada tanto de la socialdemocracia como de les recién acabantes esperiencies del Este européu- asume que los medios, los preseos p’algamar esi oxetivu han de ser igualmente democráticos. Ye un procesu de cambios, tanto dende dientro de la institucionalidá vixente como dende fuera, construyendo nueves formes de participación popular, y con ello una nueva hexemonía, un nuevu poder. Trátase asina de superar la teoría y la praxis dominantes que reducen la democracia esistente a les sos espresiones estrictamente político-institucionales y la participación popular a unes elecciones cada cuatro años. Consolidar y avanzar en democracia supón esa doble llucha política y popular reivindicativa de meyores condiciones de vida pa los asturianos y asturianes. Esta propuesta implica a tolos sectores populares y precisa pa ello la coincidencia estratéxica de toa una riestra d’organizaciones sociales, y non solo político-electorales, que seya a ellaborar una alternativa conxunta en toles estayes de la vida social. Esta estratexa lleva asina a la elección d’un camín de tresformaciones económiques, sociales, polítiques y culturales nel que’l consensu de grandes mayoríes nacionales ye’l qu’afita los ritmos y plazos de los cambios. Esti consensu, activu, non pasivu, esprésase tamién al traviés non solo de les elecciones institucionales, sinón tamién de tou tipu de plebiscitos y consultes populares nes que puea dir superándose l’apatía política de la gran masa de la población.

El nuestru conceptu de consensu pa criar la nueva hexemonía nun tien nada que ver cola idega vixente del consensu como compromisu ente fuercies antagóniques y contradictories -nel qu’una de les partes ha de facer necesariamente concesiones sustanciales que nun son sinón una renuncia tapecida- sinón como la converxencia de sectores populares con enfotos asemeyaos y intereses non contradictorios col oxetivu d’algamar una síntesis qu’articule una nueva mayoría nacional. Esi consensu nun ye solo necesariu pa esaniciar el réxime vixente, sinón tamién pa criar les formes del nuevu. D’esto derívase una realidá fundamental: ensin mayoría popular favorable al socialismu, nun son posibles les tresformaciones socialistes, o al menos nun ye garantizable la so continuidá nel tiempu. Creer que puede construyise la democracia socialista solo col sofitu d’una minoría consciente y ensin l’ampliu consensu popular, ye entender la revolución socialista como obra d’unos mesíes, d’un garapiellu de elexíos. Ye, poro, traicionar la esencia mesma del pensamientu damcráticu y socialista.

La revolución, pa nós, nun ye un actu apocalípticu y esplosivu, sinón el resultáu de munchos españíos y francedures. Ye, sobre too, un procesu de cambios y de disputa de la hexemonía que solo ye dable enanchando y radicalizando les llendes de la democracia. Un procesu históricu d’acumulación de fuerces económiques, sociales, polítiques, culturales, étiques… que lleve a avances y cambios estratéxicos en porgüeyu de les fuerces populares y d’izquierda que se mueven na realidá nacional. Pero esi procesu nun ye una llínia trazada, uniforme, sinón que’l pasu d’un modu de producción a otru implicará unes fases más aceleraes, otres más tardiegues, incluso con compromisos transitorios ente les fuercies contendientes. Un procesu dialécticu, en definitiva.

43. La concreción d’una democracia socialista n’Asturies pasa, pa IZQUIERDA ASTURIANA, per entender que’l socialismu nun ye solo un réxime políticu, económicu y social sinón la organización mesma de la sociedá civil; la so participación, educación y incorporación directa a la xestión pública ye la mesma razón de ser del socialismu.

En primer llugar, los y les trabayadores tienen de disponer non solo de iure, sinon tamien de facto, tanto de los medios de producción, como de los que permiten organizar y meyorar les sos condiciones de vida. La socialización nun debe ser entendida nun sen esrictamente material-productivu, sinón tamién como una relación social. Neses condiciones la estatizacion por sí sola nun ye abondo. El procesu de socializacion inclúi’l respetu a les formes pluralistes de propiedá, xestión y alministración, en función de razones d’utilidá social. La realización dafechu d’esti modelu solo ye dable depués d’un procesu d’educación del conxuntu de los y les trabayadores na llucha democrática precedente al llogru d’esi control de los medios. Per otru llau, l’autoxestión tien de combinase cola planificación democrática de la economía col oxetivu de racionalizala, torgando’l crecimientu descomanáu d’unes rexones en perxuiciu d’otres y curiando por subordinar el crecimientu económicu a la realidá medioambiental.

Nel aspectu políticu-institucional, la democracia socialista estructúrase nun Estáu democráticu de Derechu, pluralista y pluripartidista, que garantice’l control ciudadanu de la so xestión, la xixilancia sobre la protección y desenrolle de los derechos humanos y la igualdá d’oportunidaes. Poro, el gobiernu habrá de tar suxetu al xuiciu popular al traviés d’elecciones democrátiques en tolos ámbitos, con multiplicidá d’órganos de poder, resultáu de la descentralización.

Entendiendo que la soberanía popular ye la única fonte lexítima de poder, y que la base del socialismu ye’l so apoyu mayoritariu, habrán d’esistir tamién los preseos democráticos pa salir d’esi réxime si esa ye la voluntá democrática de la mayoría.

POR UNA CONCEPCIÓN ECOLÓXICA GLOBAL

44. El pone-y llendes al procesu d’esfarrapamientu de la Naturaleza, que llega a poner en peligru la esistencia mesma de la especie humana, ye ún de los retos fundamentales de la nuestra dómina. Polución, recalentamientu atmosféricu, radioactividá, mengua de la capa d’ozonu, lluvia ácido, deforestación, desertización, fame… nun son más que’l resultáu del sistema políticu-económicu vixente, enfotáu n’algamar el mayor beneficiu priváu al preciu que seya, y que nun se detién ante los costes humanos o medioambientales qu’eses polítiques insensates y irresponsables puean tener.

La desigualdá del sistema ye evidente dende’l puntu de vista ecolóxicu (como dende tolos demás) nos países probes. El colonialismu ayudó al xorrecer económicu d’Occidente, dexando probitú y estrozu ecolóxicu, y güei, dende les cúpules del poder económicu, esto ye, el Bancu Mundial y el Fondu Monetariu Internacional, ufiértense donadíes a mui altos intereses. Los países del Tercer Mundu, afogaos na probitú, tando yá nun procesu d’esborriamientu de los sos recursos naturales pa vendelos a preciu de saldu, terminen por aceptar les condiciones d’aquellos a los que tán hipotecaos, afincando nes sos tierres les fórmules económiques y industriales más agresives pa col medioambiente, a cambiu, nos más de los casos, d’arriquecer a les oligarquíes locales embaxo d’una mázcara d’intentu de crecimientu económicu. N’Asturies, el fondu estrozu ecolóxicu que vivimos ye’l resultáu lóxicu del propiu procesu d’industrialización que se dio nesti país, caracterizáu pol crecimientu incontroláu de les industries estractives pesaes, la falta d’estudios previos y la poquísima atención a les comarques que dexen de ser rentables (dende’l puntu de vista económicu priváu), condergándoles a ser tierres ermes y desfeches. Por si fore poco, l’alternativa reindustrializadora p’Asturies pola que se puxa güei dende les instancies oficiales ye la del modelu tercermundista d’industries y actividaes altamente contaminantes y d’esplotación de los recursos forestales, n’especial cola plantación d’especies foranies, sobre too l’ocalitu, qu’hipotequen el futuru del campu asturianu.

El problema ecolóxicu tien de vese nel so conxuntu, y les soluciones globales, pa la xeneralidá, pasen per un cambiu drásticu del sistema económicu a nivel mundial. El capitalismu nun ye compatible col respetu pola Naturaleza, y basámonos pa dicilo en que les bases del sistema son la riqueza que-y dan la fuercia de trabayu y los recursos mundiales y los gastos que se faen sobre ellos, y en que’l so fin cimeru ye la perpetuación de la desigualdá y la primición de les persones poles persones, y d’unos pueblos y unes cultures sobre otros pueblos y otres cultures.

Falar entós de problema ecolóxicu ye tanto como falar de desigualdá, consumismu y modu de producción.

45. Agora la izquierda ta llamada a desenrollar una concepción socialista de la ecoloxía. Una de les paradoxes de la nuestra dómina ye que, anque’l socialista foi quiciabes el primer movimientu políticu del mundu contemporaniu qu’alvirtió sobre los riesgos del crecimientu incontroláu, los sos continuadores políticos nun foron a materializalo de mena consecuente. Por contra, nos países del namáu socialismu real cayóse les más de les veces nun llocu y irresponsable productivismu que truxo consecuencies cásique más graves como nos países capitalistes. La esperiencia y plantegamientos del movimientu ecoloxista estructuráu n’Europa d’hai unos años p’acá son una fonte importantísima de reflexón y programa políticu pa la izquierda consecuente. Asina, trátase de ver a la ecoloxía non como un adornu na propaganda electoral de turnu, sinón como’l Norte lóxicu d’una actividá consciente empobinada non a axustar l’ecosistema al modelu de crecimientu económicu, sinón precisamente al revés. Ello solo ye posible con una política de planificación, lo qu’enllaza directamente col modelu social y económicu que tenemos como oxetivu.

Y esa concepción socialista del ecoloxismu (o ecoloxista del socialismu) ye más posible d’iguar nel nuestru contestu nacional que n’otros marcos específicos, por mor de ser la nuestra una comunidá humana pequeña, y por eso más fácil de cohesionar y analizar conxuntamente col so entornu, ensin escaecer por ello que’l problema ecolóxicu ye global y globales han de ser les soluciones.

Yá n’otra parte d’esti documentu sulliñamos que la nuestra concepción de la ecoloxía política ye crítica tanto colos plantegamientos filosóficos idealistes que ven al ecoloxismu como daqué independiente de les relaciones sociales de producción, como coles corrientes de la izquierda igualmente productivistes (porque traducen socialismu por mera estatización de los medios de producción, ensin camudar nengún comportamientu nin modu de crecimientu d’esos medios), o les teoríes ambientalistes -el nomáu ecokeynesianismu- que reducen la ecoloxía a un simple conservacionismu y lexislación consistente en multar a les grandes empreses contaminantes (gastos qu’eses empreses acaben faciendo pagar a los consumidores). Esta auténtica socialdemocracia de la ecoloxía nun pue significar más qu’avances parciales que nun son a resolver el problema pues nun s’atreve a dir al niciu de la cuestión, que ye’l conxuntu del modu de producción.

46. Nun se trata de poner como oxetivu la vuelta a un señaldosu pasáu rural de subsistencia presuntamente idílicu. Trátase d’avanzar, con tola esperiencia científica y al traviés de la participación democrática, hacia un mdelu ecolóxicu de crecimientu económicu nel que’l balance ambiental de cada actividá humana seya un principiu que guíe la economía, lo mesmo que’l balance social. Un modelu económicu con fontes enerxétiques renovables, una producción col mínimu de gastu enerxéticu y col mínimu de refugayes, siendo estes lo másimo de reciclables; una agricultura ecolóxica, menos intensiva enerxética y químicamente, y integrada nel entornu; un tresporte públicu menos contaminante, más baratu socialmente y menos gastizu n’enerxía; un consumu asentáu na calidá de los bienes y los servicios, nel cubrimientu de les necesidaes reales y que suponga un francimientu cola orxía consumista de lo superfluo y del usar y tirar.

Al mesmu tiempu qu’estes polítiques, la crisis ecolóxica mundial precisa tamién d’una solución global que pase pela redistribución de la riqueza y l’acabu de l’actual lóxica d’intercambiu comercial Norte-Sur, que ye una de les mayores fontes d’esta situación tan llaceriosa, yá que probitú y estrozu ecolóxicu suelen ser dos aspectos inevitablemente xuníos.

POLA DEFENSA INEQUÍVOCA DE LOS DERECHOS HUMANOS

48. Ún de los mayores avances de la mentalidá progresista a lo llargo d’esti sieglu ye la gran sensibilidá qu’amplies capes sociales demuestren pa cola defensa de los derechos individuales y colectivos, espeyaos na Declaración Universal de los Derechos Humanos de 1948.

Dende les declaraciones de los derechos formales de propiedá, llibertá de prensa o defensa xurídica al reconocimientu de los derechos políticos (d’asociación y sufraxu, y pa tola población) y sociales (al trabayu, a la vivienda, la salú, etc.) pasó un llargu procesu de llucha del movimientu obreru escontra l’Estáu lliberal, siendo asina el reconocimientu d’esos derechos una conquista histórica de la izquierda y de toles corrientes democrátiques y progresistes d’esta dómina.

49. Nel procesu de consolidación y espardimientu de la conciencia na defensa de los derechos humanos, surdieron delles corrientes reduccionistes na interpretación d’ellos y del so valir políticu.

La corriente asistencialista reduz la llucha polos derechos humanos a la simple denuncia de les tortures y tratos degradantes a persones en dellos países, xeneralmente del nomáu Tercer Mundu, tapeciendo malapenes un discursu paternalista que desdibuxa l’auténticu valir de la Declaración Universal, al nun cincar los aspectos sociales nin económicos.

La interpretación lliberal de los derechos humanos céntrase namás que nos aspectos políticos (llibertá de votu, d’asociación, etc.) ignorando a costafecha los derechos sociales (a la salú, la vivienda, al tiempu llibre, al trabayu, etc.) yá qu’estos son vulneraos de contino nos rexímenes lliberales.

La concepción de los derechos humanos en dellos sectores de la izquierda tien la so exa nos derechos sociales, obviando los políticos, vistos como peligroses lliberalidaes burgueses. La razón de ser d’esta concepción ye’l so compromisu colos acabantes rexímenes del Este européu y los poco tapecíos petites autoritarios de los proyectos políticos qu’eses corrientes pretenden caltener.

50. Pa IZQUIERDA ASTURIANA, la defensa consecuente los derechos humanos ye consustancial al so proyectu socialista democráticu. Entendemos a la Declaración Universal como un auténticu programa revolucionariu porque la so realización dafechu supondría un francimientu col réxime actual, yá que l’actual sistema social nun permite l’auténticu desenrolle del derechu al trabayu, a la vivienda, a la cultura, a la non discriminación, etc. sinón que la so vulneración ye inherente a esi mesmu sistema, incapaz de garantizar el so cumplimientu, magar que formen parte de les constituciones, programes y discursos políticos de turnu. Ye asina que l’espardimientu y el sofitu a la conciencia ciudadana pola defensa de tolos derechos humanos ye un llabor progresista nel que la izquierda consecuente ha de tar fondamente enfotada al traviés del compromisu y la denuncia tanto de les vulneraciones en sí d’esos derechos como de les sos causes, lo que supón un cambiu cualitativu de l’actual visión d’esti problema y una denuncia del cinismu d’aquellos que, magar del so sofitu formal a la Declaración Universal, entienden imposible la so realizacion dafechu.

La defensa de los derechos humanos ta tamién enforma relacionada cola llucha escontra la discriminación de les persones. La primición de les muyeres, el racismu, l’odiu relixosu, el xovinismu, l’arrequexamientu de la xente homosexual, l minusválido o inmigrante, suponen otres tantes violaciones de la Declaración Universal y que nos más de los casos nun son superables dafechu nel entornu cultural resultáu del sistema socioeconómicu vixente, yá que la discriminación sirve en munchos casos como escelente escusa pa tapecer contradicciones sociales más fondes, faciendo eses minoríes étniques, relixoses, sexuales, etc. el papel de paganes de les frustraciones del restu la población.

La realización y desenrollu dafechu de toos y caún de los derechos humanos solo ye posible nun contestu social, económicu, políticu y cultural que posibilite l’acabu de tou tipu de primición y alienación, esto ye, nuna democracia socialista.

POLA SOLIDARIEDÁ ENTE LOS PUEBLOS

51. La solidariedá internacionalista ye una de les meyores tradiciones de la izquierda, y más en concreto, del pensamientu socialista. L’apoyu, moral, políticu y material, a toes aquelles organizaciones y pueblos que lluchen escontra cualisquier tipu de primición ye una xera na que’l pueblu asturianu foi n’abondes ocasiones emisor y receptor.

                El proyectu d’IZQUIERDA ASTURIANA nun ye aislacionista, sinón que ye consciente de que’l nuestru llabor ta ensertu nuna dinámica que va muncho más allá de les llendes d’Asturies, y más tovía en viendo que cada vez ye mayor la internacionalización y interrelación de los poderes económicos, que fai que los procesos políticos de países alloñaos de nós puean afectanos grandemente. L’internacionalismu pasa asina a ser non una actividá humanitaria, sinón una necesidá política. Esta concepción de la solidariedá internacionalista supón un francimientu pa col solidarismu asistencial y/o verbal, que nun va más allá de l’ayuda hunanitaria o l’apocáu apoyu públicu, y una crítica del internacionalismu d’embaxada, que tracamundia solidariedá internacionalista col sofitu incondicional y la subordinación de l’actividá política propia a los intereses de talu o cualu Estáu presuntamente modélicu. IZQUIERDA ASTURIANA defínese como un partíu dafechamente internacionalista que, dende la so postura de proyectu soberanu, ye asina solidariu con tolos pueblos que lluchen escontra’l totalitarismu, l’imperialismu y cualisquier triba de primición.

52. La nuestra autodefinición como partíu internacionalista y solidariu ye fondamente contradictoria col patrioterismu clásicu del Estáu-nación (enforma acentuáu nos tiempos de crisis económica y que fai ver a los y les trabayadores d’otros países como competidores y non como aliaos potenciales na llucha pola emancipación) y tamién colos vieyos prexuicios nacionales, que parten del despreciu y la caricaturización de los pueblos vecinos. Al mesmu tiempu, ye incompatible col plantegamientu neolliberal de pasar del nacionalismu xovinista d’Estáu-nación al nacionalismu xovinista d’Europa Occidental, tovía más peligrosu en tanto que tiende a presentase como daqué progresista, solidario y superador d’antagonismos nacionales, cuando en realidá lo que fai ye elevar esos antagonismos a un nivel intercontinental. Por último, la definición d’internacionalistes y solidarios tamién cinca la cuestión de la inmigración, xera na qu’Asturies tamién foi, y de xuru va ser, n’abondes ocasiones emisora y receptora. Pa IZQUIERDA ASTURIANA, ye asturianu o asturiana tou aquel o aquella que viende la so fuerza de trabayu n’Asturies y se sienta participe na construcción d’esti país, independientanente del so llugar de nacimientu. Al mesmu tiempu, son tamién asturianos toos aquellos homes y muyeres que nes décades anteriores viéronse obligaos, por razones económiques y/o polítiques, a marchar d’esti país y que tovía güei trabayen nos sos países receptores por caltener la so cultura y identidá asturiana. D’otru llau, ye xera obligada pa tola izquierda consecuente’l sofitu y la solidariedá colos esiliaos políticos y/o económicos d’otros países.

53. La defensa d’un proyectu nacional, y precisamente por eso, fondamente solidariu, puede abultar como daqué raro a los güeyos d’esa izquierda que pretende tener la patente del internacionalismu y que s’escuda nel mesmu pa tapecer, les más de les veces, un inconfesable nacionalismu españolista, que parte del despreciu y l’amenorgamientu de toles cultures perifériques del Estáu, anque hacia afuera presente una imaxe solidaria y comprometida. Esa izquierda, amás, ye una de les mayores responsables de la consolidación y l’espardimientu ente los sectores populares del patrioterismu d’Estáu-nación, los prexuicios nacionales y l’euroxovinismu, quedando asina políticamente incapacitada pa exercer un papel lliberador. La izquierda sucursalista allugada n’Asturies nun ye criticable polo que tien de internacionalista, sinón polo que nun tien, que ye muncho.

Asina, la famosa contradicción dialéctica formal ente nacionalismu-internacionalismu, yá tratada n’otra parte d’esti documentu, ye daqué más que formal ente esa izquierda fetichista del Estáu-nación y enllena de prexuicios grannacionales, asina como nesi nacionalismu pretendidamente d’izquierdes enfotáu nel narcisismu embeliguista y que de xemes en cuando s’empapiza col discursu demagóxicu d’una solidaridá y un internacionalismu tan proclamaos al altu la lleva como poco practicaos.

POLA IDENTIDÁ D’ASTURIES

54. No que güei ye’l territoriu de la Comunidá Autónoma d’Asturies, y perpasando les sos llendes actuales, foi constituyéndose una manera peculiar d’adaptación al mediu y d’interpretación del mesmu, una manera de ver el mundu y les relaciones humanes, lo que constitúi una identidá étnica. Esti procesu ye dinámicu, de manera que nun ye lo mesmo la identidá asturiana de la dómina prerromana, romana, medieval, moderna, etc. anque toes seyan fíes unes d’otres. Nun hai que confundir esto con esencialismu, sinón simplemente entendelo como’l procesu históricu que se concreta na esistencia d’una identidá asturiana contemporánia compuesta por fechos culturales. Parte de la población d’Asturies asume esos fechos dende’l puntu de vista funcional (comportamientos sociales, llingua, cultura material…) y son los depositarios directos de la identidá cultural. Na sociedá actual, el procesu d’autoidentificación y pertenencia a un grupu vese reforciáu pol usu de los fechos culturales como marques d’identidá. Esti procesu ye asumíu n’Asturies por un grupu humanu que nun tien necesariamente que coincidir col anterior, pero que xunta elli ye tamién depositariu (indirectu) de la tradición.

La población actual d’Asturies ye polo tanto heriede d’una identidá cultural propia. Pero ye evidente que en toa sociedá estremada en clases sociales dase siempre la coesistencia de dos cultures o formes d’entender la cultura nacional: la de la clase dominante y la de la clase dominada, tanto na cultura material (arquitectura, ferramientes, artesanía…) y la non material (folklore, llingua, mitos…), toes dos espresiones del mou de vida de les clases productores, habiendo tamién unes formes ideolóxiques (la relixón, los tabús sociales, la concepción patriarcal de la familia, la pirámide social…) que son les qu’estructuren el discursu dominante empobináu a tapecer y da-y coherencia a una realidá nacional de clases sociales contradictories.

Nel casu asturianu, asumimos un conceptu de cultura nacional prácticamente identificable dafechu col de cultura popular, yá que la nuestra burguesía, consecuentemente cola so falta d’autonomía económica, refugó dafechu de la llingua y la cultura asturiana, renunciando a una ideoloxia propia, y asumiendo voluntariamente la llingua castellana y la cultura españolista. Asina, la élite económica y política d’Asturies nun tien un discursu cultural propiu, sinón ún subsidiariu de la metrópoli y resignáu a exercer de periféricu (lo mesmo que la estructura económica o l’abanicu de fuercies polítiques). Poro, el discursu cultural güei dominante n’Asturies ye la plasmación ideolóxica tanto de l’alienación de clase como de l’alienacion nacional que sufre’l conxuntu del pueblu trabayador asturianu.

55. Nesti contestu, la llucha cultural pasa a ocupar un papel enforma importante, más inclusive que n’otres sociedaes nacionales más conscientes de só y con una clase dominante con un discursu cultural propiu. Asina, el procesu de dignificación de la cultura autóctona muestra un doble calter progresista: permite combatir los prexuicios idiolóxicos de la clase dominante ente la población trabayadora y sirve pa iguar un discursu cultural específicu, qu’identifica al pueblu trabayador cola nación, al ser ésti la clas productora y fonte de la riqueza del país. Pero ye tamién progresista porque’l fechu de que’l pueblu trabayador d’esti país s’autoreconoza como asturianu ye condición sine qua non pa iguar un proyectu políticu alternativu que recueya los intereses y aspiraciones d’esa clase social. Un pueblu brétigu, consciente de soó y de la so fuercia, ye muncho más revesosu de dominar y xuncir a una realidá inxusta. Por eso históricamente, nel procesu de criación de los Estaos-nación y de los grandes mercaos nacional-estatales, intentóse, dende les instancies de los poderes centrales, homoxeneizar a toles poblaciones xuncíes al so dominiu, reprimiendo, con una brutalidá variable según los casos, a toles minoríes (llingüístiques, relixoses, étniques…). Esti procesu vese güei ampliáu a nivel mundial, por mor de la espansión de la civilización europea occidental y norteamericana a tol mundu y la imposición progresiva d’unos mesmos vezos consumistes que cinquen a tolos aspectos de la vida pública y privada de les persones. N’oposición a esto, defendemos la identidá de los asturianos y asturianes como contribución al mosaicu cultural universal, y por ello con valir en sí mesmu. Nesti sen, llucharemos escontra l’asimilación cultural y l’aculturación, y fadrémoslo tamién por velos como procesos de dominiu ideolóxicu, que suponen l’aniquilamientu étnicu d’Asturies, y que traeríen una mayor inadaptación de la población al mediu.

56. IZQUIERDA ASTURIANA trabayará pola dignificación de los fechos culturales, por espardelos y difundilos ente tola población asturiana como mediu pa reforciar el sentimientu de pertenencia a un grupu étnicu, dinamizador social de muncha importancia y eslabón pa la integración del individuu nel conxuntu de la humanidá. Puxará pol caltenimientu dinámicu de la identidá asturiana. Esta apuesta pola dignificación de la nuestra cultura popular implica qu’esta dexe de tar arrequexada nel so propiu país y pase a ser la dominante nel mesmu, talantando por esto non la imposición totalitaria de la llingua y toles manifestaciones culturales propies, sinón la concienciación del conxuntu’l país del valir de la nuestra cultura autóctona, de la importancia de la so conservación, usu y espoxigue pa dexar a les xeneraciones venideres, y de la so oficialización nos poderes públicos y mui especialmente na alministración, na educación y nos medios de comunicación. Trátase d’algamar la cotidianeidá de la llingua y la cultura asturianes nel conxuntu de los nuestros conciudadanos y conciudadanes, invirtiendo la situación actual na que amplísimos sectores sociales ven esto como daqué ayeno o desconocío. La llingua asturiana constitúi asina un elementu fundamental, porque axunta’l carácter funcional y el de marca étnica, y porque ye’l mediu pel que mos llega la nuestra esperiencia histórica y los nuestros valores sociales. IAS tamién habrá de tomar conciencia de llingua minoritaria del asturianu, polo qu’habrán d’iguase los mecanismos amañosos que garanticen la so supervivencia.

Esa apuesta ha de dir muncho más allá de les meres declaraciones verbales de sofitu, sinón qu’ha d’igüase fundamentalmente al traviés del usu davezu por tolos axentes sociales.

57. Esi procesu de recuperación y dignificación de la llingua y la cultura asturianes ha de dir paralelu a la oposición y crítica del cosmopolitismu afaláu por delles minoríes oligárquiques, qu’apuesten, en nome d’un presuntu petite pol mestizaxe, pol esanicie dafechu de les cultures minoritaries y minorizaes nes manes de les más fuertes, pretendiendo imponer un mesmu patrón cultural a tolos pueblos de la Tierra (patrón, per otra parte, solo aplicable a pequeñísimes élites d’esos pueblos, pues la cultura d’un país nun ye solo resultante de los sos condicionantes sociales y políticos, sinón tamién xeográficos, relixosos y inclusu climáticos, que, evidentemente, son estremaos en toles partes del mundu). Esta crítica del cosmopolitismu nun implica, de nenguna manera, el menospreciu a otros pueblos nin la concepción de la cultura propia como daqué acabao, perfecho, inmutable o impermeable a otres influencies culturales, sinón que parte d’entender al mestizaxe, nel casu de dase, como un procesu natural, non impuestu, y que contribúi a arriquecer la vida de los pueblos y non a emprobecelos nin a uniformizalos, pero somos conscientes de qu’esos procesos, siempre valorables, solo puen dase cola preservación de les identidaes estremaes. Pa qu’esto seya dable, ye preciso arrequexar toa idega de cultures superiores y inferiores, y asumir, ensin complexu nengún, que la llingua y la cultura asturianes, lo mesmo que padrimoniu del nuestru país, sonlo tamién, como toles otres cultures, de la humanidá.

POR UNA NUEVA ÉTICA SOCIAL.

58. Énte los revesosos momentos pelos que ta pasando Asturies, paezmos imprescindible una inyección de moral al conxuntu de la sociedá, y mui especialmente, a les instituciones. La llamuerga na que la clas política ta fundiéndose ye tala que llega a chiscar al conxuntu de los ciudadanos y ciudadanes, al sofitar un conformismu y un desentendimientu cómplice cola corrupción y el lladrociniu institucionalizáu.

Entendiendo que la necesaria renovación y redefinición del discursu socialista pasa, anantes de nada, per una rexeneración moral y por otres formes de facer política y viendo a esi modelu social a construyir como daqué más qu’una mera estructura económica, apostamos por un nuevu códigu de valores que se correspuenda con esa nueva sociedá por facer.

Trátase asina de ver que pa qu’una estratexa de calter democráticu y tresformador cuaye ente la xente y llegue a tener una proyección de mases, faise preciso recoyer y reformular los aspectos más progresistes y solidarios de la cultura nacional, lo que tien muncho que ver col combate pola dignificación de la cultura autóctona. La llucha escontra l’oportunismu, el desentendimientu, la inorancia, l’aislacionismu y l’egoísmu ye paralela al afitamientu paulatinu d’una nueva ética, más solidaria, llibre y democrática, faciendo yá güei la mentalidá que seya a construyir mañana una sociedá más xusta. Esta forxa de la moral del productor ye condición indispensable p’avanzar nel camín de socialismu, entendiendo a ésti como l’autogobiernu de los pueblos, que será imposible dafechu con una población educada nos valores del individualismu, la insolidariedá o el consumismu.

                59. Poro, l’afitamientu paulatinu d’una nueva ética social habráde facese n’oposición constante colos valores dominantes, ente los que sobresalen un darwinismu social que mos lleva a la llei de la selva y al esguarnimientu social, y una doble moral vixente na clase política pero tamién en amplísimos sectores sociales, que mos lleva a la cotidianeidá de la hipocresía y la indignidá.

Esta oposición a los valores del discursu dominante ha de vese como daqué permanente y irrenunciable, yá que l’asunción del conformismu lleva irremediablemente a la vuelta p’atrás nesos espacios algamaos, viéndose esto claramente nel casu asturianu cola autorrenuncia moral de ciertos partíos y organizaciones históriques de la izquierda.

60. La nueva ética social pola qu’IZQUIERDA ASTURIANA apuesta tien una doble dimensión, pública y privada, individual y colectiva. Trátase de la defensa y la práctica permanente y consecuente d’unos principios na vida pública y na privada, pa fuxir de toa doble moral, y tanto nel tarrén individual como nel colectivu, siendo asina’l partíu la ferramienta al traviés de la que dir espardiendo esi códigu de valores en toles estayes de la vida social. Esto llévamos a la necesidá d’iguar un discursu coherente que desenrolle una acción política alcorde colos principios, por contra de como suel ocurrir col pragmatismu dominante, cuando la teoría pasa a ser la xustificación a posteriori de l’acción política. Asina, el llabor políticu ha de dir empobináu hacia la xeneralización de les idegues, y non les idegues en función de l’acción política desenrollada.

La práctica d’una ética colectiva que nun coarte la llibertá individual, y l’apuesta pola solidariedá, la responsabilidá, l’austeridá y la coherencia, la moral del productor, en definitiva, ye una xera que va muncho más allá de les declaraciones xenerales, sinón qu’implica la conocida idega de predicar col exemplu, sometiendo a xuiciu constante a IZQUIERDA ASTURIANA non solo poles sos declaraciones y manifiestos públicos sinón, más que nada, pola práctica diaria individual y colectiva de la so militancia.

CONCLUSIÓN: UNA ESTRATEXA POPULAR.

61. De lo anantes espuesto dedúzse que la estratexa d’IZQUIERDA ASTURIANA ta alloñada de tou tipu de mesianismu o concepción elitista de l’acción política. Esto ye asina porque pal desenrolle dafechu d’estos ambiciosos oxetivos estratéxicos ye imprescindible la participación masiva y consciente de la mayoría de la población, siendo la conquista de los corazones l’enfotu cimeru del nuestru llabor políticu.

Nun se trata d’esperar a tener el poder pa facer les coses, sinón de da-y el protagonismu a la sociedá, faciéndola exercitar esi poder lexítimu de só dende la basa. Poro, entendemos que l’autodeterminación colectiva del pueblu asturianu ye imposible ensin l’autodeterminación individual llibre y consciente de tolos ciudadanos y ciudadanes; que la construcción d’una democracia socialista ye consustancial a l’autoxestión del conxuntu de la sociedá; que’l llogru d’un modelu ecolóxicu de crecimientu económicu nun ye vidable ensin cambios cualitativos bien importantes nos vezos de consumu y de comportamientu pa cola Naturaleza de la mayoría de la población; que l’aplicación dafechu de los derechos humanos solo ye dable si partimos del conocimientu y la conciencia colectiva d’esos derechos; que la solidariedá ente los pueblos va xunida al esanicie de toa triba de prexuicios nacionales y d’estremación ente cultures supeciores y inferiores; que la dignificación de la llingua y la cultura asturianes ta inevitablemente vinculada al compromisu del pueblu asturianu con esa cultura de só; que tolo anterior, en definitiva, nun ye a realizase ensin una sociedá civil fuerte, con una nueva moral cívica y consciente de les sos obligaciones y derechos.

Poro, p’algamar esos oxetivos ye necesario partir de la concienciación popular, diendo al raigañu de les coses -y siendo, por ello, un partíu radical nel sen más puru de la palabra- y refugando tanto de la demagoxa masimalista, que lleva a la impotencia política y a la desmobilización d’esos sectores previamente seducíos poles promeses fáciles, como del espeyismu electoralista, que lleva al elitismu y reduz el componente de la participación popular a la mera presencia nos mítines y nes votaciones.

Ciertamente, ye esi’l camín más revesosu y tardiegu, pero ye, tamién, el más seguru. Y ye tamíén el que precisa, amás d’un Norte definíu -los oxetivos estratéxicos- d’un llabor políticu fondamente apobináu na realidá diaria, y d’un modelu de partíu que seya a empobinar esi llabor políticu hacia’l llogru d’esos oxetivos finales. En definitiva, una estratexa popular precisa d’una praxis popular y d’un partíu igualmente popular pa ser a tar al altor del so voluntariamente asumíu papel históricu.

                III. Praxis política y modelu de partíu.

TÁCTICA Y ESTRATEXA.

62. Del análisis concretu de la nuestra realidá concreta surden les llínies d’actuación y el modelu de partíu necesarios nesti momentu p’algamar los nuestros oxetivos. Eses llinies d’actuación pasen per definir concretamente: a) cuálos son los pilancos que tien la sociedá asturiana p’avanzar, b) qué propuestes tenenos pa derromper esa situación y, c) con qué fuercies vamos intentar dibxuar un proyectu de país más xustu, llibre y solidariu.

                62.1. No que cinca a lo primero, eses torgues son, fundamentalmente, un marcu económicu en decadencia, caracterizáu pola anulación dafechu de la empresa pesada pública, les sos empreses ausiliares, l’amenorgamientu hasta mínimos del campu y la pesca y l’ausencia crónica d’unes bones infraestructures comunicatives; un procesu d’esgonciamientu social por mor del éxodu zural, el paru masivu, la corrupción, l’espardimientu la drogodependencia y el fracasu del modelu educativu, lo que trai darréu una auténtica crisis de valores, manifestada nel procesu d’aculturación del país; un marcu xurídico-políticu claramente insuficiente, con una Constitución inmovilista, un Estatutu d’autonomía ensin competencies, una Xunta Xeneral ensin capacidá lexislativa real y un Gobiernu autonómicu que refuga de les sos obligaciones pa col pueblu que lu escoyó; y un mapa políticu domináu pol sucursalismu y l’oportunismu, espeyáu nunes fuercies polítiques ensin proyectu específicu p’Asturies y enfotaes en caltener la so base electoral al traviés de l’anestesia política de la población.

                62.2. Delantre esa situación, les nuestres propuestes han de dir empobinaes hacia una redefinición del marcu de relaciones económiques actualmente vixente, cola xestión por parte de les instituciones asturianes de los recursos económicos del país, la potenciación d’una economía mixta na que’l sector públicu y les cooperatives xueguen un papel central, con especial precuru pola conservación del mediu ambiente, y una política fiscal controlada dende Asturies; una riestra de reformes sociales como la protección de los derechos llaborales, la democratización del sistema educativu y los medios de comunicación o la reforma sanitaria; una reforma institucional que contemple un marcu d’autogobiernu real, una nueva llei electoral y de financiación de partíos y la criación de mecanisrmos de democracia más directa como los referendum vinculantes y les iniciatives lexislatives populares; una integración rexonal del país, pa impedir l’arrequexamientu de les comarques menos poblaes o puxantes económicamente; y una apuesta definida pola normalización de la llingua y la potenciación de toles demás manifestaciones de la cultura asturiana.

                62.3. Pa ser a dar esos pasos, les nuestres alternatives han de dir en tres planos, como son, nel tarrén políticu, la collaboración, nos niveles que dicte la situación, con toles fuercies polítiques que defendan un proyectu asemeyáu; no que cinca a los movimientos sociales yá esistentes, trátase d’incorporalos a esi proyectu dientro del so ámbitu específicu; y, n’otres manifestaciones de la sociedá civil, de favorecer el so espoxigue organizativu y políticu y averales a esi procesu unitariu.

Esta triple dimensión de la estratexa d’IZQUIERDA ASTURIANA no que cinca a les fuercies polítiques y sociales interesaes n’avanzar na democracia precisa de fondos estudios de la realidá económica y social del país, pa ser a caltriar qué sectores sociales puen ver como beneficiosa una salida nacional a la crisis del actual modelu.

63. Ser a dibuxar una táctica y una estratexa alcordes coles desixencies del momentu que vivimos, dándo-y un conteníu programáticu claru, pasa, fundamentalmente, por trés etapes:

                63.1. A curtiu-mediu plazu, trátase d’afitar a IZQUIERDA ASTURIANA como proyectu autónomu, con presencia propia na realidá social, ensin fuxir con ello de la collaboración con otres organizaciones de calter asemeyáu, collaboración que será más o menos estable y fonda según dicten les circunstancies.

63.2. A mediu-llargu plazu, el llabor políticu d’IAS dirá empobináu a la igua d’un ampliu frente social y políticu de puntos mínimos que ponga los pegollos pa un auténticu desenrollu autónomu del país.

63.3. A más llargu plazu, l’oxetivu será estructurar un bloque social alternativu pola soberanía nacional y la democracia radical, que sería la continuación lóxica del procesu d’acumulación de fuercies precedente.

Esta concepción de los plazos nun implica, de nenguna manera, entendelos como elementos aislaos unos d’otros, con grandes francedures al pasar d’una etapa a otra. Por contra, l’afitamientu y espardimientu organizativu y políticu d’IZQUIERDA ASTURIANA pue dir paralelu a la igua d’esi proyectu de puntos mínimos, lo mesmo qu’esi procesu nun implica dexar pa más alantre la defensa del proyectu a llargu plazu y el programa másimu. Trátase, cenciellamente, de pescanciar en cada momentu cuálu ye’l nivel de conciencia de la opinión pública pa tener una praxis coherente que puea dir enanchando y afondando nesa conciencia colectiva.

64. Los pegollos sobre los que ha d’afitase y espardese’l proyectu d’IAS ente la sociedá asturiana han de ser los que vienen darréu:

64.1. En primer llugar, una gran capacidá d’análisis teóricu, históricu y socioeconómicu. Análisis teóricu pa ser a interpretar y adaptar a la realidá asturiana tou esi pensamientu padrimoniu de la izquierda mundial; análisis históricu pa ser a conocer la nuestra realidá y el porqué de la mesma; análisis socioeconómicu pa ser a proponer alternatives válides y vidables na Asturies d’anguaño. Ye tamién necesario esa capacidá analítica pa fuxir del aislacionismu y la creencia infantil de que la nuestra situación ye única nel mundu y que lo qu’ocurre fuera de les nuestres llendes nun mos afecta. Y tamién pa ser a talantar esto como un proyectu global, esto ye, asumir, dende la nuestra condición d’asturianos, la necesidá de desplicar el nuestru marcu específicu nel contestu internacional, y la concepción d’esi proyectu como daqué más qu’una cenciella alteración de les actuales polítiques culturales o de la terminoloxía institucional, sinón como una alternativa en toles fasteres de la sociedá asturiana.

64.2. Esa capacidá analítica tien de concretase nel nuestru marcu específicu: Asturies. Ye lo que se conoz como análisis concretu de la realidá concreta. Esto nun quier dicir, de nenguna manera, que fagamos abstracción de los marcos más amplios nos que mos desenrollamos (Estáu Español, Unión Europea…) sinón que ye de la nuestra realidá diaria dende onde tien de salir la solución a les nuestres contradicciones y non esperar a que vengan d’afuera les recetes pa la nuestra situación.

64.3. Amás d’esa capacidá d’analís y d’esa voluntá d’asumir el nuestru marcu nacional fai falta’l madurecimientu políticu necesariu pa toa acción política. Yá valió de personalismos, conspiraciones, sectarismos, encerrizamientos inútiles y toa mena de zunes y xeitos propios de movimientos políticos herméticos, que faen asumir a la izquierda nacionalista una dinámica de guetto que mos alloña de la sociedá asturiana. Y yá valió tamién d’esperimentos presuntamente unitarios ensin bases polítiques consolidaes y durables. Hai d’algamar la unidá pero tamién hai de saber caltenela.

64.4. Pa ser a desenrollar una praxis mínimanmnte coherente dende una perspectiva d’izquierdes, hai que tener una política clara nos movimientos sociales. Hasta agora, vemos como hai una dixebra evidente ente los movimientos sociales de calter cultural y llingüísticu, cuasi l’únicu ámbitu d’actuación de la izquierda nacionalista, y tolos demás (movimientu de solidaridá internacionalista, ciudadanu, educativu, ecoloxista, polos derechos humanos, etc.) que paecen como propios del restu de les fuercies d’izquierda. Pa nós ye imprescindible acabar dafechu con esto, yá que si realmente lluchamos por iguar un proyectu políticu propiu p’Asturies, esi proyectu pasa per tener polítiques coherentes pa y en tolos movimientos sociales, yá que toos trabayen temes qu’afecten directamente a la nuestra realidá social. Y tener política coherente hacia ellos, y nellos, nun significa facer un llamáu al masuñamientu partidista de los mesmos, sinón trabayar y facer que furrulen, asina como averalos a una estratexa coherente cola realidá nacional d’Asturies.

Casu aparte merez el movimientu sindical. Hasta agora nun hebio nenguna política sindical consciente y continuada empobinada a algamar un viraxe estratéxicu hacia’l nacionalismu nes centrales sindicales, quedando too namás que n’honráu voluntarismu de los menos y palos de ciegu de los más, salvo escepciones. IZQUIERDA ASTURIANA apuesta por un mayor compromisu col y nel movimientu sindical, que ye nesti momentu ún de los mayores preseos de los trabayadores d’Asturies pa encarar la crisis.

64.5. No que cinca a la cuestión institucional, IAS quier refugar tanto del maximalismu anti-institucional como del espeyismu parllamentariu. Si somos a talantar les instituciones representatives al traviés de les que s’articula güei la política asturiana (conceyos, Xunta Xeneral y parlamentos español y européu) non como fines, como oxetivos en sí mesmos, sinón como medios, como un foru más nel que desenrollar la nuestra acción política, si realmente somos a ello, taremos dando’l pasu definitivu pa superar l’oportunismu electoralista y el xeitu testimonialista y presuntamente radical.

64.6. Si pretendemos facer usu de tolos foros y preseos de participación política que podamos, tien de ser pa facer una política non solo guapa, sinón tamién útil. Esto ye, ser a presentar alternatives a tolos niveles y en toles temes, a curtiu, mediu o llargu plazu, y non posponiendo les alternatives a un futuru alloñáu y presuntamente maravillosu nel que too será perfeuto. Esto tien muncho que ver con esa concepción global de la qu’anantes falábemos, con esa construccion d’una izquierda nacional p’Asturies. Ye, en definitiva, la normalización política de la praxis nacionalista nesti país.

UN PROYECTU DE PUNTOS MÍNIMOS.

                65. Arriendes de los oxetivos cimeros qu’IZQUIERDA ASTURIANA defende, paezmos enforma importante facer una concrección táctica d’ellos, un programa mínimu que guíe la nuestra acción política inmediata. Queremos dicir con esto que nun tenemos vagar n’almitir cuales son les nuestres aspiraciones finales, pero qu’hai tamién que tener en cuenta el grau de conciencia y la correlación de fuercies que tien güei la sociedá asturiana. Si presentamos, equí y agora, el nuestru programa másimu (soberanía nacional, democracia socialista…) como la nuestra plataforma política inmediata, taremos perpasando el nivel de conciencia del pueblu asturianu y esos oxetivos nun serán almitíos. Pero si sabemos presentar propuestes realistes, oxetivos concretos que seya posible algamar, una vez llograos podremos siguir avanzando, y taremos popularizando el nuestru programa, faciendo que la sociedá asturiana lu asuma como daqué necesario y impostergable.

66. Esi programa mínimu que puea servir como oxetivos concretos alredor de los que mobilizar a la mayoría del país, concrétase en siete puntos que son los pegollos sobre los qu’algamar los nuestros oxetivos estratéxicos:

                             66.1. Criación d’un marcu d’autogobiernu dafechu, que supere l’actual marcu constitucional. Paezmos que la primer condición pa un desenrollu nacional mínimamente autónomu ye la de tener un marcu xurídico-políticu afayadizu, basáu na llibre xuntura de les partes y non na imposición d’un Centru que cede graciosamente competencies. Esa necesidá de superación del actual marcu constitucional ye’l resultáu lóxicu del so agotamientu, yá que la insatisfactoria capacidá competencial del Estáu de les Autonomíes ye tala que nun ye posible’l so desenrollu dientro del actual contestu llegal. Arriendes d’esto, ye condición indispensable pa un mínimu autogobiernu el control y la xestión de les fontes económiques, pa lo que ye preciso un conciertu económicu col Estáu, la criación d’un Bancu públicu asturianu y el control de la empresa pública asitiada n’Asturies.

66.2. Midíes económiques progresistes, empobinaes a algamar una economía mista con un importante sector públicu, el sofitu a les cooperatives, especialmente nel mediu rural, y que torgue l’allugamientu n’Asturies de les multinacionales; al empar, ye indispensable la xestión dafechu de la Seguridá Social, oponiéndomos a la privatización de la sanidá y del sistema de pensiones. Ye tamién necesaria una reforma llaboral que-y ponga acabu al trabayu precariu y a la sobreesplotación de la xente mozo, y una política de planificación de la economía, pa xestionar de modu eficaz los recursos naturales y dirixir un plan de reindustrialización d’Asturies.

66.3. Una política medioambiental seria y non especulativa, que controle’l turismu, puxe pola integración rexonal del país, torgue l’espardimientu de les empreses papeleres y químiques altamente contaminantes ponga especial acentu na construcción d’empreses de reciclaxe, esparda nuevos vezos de consumu y potencie los tresportes.

66.4. La defensa de los derechos democráticos, que pasa, ente otres coses, por una reforma del sistema electoral y de la financiación de los partíos, que-y dea igualdá d’oportunidaes a toles opciones polítiques; una reordenación y democratización de les fuercies policiales; una nueva llei de fuelga, que nun restrinxa esi lexítimu derechu; y una descentralización del poder políticu asturianu, pa nun repetir l’esquema central de centru y periferia.

66.5. La solidariedá colos pueblos, al traviés tanto d’una peramplia rede social de solidariedá, como de l’ayuda, dende los poderes públicos, al crecimientu de los países del Sur, con fondos xestionaos poles organizaciones non gubernamentales, pa facer de la solidariedá non una actividá caritativa, sinón un llabor de claru calter progresista nel que los protagonistes han de ser siempre los ciudadanos y ciudadanes. Al mesmu tiempu, ye necesario defender el derechu d’asilu pa toa triba d’esiliaos políticos y económicos.

66.6. La dignificación de la cultura asturiana, asina como la so normalización social dafechu. Pa ello, fáise necesario una llei d’oficialidá de la llingua asturiana en toles estayes de la vida pública y una política coherente de normalización; la defensa d’una educación pública, gratuita y laica, dende la escuela primaria a la Universidá, qu’ha de cumplir la función de faru cultural del país; la criación d’una radiotelevisión pública asturiana y d’una amplia rede cultural (musical, folklórica, deportiva, etc.) asequible pa tola ciudadanía, y la defensa d’unos nuevos vezos de consumu que superen l’actual concepción del tiempu llibre na que la población nun ye sinón mera espectadora pasiva. Fai falta tamién una política cultural que-y ponga acabu al antagonismu campu-ciudá y a los prexuicios sobre’l mundu rural, asina como a toa triba de cantonalismu.

66.7. L’espardimientu d’una nueva ética social, tanto nes instituciones como nel conxuntu de la sociedá, pa lo qu’habrá d’esaniciar toa triba de lladrociniu y tracamundiu ente l’interés xeneral y el priváu; recuperar el valir de l’actividá política como un xeitu d’entrega y xenerosidá, a la escontra de como ye yá vezu ente la clase política; una llei d’incompatibilidaes ente cargos públicos y actividá profesional privada, asina como la lexislación d’un tiempu másimu d’exerciciu de cargos electivos; la educación de la población nos valores de la solidariedá, la tolerancia y la xusticia, puxando por una mayor participación ciudadana na actividá política y la másima tresparencia na xestión de los fondos públicos.

67. La concrección d’esti programa puede –debe- superar les llendes organizatives d’IAS en tanto que ye susceptible de ser asumida por otres opciones polítiques y sociales. Esto ye, en viendo l’actual coyuntura histórica na que mos topamos, d’agresión xeneralizada en toles fasteres, entendemos que ye posible, y necesario, la construcción d’un amplísimu frente político-social, qu’axunte, nesi proyectu de puntos mínimos, a tolos sectores sociales oxetivamente perxudicaos pola crisis, y que ven como necesidá impostergable un procesu de rexeneración económica, social, política, cultural y ética dende una óptica nacional y progresista. La concrección política qu’esta comuña d’intereses puea tener nun ye cuestión pa falar equí. Podrá ser un frente de calter políticu-electoral o namás qu’una plataforma d’organizaciones sociales y polítiques o podrá haber otros niveles de vinculación. En tou casu, fáise necesario estremar la igua d’esi bloque social alternativu cola construcción d’IZQUIERDA ASTURIANA como proyectu autónomu. Estremación ésta que fai de los dos procesos daqué non contradictorio, sinón claramente complementario. Asina, faciendo IAS taremos ayudando a articular la sociedá asturiana, y, consolidando esi frente ampliu de puntos mínimos, taremos popularizando el nuestru programa y dando los primeros pasos hacia’l so llogru.

D’otru llau, ye necesario sulliñar otra vuelta qu’IAS curiaráse muncho de nun rebasar el nivel de conciencia política de la sociedá, y qu’intentará dir siempre un pasu per delantre d’esi nivel y non milenta. Asina, si somos a llograr les másimes competencies, inclusive dientro d’esti escasu marcu llegal, taremos avanzando hacia la nuestra soberanía; si-y ponemos llendes al lladrociniu institucionalizáu, taremos algamando l’afitamientu progresivu d’un nuevu códigu de valores; si mos plantegamos oxetivos concretos, como preseos pa siguir avanzando, y non como fines en sí mesmos, taremos poniendo los sofitos pa la consecución de los nuestros oxetivos cimeros.

EL MODELU DE PARTÍU.

                68. P’algamar unos oxetivos colectivos, y especialmente unos oxetivos tan ambiciosos como los nuestros, fai falta una ferramienta igualmente colectiva cola qu’incidir na sociedá: el partíu. Partíu que nun ye nada en sí mesmu, sinón que ta al serviciu d’unos oxetivos que tienen unos homes y muyeres igualmente concretos, polo que ta nuna evolución constante. Nun esiste asina una idega del partíu pa siempre, sinón que tien de ser una concepción enraigonada siempre coles situaciones concretes que van xenerándose en toa llucha social y política. Esta idega del partíu-ferramienta de tresforrnación social ye la de la llibre xuntura de les voluntaes d’homes y muyeres que, al traviés d’esi actu de llibertá que ye la militancia nun partíu d’izquierda, empiecen a ser llibres porque asumen voluntariamente’l ser elementos activos na tresformación social y na recuperación nacional. Al mesmu tiempu, un partíu que nun ye un fín en sí mesmu nin tampoco una Ilesia o una relixón, con dogmes y verdaes úniques y absolutes, sinón un partíu laicu, namás que depende de sí mesmu y el so futuru tará condicionáu polos sos aciertos y errores na xera de llevar a bon puertu esi proyectu de progresu.

69. Yá n’otra parte d’esti documentu dicíemos qu’IZQUIERDA ASTURIANA yera un partíu popular. Al dicir esto nun negamos el calter de clase del partíu, sinón que, refugando de tou mesianismu, perafitámonos na nuestra voluntá de ser la espresión política de tolos sectores populares que tean enfotaos na tresformación de la sociedá, y con unos intereses que coincidan con esa tresformación. Asina, el nuestru conceptu de trabayador ye’l de tou aquel o aquella que vive del so trabayu y non del ayenu, tanto si ye obreru industrial como campesín, pescador, funcionariu…, sectores qu’axuntamos baxo’l términu de Pueblu Trabayador. Poro, IZQUIERDA ASTURIANA defínese como un proyectu políticu de les clases trabayadores o del pueblu trabayador, porque queremos facer d’estos sectores los protagonistes de la nuestra sociedá.

70. Y siendo un partíu qu’aspira a ser la espresión política de la gran mayoría de la sociedá, surde la cuestión de si pretende ser un partíu de mases o de cuadros, problema ésti enforma discutíu ente la izquierda.

Históricamente, el partíu de cuadros tuvo’l so orixe nes necesidaes de la llucha clandestina, y taba formáu por militantes avezaos, con grandes conocimientos teóricos y muncha iniciativa política. Desgraciadamente, si nun se ye a tener unes relaciones estables col conxuntu de los movimientos populares, los partíos de cuadros acaben cayendo nel esencialismu, l’elitismu y el mesianismu, yá que, asina como los individuos producen depresión y esquizofrenia cuando s’aislen de la xente, los partíos políticos reproducen los mesmos esquemes cuando s’aislen de la sociedá, acabando asina por dixebrar la teoría de la práctica y diciendo coses que nun tienen nada que ver cola realidá, lo qu’afonda tovía más esi aislamientu. Resultáu bien poco prestosu d’esta forma organizativa foron bona parte de los partíos d’estrema izquierda d’Europa Occidental, auténtiques sonsañes de lo que pretendíen ser.

Pero tamién los partíos de mases, modelu organizativu más davezu na Europa Occidental pa los partíos d’izquierda, amosaron zunes enforma dañibles, como son el seguidismu acríticu de la basa respectu de la estructura dirixente, xerarquizada y burocratizada, asina como una cierta tendencia al pragmatismu, l’oportunismu y l’electoralismu na actividá política. Preba d’esto son los partíos socialdemócrates y bona parte de los PCs oficiales, que dexeneraron en mastodóntiques estructures burocrátiques cola participación institucional como exa central y cuasi única de la so actividá.

71. Inclusive viendo los riesgos qu’estes dos formes tienen, IAS apuesta, na actual situación social y política del país, por construyir un partíu de mases. Partíu de mases nun solo nel sen de ser munchos, sinón tamién nel de ser un partíu que tien los nicios fundíos dientro los sectores sociales que formen el cuerpu, esto ye, una relación constante con tolos sectores que puean ser incorporaos a un proyectu de tresformación social. Esta condición ye lo que permite pescanciar lo que vien de la sociedá, analizalo, ellaboralo y devolvelo a esa sociedá, yá que’l partíu nun ta solo pa recibir información, sinón pa tresformala en ferramienta d’acción política.

Y esa acción política nun ye solo protestar o sopelexar o facer propaganda, sinón dir xenerando hexemonía pa que la clase trabayadora, el pueblu organizáu políticamente, puea llegar a ser fuerza de gobiernu y, poro, ser a organizar la economía, la sociedá, tola vida nacional, llogrando asina un nuevu consensu que sustituya al que la burguesía dominante iguó durante tou esti sieglu na Europa Occidental. Trátase, en definitiva, de sustituyir un bloque históricu por otru, y eso solo ye a facese con unes grandes organizaciones sociales y polítiques nas que tea estructurada la mayoría de la sociedá civil, inclusive asumiendo tolos riesgos de burocratismu y oportunismu electoralista, que en tou casu son más reversibles que los de convertise nuna secta de mesíes y caderalgos en filosofía política.

72. La cuestión del calter del partíu ta mui vinculada a la relación colos movimientos sociales. ¿Dirección o interlocución? ¿supremacía o subordinación? IZQUIERDA ASTURIANA, na so llínia de procesu d’acumulación de fuerces pa xenerar una nueva hexemonía, va trabayar pola autoorganización de la sociedá civil, especialmente de los y les trabayadores y los sectores sociales marxinaos y amenorgaos, pa que tengan la capacidá de decidir el futuru del país, tanto al traviés de la democracia política como de nuevos órganos de control y xestión de la vida económica y l’actividá social. Nesa estratexa, tienen especial importancia los movimientos sociales, movimientos sociales que, caún na so estaya, desenrollen un llabor específicu que, dientro d’una estratexa xeneral, ayude a xenerar una mayoría nacional que dirixa un procesu de cambios al traviés del enanchamientu de la democracia y les sos formes d’exercela. El papel qu’un partíu ha de xugar nesi procesu ye una cuestión importantísima. Un partíu que pretenda dirixir la llucha política y inclusive un procesu de cambios sociales, tien d’exercer el papel de sintetizar los aportes d’eses lluches y esos movimientos sectoriales nun proyectu alternativu global. Y nun basta con recibir esos aportes, sinón devolvelos a los movimientos sociales intentando influyir nellos y na so estratexa. Esto nun significa, de nenguna manera, nenguna triba de masuñamientu partidista nin de desembarcu nos sos órganos de dirección, sinón puxar porque esos movimientos tengan una perspectiva xeneral de la situación del país y del papel que pueden y deben xugar nuna alternativa más amplia. Poro, nun se trata de ver al partíu como un simple amiestu de militantes nos movimientos sociales, sinón como una ferramienta que dea una visión global de la realidá y asina puea actuar pa cambiala, exerciendo, nesi sen, una dirección política.

73. El papel de los movimientos sociales y la so relación colos partíos ye una tema fondamente relacionada cola cuestión de la vanguardia. Una de les zunes más dañibles ente ciertes corrientes de la izquierda foi la d’autonomase vanguardia de too y de toos, sulliñando asina el calter protagónicu que la so organización debería xugar nun procesu de cambiu social. Llamentablemente, esi honor autoconcedíu solía dir acompañáu d’un ciertu mesianismu y complexu de predestinaos pola historia que, al enfrentase a asemeyaes pretensiones d’otres organizaciones tamién presuntamente vanguardistes xeneraron toa una riestra de lluches fraticides ente la izquierda que, ente l’ablucamientu d’unos y el gociu d’otros, gastaron munches enerxíes y esperances ente les fuerces de progresu.

IZQUIERDA ASTURIANA entiende que la vanguardia nun ye un títulu nin una condecoración qu’imponga naide y que se tenga pa siempre, sinón un papel a xugar en determináu momentu. Un partíu qu’aspire a ser el motor d’un procesu de rexeneración nacional y de fondos cambios sociales, que quiera ser la másima espresión política de la izquierda social, que quier que la mayoría de la población lu percancie como la opción más coherente y, poro, como’l so referente políticu, ye un partíu que llucha, en ciertu sen, por ser la vanguardia del pueblu asturianu, pero eso nun quier dicir qu’un partíu nazca yá siéndolo y/o puea selo dalgún día y pa siempre, sinón que ye un papel n’evaluación -y evolución- constante, y que nun tien por qué ser exercíu por una única organización, yá que nos procesos de cambiu, la dirección del bloque históricu pue tar en manes d’un solu partíu, más d’ún o nengún. Exemplos históricos hailos pa tolos gustos, y el llabor d’IZQUIERDA ASTURIANA nun ye facer futuroloxía, sinón esparder el so proyectu y el so mensaxe pa facer que’l pueblu trabayador asturianu vea a IAS como’l so referente políticamente organizáu.

74. Asumiendo como divisa la frase martiana facer ye la meyor manera de dicir entendemos que pa qu’esti proyectu puea ser creyible fae falta daqué más qu’esti documentu. Yá n’otra parte d’él sulliñábemos la importancia de la coherencia individual y colectiva na militancia política, y equí namás que diremos que l’actividá d’IZQUIERDA ASTURIANA habrá de tar siempre presidida pol másimu de democracia interna y de tresparencia, especialmente pa los sos cabezaleros y representantes públicos, qu’habrán de ser nes instituciones y en tolos foros de participación política modelu d’honradez, coherencia y austeridá, única manera d’esaniciar de la opinión pública los tópicos sobre l’actividá política y dir superando l’apatía de la población, que dirá menguando en tanto vaiga medrando un proyectu nel que se vea siempre la másima coherencia ente lo dicho y lo fecho. IZQUIERDA ASTURIANA quier ser esi proyectu.

Anuncios
Esta entrada fue publicada en IAS. Guarda el enlace permanente.