Trabe asoleya’l llibru ganador del XVII Premiu d’Ensayu «Máximo Fuertes Acevedo»

Asturies escaez a la so xente más brillante con una facilidá que sorprende. Eso-y pasó a ún de los artistes más bonos que diera esta tierra allá per finales del sieglu xix y los primeros años del xx: l’escultor uvieín Cipriano Folgueras. Ñacíu n’Uviéu, estudió en Madrid y Roma y viaxó per Italia y Francia, onde entró en contactu colos artistes de vanguardia, ente otros Rodin, y supo dir escaeciendo la escultura de trazu románticu pa xubise a un realismu incipiente, que-yos dio sonadía a delles de les sos escultures más consiguíes: Orestes persiguíu poles furies, Celta o Astur, Los primeros pendientes, El sacamueles… Sobre la so obra escribe Lluis Portal nesti volume que resultó ganador del XVII Premiu d’Ensayu «Máximo Fuertes Acevedo» y qu’agora ve la lluz.

La mala suerte acompañó a esti artista, que fue emponderáu y que recibió encargos públicos y privaos, pero del que malapenes se caltienen de pies unes poques obres: el Valdés Salas sedente del patiu del edificio históricu de la Universidá d’Uviéu, La vilba de Santander o’l panteón de los marqueses de San Xuan de Nieva nel cementeriu avilesín de La Carriona… Les más d’elles desapaecieron bien na Guerra Civil, bien nes telarañes del tiempu. L’autor quier con esti llibru rescatar del escaezu a un escultor d’importancia, y devolve-yos a los asturianos, si non les sos obres, sí la so memoria y l’alcordanza.

Lluis Portal Hevia (Villaviciosa, 1964) ganó per dos veces el Premiu Uviéu de Teatru coles obres Oh 36! (2007) y Poison (2008). Pelegrinos del abismu y El club de los valientes son dos noveles xuveniles, que-y fixeron algamar los premios de l’ALLA y d’Asturnews. Amás, tien escrites obres biográfiques (Francisco Balbín, Xiquín de Villaverde), etnográfiques (Secretos de Pandenes) y el llibru de cuentos Trófimo y Radamés.

Anuncios
Esta entrada fue publicada en Noticies. Guarda el enlace permanente.