Patrick Alan Zimmerman: «Hai una xerarquía llingüística, qu’amás de culturalmente, ta asentada políticamente»

Les Noticies

03/10/2012

Damián Barreiro

Patrick Alan Zimmerman (California, 1981) ye doctor pola Universidá Carnegie Mellon de Pittsburgh y acaba de publicar con Trabe Faer Asturies. La política llingüística y la construcción frustrada del nacionalismu asturianu (1974-1999). El llibru ye’l resultáu del trabayu fechu pa la so tesis doctoral, onde con un trabayu de campu –documental y oral– de gran caláu, l’autor céntrase nel casu asturianu como paradigma de frustración d’un nacionalismu que nació con Conceyu Bable y que nun foi a algamar relevancia dientro de la sociedá asturiana, a la contra de lo qu’asocedió n’otres comunidaes autónomes vecines, como Galicia, Euskadi, Cataluña o mesmamente Andalucía.

¿D’ónde-y vieno l’interés por estudiar el nacionalismu asturianu, un movimientu mui minoritariu en comparanza con otros asemeyaos dientro del Estáu español?

Préstame más centrame en dalgo menos estudiao. Yá hai una montonera de llibros sobre Cataluña o’l País Vascu, mesmamente sobre Galicia. Yo tengo una identidá complexa: soi fíu d’una emigrante china que casó con un americanu d’ascendencia xermánico-italiana. Dende neñu tenía consciencia de lo que podríemos llamar identidá construida. A partir d’ehí, estudié la historia d’Europa na universidá y pasé l’añu 2002 en Sevilla como estudiante estranxeru. Ellí noté la complexidá d’identidaes del Estáu español. ¿Por qué analizar el nacionalismu asturianu? Había una cuestión personal: siempre me prestó’l norte, porque San Francisco tien un clima asemeyáu al de Xixón. Pero tamién, al empezar a investigar vi qu’ente les rexones españoles con un sentimientu d’identidá más fuerte, depués de Cataluña, País Vascu y Galicia, ta Asturies. Por eso, preguntéme por qué nun pasara dalgo asemeyao nel terrén políticu. Propúse-y al director de la tesis analizar el nacionalismu asturianu, aceptó y llegue a Asturies…

Precisamente esi ye l’argumentu principal del so llibru, analizar como nun territoriu colos elementos fundamentales pal trunfu del nacionalismu –una llingua, una cultura y un sentimientu d’identidá-, eso nun llegó a pasar…
Nun hai una razón única, pero me parez que la causa ye una cuestión de tiempu. El nacionalismu catalán o gallegu empezó a desarrollase nos primeros años del sieglu XX, tien una historia dientro de la llucha antifranquista y xugó’l so papel na construcción del Estáu de les Autonomíes. Precisamente, Asturies foi’l primer territoriu del Estáu qu’accedió a l’autonomía al traviés de la vía lenta, lo que restrinxó les posibilidaes d’espoxigue identitariu. El títulu del llibru podía ser un El nacionalismu frustráu o L’asturianismu fragmentáu. La mayoría de los entrevistaos falábenme de cainismu. Yo nun sé si hai odiu ente l’asturianismu, pero lo que pue vese ye qu’hai elecciones nes que se llegaron a presentar hasta seis candidatures pa un porcentaxe de votos bien pequeñu. Hai un grupu de población –ente’l 3 y el 5% de los asturianos- que vota nacionalista, pero les papeletes repártense ente dos o tres partíos, dalgo que fai mui difícil llegar a les instituciones y poder desarrollar un programa asturianista a plazu llargu.

Fala de nacionalismu frustáu, ¿pudo notar esa frustración nes persones qu’entrevistó?
Sí, sobre too énte los representantes más mayores: los qu’empezaron con Conceyu Bable. Arias ye una de las pocas esceiciones a la frustración de la so xeneración. Hai muncha xente que tien esi sentimientu de que’l so proyectu nun salió como esperaben. Con too, tampoco nun podemos dicir que’l proyectu fracasara.

Diz nel llibru que los asturianistes foron manexaos por una estratexa de marxinación y absorción simultanea. ¿Piensa qu’hai dalguna estratexa dende’l status quo pa que’l nacionalismu nun llegue a trunfar?
Diría que sí, pero nun sé si conscientemente. Ye una manera de mantenese nel poder. Pero parezme que nun primer momentu foi muncho más importante pal PSOE marxinar al Partíu Comunista qu’a los nacionalistes. Sicasí, la estratexa sería marxinar cualquier otru tipu de poder que pudiera surdir dientro de la esquierda, tamién l’asturianismu.

Pero tampoco nun fixo falta una estratexa de marxinación. Ye un movimientu mui pequeñu…

Sí, pero usté ta falando de los ochenta y los noventa. Nos setenta, na Transición, nun se sabía que fuercia tenía l’asturianismu, porque naide los contara. Nesi primer momentu, el PSOE absorbió’l PSP de Pedro de Silva, un partíu rexonalista d’esquierdes. Ehí me parez que ye onde empezó la marxinación del nacionalismu asturianu, nel momentu nel que’l PSOE absorbió dientro de les sos files a les primeres posibilidaes.

Dende la Transición, l’asturianismu suel tar más a la esquierda. Ye un movimientu qu’amesta progresismu, socialismu y modernidá a la idea de conservar el pasáu y la tradición….
Parez una paradoxa qu’haya nacionalismu d’esquierdes, pero ye dalgo avezao na mayoría de los territorios con una identidá diferenciada. Ehí ta Esquerra Republicana en Cataluña. Curiosamente, una de les coses más chocantes del asturianismu, al comparalo colos casos de Cataluña, Galicia o’l País Vascu, ye que nun hai un partíu conservador dientro del movimientu. Dende los años 90 puen vese delles tendencies qu’apunten nesi sentíu, como la Lliga, URAS o determinaes individuales qu’hai en Foru Asturies. Pero nun hai nenguna organización fuerte conservadora y asturianista. Ye dalgo curioso.

Fala d’URAS y de Foru Asturies, partíos que nun principiu surdieron como escisiones del PP, pero que pa diferenciase garraron elementos del asturianismu.

La llingua y la cultura ye un símbolu que de cara a la sociedá va vali-yos pa distanciase de los partíos estatales, yá sía’l PSOE o’l PP. Pasó con Foru Asturies y pasó con IX nos noventa. Lo d’esti últimu partíu yera una manera de diferenciase del PSOE, dalgo que duró mentes tuvieron ehí Llamazares y Valledor, porque agora mesmu tan desvinculándose un poco d’esi movimientu.

Otra de les carecterístiques del asturianismu –con una base social moza y urbana- ye la desconexón qu’existe colos falantes patrimoniales –xente mayor y y que vive nes zones rurales-.

Los nacionalismos suelen nacer en centros urbanos, con una población que ta na llinde ente lo rural y lo urbano: fíos de xente qu’emigró del campu a la ciudá. Son persones que son conscientes de la diferencia ente una llingua y una cultura pública y otra que queda pal ámbitu de lo privao. Munchos entrevistaos diéronse cuenta de la diferencia ente esos dos mundos cuando yeren adolescentes o cuando marcharon estudiar a Madrid. Una de les razones de que’l nacionalismu naciera nes ciudaes ye qu’esa conciencia de diferencia namás pue vese nos centros urbanos. Nes zones rurales hai menos xente cola que contactar y nun hai nenguna frontera cultural.

Como pue vese nel so llibru, la historia del asturianismu ta marcada pola fragmentación en dellos partíos que se repartíen pocos votos.
La mio hipótesis ye qu’al nun salir el proyectu políticu como yera d’esperar, unos echaron la culpa al otru d’esi fracasu –munches veces hasta dientro d’un mesmu partíu- y surdíen les escisiones. Ye de destacar qu’en más de trenta años nunca hubo unes elecciones nes que se presentara una candidatura única. Mesmamente, el Conceyu Nacionalista Astur nun formó parte d’Unidá Rexonalista y cuando surdió Coalición Asturiana espulsaron a la parte que formó Andecha Astur. Nun quiero dicir que sía una característica de los asturianos ser cainistes, parezme dalgo mui superficial. Sicasí, hai histories dientro del asturianismu que vienen d’enfrentamientos personales que surdieron nos tiempos de Conceyu Bable.

¿La falta de normalización llingüística del idioma ayuda a que’l nacionalismu nun llegue a la sociedá?

Claro que sí, pero tampoco nun me parez que la oficialidá fora una pastilla máxica que permitiría que’l nacionalismu llegara a la sociedá. Hai una xerarquía llingüística, qu’amás de culturalmente, ta asentada políticamente. Que l’asturianu dexe de ser visto como dalgo rural ye una cuestión que va desapaecer col pasu del tiempu. En Cataluña, la distancia ente los Xuegos Florales y l’apaición de la Lliga Rexonalista ye de trenta años, cuasi los mesmos qu’hai dende Conceyu Bable hasta güei. Un periodu que ye mui curtiu si falamos de cambios culturales o del trabayu pa da-y prestixu a una llingua.

Fala nel llibru de la falta d’un discursu económicu nel nacionalismu asturianu, de como se centró cuasi n’esclusiva nel terrén llingüísticu, cuando nel nacionalismu del País Vascu y Cataluña, el discursu económicu foi fundamental. ¿La dependencia económica de les ayudes estatales pue ser una de les causes d’esta situación?
Económicamente Asturies depende de Madrid y ta en declive dende los años ochenta. El procesu de desindustralización foi clave p’Asturies. Surdieron les prexubilaciones y, con elles, una gran cantidá de población dependiente del Estáu, polo que va ser difícil convencelos pa que s’opongan al Gobiernu central. L’énfasis na cuestión llingüística parezme que vien pola vocación de los miembros d’esti movimietu. Hai que tener en cuenta que los primeros asturianistes foron llingüístes.

L’Academia de la Llingua xugó un papel fundamenta en too esti procesu. Munches veces, trescendió lo llingüístico…
El papel foi fundamental, sobre too nos ochenta, cuando nun había nin asociaciones nin partíos políticos asturianistes. Mantuvieron la preocupación social pol tema llingüísticu. Pero esto nun se pue diferenciar del papel políticu: facer respetar esa llingua vieya –o esa conceición nueva de la llingua- foi un actu políticu. L’Academia funcionó como ponte, sobrevivió’l desastre del CNA y foi una institución respetable y visible, cosa que nun pasaba col restu del movimientu. La situación fixo que l’Academia tuviera qu’adoptar una posición más activista y política qu’otres instituciones llingüístiques, como pue ser la Real Academia Galega. Sicasí, la crítica que podemos facer ye l’actitú purista o maximalista que manteníen, dalgo que nun yera’l compromisu ideal pa una institución asina.

Fala del desastre del CNA, ¿Cómo influyó la vinculación d’esti partíu con ETA nel atracu al Bancu Herrero pal desarrollu posterior del nacionalismu dientro de la sociedá?
Parezme que sí qu’hubo una influencia importante, polo menos nun plazu curtiu. Esi foi un momentu clave: Yera’l primer partíu nacionalista y tuvo la oportunidá d’aprovechase del momentu históricu –la Transición-, de la movilización social a favor de la democracia, del trabayu de Conceyu Bable y de los aires nuevos en defensa de les cultures minoritaries del Estáu. Pero l’esliz énte tola sociedá asturiana tuvo les sos consecuencies.

Nos noventa, el principal representante del asturianismu foi’l PAS. Sicasí, nel añu 1999 salió de la Xunta Xeneral y entró en decadencia. ¿Qué coses fixo mal esti partíu?
La medría del PAS vieno gracies a la penetración del discursu asturianista na sociedá, pero tamién foi nun momentu de crisis nel PSOE. Hai que tener en cuenta que nos años noventa tamién se produció la única victoria del PP asturianu. Cuando’l PAS salió del Parllamentu, en 1999, nun foi por una pérdiga de votos grande, quedó a poques papeletes de consiguir representación. De la mesma manera, consiguió entrar na Xunta Xeneral por pocos votos. Parezme que’l problema del PAS vieno depués de salir del Parllamentu, cuando pierde la representación pública y el protagonismu dientro del asturianismu.

Actualmente, tolos partíos recueyen nel so programa midíes de política llingüística cuando se presenten a les elecciones. ¿Podemos consideralo un llogru del movimientu?
Yá nadie fala del asturianu como un dialectu o diz que ye castellanu mal faláu. Esto ye un éxitu incuestionable del asturianismu, frutu del trabayu desarrolláu a lo llargo de los últimos trenta años. Mesmamente, hasta los que se puen considerar enemigos del asturianismu califiquen publicamente a esi idioma como una llingua.

¿Pue sobrevivir l’asturianismu como un movimientu puramente cultural?
Claro que pue, lo que pasa ye qu’ensin tener representación política va ser más difícil que pueda sobrevivir. El futuru d’un movimientu social namás va depender de la valoración que d’él tenga la población. Les lleis puen facilitar qu’haya determinaos elementos que favorezan l’espoxigue d’esa ideoloxía, como la oficialidá, pero tampoco nun se pue llexislar pa que se cree o pa que desapareza esa ideoloxía.

¿Cómo ve’l futuru d’esti movimientu?

Nun plazu curtiu nun me parez qu’haya munchos cambios, pero les tendencies demográfiques parecen mostrar qu’a llargu plazu la mocedá asturiana va apoyar cada vez más la cuestión llingüística, anque cola paradoxa de que va falar cada vez menos asturianu. Soi un poco pesimista, pero tampoco nun ye imposible que nel añu 2100 entá exista l’asturianismu. Too va depender de que les xeneraciones nueves sían a mantener el clima d’axitación y estima hacia la diferencia que tien Asturies respecto al restu d’España. Parezme que va ser difícil qu’a lo llargo del sieglu próximu medre’l movimientu y consiga tener influencia política y social, pero tampoco nun ye imposible. Cualquier momentu históricu nel que se cuestione la estructura del Estáu abre la posibilidá de cambiu y podría ser una oportunidá pa qu’Asturies algamara los mesmos derechos que tien, por exemplu, Galicia.

Anuncios
Esta entrada fue publicada en Entrevistes. Guarda el enlace permanente.