Les gaiteres tienen más prestixu social que los pandereteros

Les Noticies, 06/10/2012

Damián Barreiro

L’imaxinariu social ye más tolerante coles gaiteres que colos pandereteros, pero nun ye que’l mundu de la música tradicional sía feminista. Tolo contrario. Les muyeres que toquen la gaita realicen una práctica asociada a los homes, colo que se produz un ascensu el escalafón del poder y un reforciamientu de lo masculín como norma de prestixu. Otra manera, los pandeteros asumiríen un rol femenín y dexaríen de llau voluntariamente l’estatus de poder que-yos tien asignáu la sociedá pol fechu de ser homes. Amás, al asumir esi supuestu rol de muyer, entraríen en conflictu cola sociedá patriarcal y heteronormativa, colo que taría produciéndose una desestabilización na ideoloxía que considera a la masculina como la norma de prestixu del xéneru.

Esta ye la principal conclusión de la investigación Gaiteres y pandereteros. Xéneru, transxéneru y poder na música tradicional asturiana. Trátase d’una tesina que’l musicólogu Llorián García defendió esti 5 d’ochobre na Universidá d’Uviéu y a la que’l trubunal dio-y una nota de diez. L’estudiu, dirixíu pol profesor d’etnomusicoloxía José Antonio Gómez Rodríguez, ye la primera d’esta triba de les feches al rodiu la música tradicional asturiana. Dedícase a l’analís de dellos roles de xéneru invertíos -la gaita como instrumentu d‘homes tocáu por muyeres y la pandereta como instrumentu de muyeres tocáu por homes-.

La investigación muestra como hai determinaos instrumentos marcaos pol xéneru que perpetuén la desigualdá. Amás, esplica como venceyar pandetera con feminidá y gaita con masculinidá nun se debe namás a un factor, sinón que tien que ver con causes como los diferentes espacios onde tradicionalmente se tocaben estos instrumentos, ensin escaecer significaciones como’l material del instrumentu y el soníu qu’esti produz.

L’estudiu alvierte del funcionamientu de tres arquetipos identitarios fundamentales nel pandereteru: la homosexualidá como estratexa represiva en respuesta a una discontinuidá fuerte nel orde patriarcal heteronormativu; la hipermasculinidá, que refuercia la normalidá del xéneru mediante la parodia; y la indiferencia, que vien pola desapaición de les inscripciones de xéneru en la pandereta.

Per otru llau, el discursu de xéneru ye más benévolu coles gaiteres, al ser namás anecdóticu’l que pon en dulda la so identidá sexual, Sicasí, el control patriarcal ta presente al traviés de les Escueles de Música y les bandes de gaites venceyaes a estes. La so apaición nos años 80 supunxo la modernizacion de la gaita y la entrada de les muyeres nesti mundu. Con too, les gaiteres son, na so mayoría, aficionaes, mentes que’l de los profesionales de la gaita ye un gremiu controláu polos homes. Establezse asina una dicotomía ente profesional y amateur que fai que les muyeres vean limitada la so capacidá p’asumir poder dientro del mundu de la gaita.

Anuncios
Esta entrada fue publicada en Noticies. Guarda el enlace permanente.