Panteres Negres: La Revolución televisada

Glayiu, 14-10-2012

N’ochobre de 1966 ñacía nun guetu negru de la ciudá d’Oakland, California, el Partíu Pantera Negra pa la Autodefensa, máximu esponente políticu del movimientu del Black Power y referente pal activismu de la tola izquierda norteamericana. Negros col pelo a lo afro ximielgando desafiantes los sos fusiles nel focicu de plasmaos policíes blancos; militantes uniformaos qu’escoltaben el féretru de los sos dirixentes muertos en tiroteos coles autoridaes; Marlon Brando, Jean Genet y Jean-Paul Sartre, ente otros, sofitando públicamente la causa y los modos de los revolucionario negros, tamién ficieron del BPP un iconu gráficu pa los amantes de la cultura pop de tol mundu col pasu los años. Pero quizás el públicu en xeneral nun sepa que la esperiencia política revolucionaria más mediática de la historia reciente de los Estaos Xuníos malpenes duró seis años, que’l so principal cabezaleru y teóricu morrió a tiros nun fumaderu de crack, o que’l so presidente tuvo a pique de ser ellexíu alcalde de la ciudá d’Oakland. Esta ye la breve historia d’una revolución retransmitida en directo.

A comienzos de los años 60 dellos estaos de los EE.XX. inda teníen lleis segregacionistes que reglamentaben les diferencies nos derechos de los non blancos. Lo mesmu que’l Apartheid sudafricanu, la política de dixebrar les races buscaba el crecimientu separtáu de la ciudadanía blanco, con plenos derechos, y la non blanca (d’aquella, mayoritarimente negros), con derechos restrinxíos. El yá famosu plante de Rosa Parks en 1955, una muyer negra que nun quiso cede-y l’asientu na parte delantera del autobús a un blancu como-y obligaba la normativa, afaló la llucha polos derechos civiles de la población negro. Nel entamu, la llucha de la “xente de collor” foi encabezada por predicadores baptistes como Martin Luther King, quien fue a ensamar un movimientu que desixía la integración de los negros na sociedá de los blancos d’igual a igual, y emplegaba la desobediencia civil non violenta como midía de presión, como ficieran históricos de la non violencia como Tolstoi y Gandhi. King foi l’estandarte d’un movimientu civil enforma comedíu pero esitosu, que daba pasinos mui concretos y nun permitía que les acciones se-y fueran de les manes. Foi’l tiempu de les campañes pa que los negros s’inscribieren como ellectores y de les sentaes pacífiques delantre de comercios segregacionistes; de los freedom riders (estudiantes blancos y negros, polo xeneral de los estaos del Norte, que baxaben al Sur profundu a desendolcar campañes de concienciación ente la población negro) y de la Marcha sobre Washington en 1963; del “I have a dream” y de les semeyes col presidente Kennedy. Les pequeñes victories algamaes y l’adhesión de personalidaes a la causa de los derechos civiles fizo de King la figura del “negru buenu”, a imaxe del protagonista de la clásica novela de Harriet Beecher Stowe, La cabaña del Tío Tom, el house nigger modernu nel que podíen confiar les élites blanques. Una parte d’éstes comprendía que nun contestu de confrontación de bloques a nivel mundial nel que los Estaos Xuníos yeren los autoproclamaos campeones del “mundu llibre”, nun podíen mantener per munchu tiempu una llexislación racista nel país. Por supuesto había otra parte bien valoratible de la ciudadanía blanco opuesta a esti aperturismu, pero como dixo’l propiu King “quien nun fae posible la llucha de los derechos civiles por medios pacíficos, ta xustificando la llucha por medios violentos”. Y ye que non tolos negros queríen ser como’l Tíu Tom.

Los negros que nun queríen ser blancos. Mentantu les madres y les güeles negres escuchaben los apasionaos discursos de los negros buenos del NAACP (Asociación Nacional para el Avance de la Gente de Color) y cantaben We shall overcome (Venceremos), a gran parte de la mocedá negro, qu’espoxigara baxo les lleis racistes y el despreciu o la condescendencia de la xente blanco, aquelles pallabres quedábense enforma curties. En 1965 españaron unos tremendos disturbios raciales en Watts, guetu negru de Los Ánxeles, motivaos pola habitual violencia policial escontra unos rapazos negros. La reflexón política sobre qué llugar debíen ocupar los afroamericanos na sociedá anglosaxona y capitalista norteamericana llevó a la radicalización de parte del movimientu de los derechos civiles. El SNCC (Comité de Coordinación de los Estudiantes por la No Violencia, lléase snic), la rama estudiantil del movimientu entamada en 1960, comenzó a teorizar sobre la non conveniencia d’integrase nuna sociedá que namás buscaba asimilar al proletariau negru pa convertilo en mano d’obra manso del capital blanco. D’equí surdió quizás la mayor figura teórica del movimientu de lliberación de los negros, Stokely Carmichael, autor en 1966 del conceptu del Black Power. Básicamente ye la teorización d’un nacionalismu negru, que defiende la necesidá d’autoafirmación de la xente negro, la recapitalización de la so identidá y la so cultura, y la conveniencia de facer esi camín dixebraos de los blancos, puesto que la presencia d’éstos nel movimientu de lliberación negru siempre tiende a repetir los esquemes de dominación ente races. “Tolos blancos son parte d’un sistema racista (…) Inda tornándose ‘más militantes’ que los prietos nun pueden esborrar la raya de collor; a los blancos que traten d’actuar como John Brown [destacáu abolicionista], normalmente pareznos que traten de mangonialo too, que nun van tener qu’apechugar coles consecuencies de la represión que mos caiga enrriba (…) Esto nun significa que tolos blancos individualmente seyan racistes nes sos actitudes o que’l sofitu de los blancos nun seya importante”. De fechu, una de les midíes de Carmichael nel SNCC enantes de colar d’él foi la espulsión de la militancia blanco. “La mayoría de los radicales blancos acolumbraron una oportunidá pa escapar de la horrible realidá d’América metiéndose nes comunidaes negres y tratando d’organizar a la xente negro mentantu descarten organizar a la so propia xente nes comunidaes racistes”.

Paralelamente, una parte de la comunidá negro rechazaba tamién lo que l’home blanco-y podía ufrir. Revestíos d’un islamismu heterodoxu nun rellacionáu con nenguna de les corrientes históriques del Islam, surde nos años 30 la Nación del Islam, espresión relixosa y política al mesmu tiempu, qu’amesta tamién un nacionalismu negru a una interpretación sui generis de los conceptos musulmanes. Los musulmanes negros curiaben de la so comunidá, teníen un texíu asistencial pa los suyos, calteníen una actitú insumisa y argullosa delantre los blancos, y asina ganaron respetu ente la población negro. La so figura más mediática y conocía foi ún de los sos predicadores, Malcom X. Delincuente de poca monta na so mocedá, descubrió na cárcel les teoríes de Nación del Islam y ayudó a qu´esporpollara cola so brillante oratoria. La Nación del Islam por boca de Malcom X predicaba la obediencia a les enseñances del so profeta viviente, l’honorable Elijah Muhammad, negaba la sumisión del negro al blanco (es más, defendía la superioridá histórica de la raza negra sobre la blanca), y abogaba pola defensa “por tolos medios necesarios” de les comunidaes negres frente a la violencia institucional de les diferentes administraciones. Sicasí, la evolución ideolóxica de Malcom X, qu’acabó defendiendo postures polítiques cercanes al socialismu tercermundista (que triunfara en Cuba, n’Arxelia y na Indochina francesa, y nel que tenía cabida la llucha xunto a los blancos norteamericanos), llevólu a que lu expulsaran de la Nación del Islam y a que lu asesinaran en 1965.

Asina les coses, si en 1965 ardía Watts y mataben a Malcom X, y en 1966 un negru universitariu dicía que nun-y había que pidir al home blanco les coses por favor, esi mesmu añu na ciudá californiana d’Oakland seis rapazos negros fundaben el Partíu Pantera Negra pa la Autodefensa.

Son negros y tan armaos. Influenciaos pol conceptu d’autodefensa de Malcom X, estos seis mozos reflexonen sobre les problemátiques de les comunidaes negres y puxen por un activismu militante qu’acabe cola opresión estructural que sufren los negros americanos dende que los llevaron al Nuevu Mundu. Son Elbert Big Man Howard (futuru editor del periódicu del partíu), Huey P. Newton (ministru de Defensa), Sherman Forte, Bobby Seale (presidente), Reggie Forte y Little Bobby Hutton. Tres d’ellos son universitarios, y toos participen de llabores comunitaries nel so barriu. Les sos principales influencies polítiques son Malcom X y el teóricu de la llucha de lliberación arxelina Franz Fanon, autor del imprescindible Los condenaos de la Tierra. Presenten un programa de 10 puntos que puede resumise na necesidá d’autodeterminación de les comunidaes negres y la lliberación de la opresión capitalista.

  1. Queremos llibertá. Queremos el poder pa determinar el destín de les nuestres comunidaes negres oprimíes.
  2. Queremos plenu empléu pa la nuestra xente.
  3. Queremos el fin del robu a les nuestres comunidaes negres oprimíes por parte de los capitalistes.
  4. Queremos viviendes decentes, dignes d’abellugar a seres humanos.
  5. Queremos educación decente pa la nuestra xente, qu’aprenda la verdadera naturaleza decadente d’esta sociedá norteamericana. Queremos una educación qu’enseñe la nuestra verdadera historia y’l nuestru papel na sociedá actual.
  6. Queremos un serviciu de salú gratis dafechu pa tolos negros y oprimíos.
  7. Queremos el fin darréu de la brutalidá policial, y qu’aparen los asesinatos de negros, otres xentes de color y de tolos oprimíos nel interior de los EEXX.
  8. Queremos el fin darréu de les guerres d’agresión norteamericana.
  9. Queremos llibertá pa tolos negros y pa toles persones oprimíes anguaño deteníes en prisiones federales norteamericanes, estatales, de condado o militares. Queremos xuicios con xuraos pares pa toles persones acusaes de crímenes baxo la llei d’esti país.
  10. Queremos tierra, pan, vivienda, educación, vestimenta, xusticia, y el control de les tecnoloxíes modernes por parte de les comunidaes y de les persones.

Pero lo que fizo que’l BPP tuviere darréu l’éxitu que tuvo fueron, sobre too, les sos formes. La primera acción pública de los panteres negres foi vixilar con armes na mano les rondes que facíen los policíes blancos nos guetos negros d’Oakland. La llexislación del añu 66 de California permitía a los ciudadanos llevar armes en público siempre que nun tuvieren escondíes. Poro, una patrulla de cuatro mozos armaos con escopetes de repetición y armes cortes siguió un buen día a un policía blancu nuna barriada d’Oakland, ante’l plasmu del axente y l’estupor de los vecinos. Hai que camentar que la brutalidá policial pa coles minoríes étniques yera una realidá xeneralizada, y el fechu de que hubiera quien ficiera frente a la plenipotenciaria autoridá blanca fizo ganar munchos adeptos al BPP. Asina, la fonte inicial de militancia y simpatizantes foi la propia comunidá. Darréu llevaríen el so discursu y la so praxis a los campus universitarios, onde non solo ganaron puxu ente los alumnos negros, sinon tamién ente los radicales blancos.

En 1967 xunióse a los panteres negres el llíder estudiantil Stokely Carmichael, que traxo consigo una bona parte de les bases del SNCC. Un añu más tarde el sucesor de Carmichael al frente del sindicatu estudiantil, H. Rap Brown, robla un alcuerdu de collaboración ente ambes organizaciones y tamién ingresa nel BPP (conviertiéndose nel so ministru d’Educación), lo que supuso la expansión per too Estaos Xuníos del partíu, abriendo sedes locales, denominaos capítulos, nes principales ciudaes del país. Poro, la segunda fonte de militancia de los panteres vino de los estudiantes.

L’actividá inicial del partíu ye frenética: en xineru del 67 abre la so primera oficina, n’Oakland; n’abril asoleyen el primer númberu del so muérganu oficial, el periódicu La pantera negra (The Black Panther); enantes, en febreru caltuvieran el so primer tirotéu cola Policía, mientres acompañaben a la viuda de Malcom X. Y ye qu’al añu d’entamar, el carisma que teníen los panteres poles sos acciones yá tenía sollertes a les autoridaes. N’ochobre de 1967 Huey P. Newton, ún de los fundadores, ministru de Defensa y másimu cabezaleru, tuvo un tiroteu con dos axentes de policía d’Oakland, morriendo ún d’ellos en circunstancies enxamás esclariaes. Newton salió de prisión en 1970 al ordenarse la revisión del casu por irregularidaes na investigación.

Poro, el BPP presenta una fase de formación qu’adolez enforma d’un activismu belixerante: nel partíu ingresen mozos y moces que tan fartos de los abusos policiales y quieren salir con un arma na mano a patrullar los sos barrios. “Yo siempre digo que nun me ficieron pantera negra les pallabres de Huey P. Newton o de Bobby Seale (otru miembru fundador y primer presidente del Partíu), fízome pantera negra la Policía de Los Ánxeles” diz una militante californiana anónima, sentimientu mui espardíu ente les bases del BPP. Sicasí, la dirección del partíu trata de dar una formación ideolóxica a quienes aspiren a ser militantes, qu’han pasar un periodu de prueba. Lleen el Llibru colloráu de Mao, los testos del Che, a Marcuse, y a pioneros de la lliberación negra como Marcus Garvey y al propiu Stokely Carmichael. Confrontáu col nacionalismu negru que defendía, ente otros, Carmichael, Huey P. Newton desarolla la teoría del Intercomunitarismu, una adaptación interesante y orixinal de los principios marxistes a la estructura social y económica de les comunidaes negres nos EE.XX.

Teoría política propia: Intercomunitarismu. “Descubrimos que pa ser internacionalistes habíemos tener primero una nación. L’internacionalismu implica la relación ente diferentes naciones o nacionalismos.·Si nun esiste nación, y de fechu, los Estaos Xuníos son un imperiu, ye imposible pa nós ser internacionalistes. Nun vamos ser internacionalistes yá más nunca, y nun mos precupa (…) vos definiré la nueva tresformación y la nueva teoría, vamos llamanos ‘intercomunitaristes’, porque les naciones tornáronse comunidaes del mundu” dicía Newton a una audiencia d’universitarios blancos en Boston. Yera una manera d’esbillar les dos tendencies manifiestes dientro’l partíu: el nacionalismu negru y el socialismu tercermundista. Defiende una cosmovisión encadarmada sobre comunidaes en llucha, puesto que les superestructures estatales quedaron, según les sos pallabres, superaes pola política y la práctica del imperialismu. Han ser eses comunidaes, conxuntos sociales que perviven baxo la falsa estructura de los estaos, les que formen una andecha que permita dir lliberando comunidá tras comunidá. Hai que destacar que’l movimientu de lliberación negro tien concencia de sí como una comunidá en llucha al mesmu nivel que la vietnamita, l’arxelina, o la indio nativo americano. Al nun ser a imponer la so llínea de nacionalismu negro nel BPP, Stokely Carmichael rompe col partíu y cola pa Guinea-Konakry a finales de 1968, onde se convertirá n’asesor del presidente Ahmed Sékou Touré, y del exiliáu presidente de Ghana, el panafricanista Kwame Nkrumah

Una anécdota interesante, que vien a dar idea de la evolución política de los panteres ye qu’en 1967 vendíen exemplares baratos del Llibru Colloráu de Mao a los radicalizaos universitarios blancos pa pañar perres y poder comprar armes con elles. Nun fue hasta un añu dempués, 1968, cuando se decataron del interés ideolóxicu y de les posibles apliaciones práctiques del llibrín na política del Partíu.

Asina que la precupación de los panteres negres pola so comunidá ye otra de les coses que los fae populares ente los suyos. Conscientes de les carencies de les families trabayadores y del lumpen negro, ún de los sos primeros enfotos fue entamar un programa d’almuerzos gratis pa los escolinos. Al cabu d’un añu repartíen a diario 10.000 almuerzos per tol país. En barrios onde los sistemes d’atención pública yeren ruinos o nun esistíen dafechu, el BPP asumió con ésitu’l llabor de curiar de la xente negro dende la base: alimentación, salú y educación. Poro, la tercera fonte de militancia del Partíu vino de les propies clases trabayadores negres, que recibíen con agrado’l llabor social de los panteres.

Nesta estaya cabe destacar a una de les figures más relevantes del Partíu, anque non tan conocíu como los miembros fundadores. Afiliáu al capítulu de Chicago dende qu’esti entamara, Fred Hampton yera un estudiante de Derechu y un llíder natu de la so comunidá. Nacíu en Maywood, ún de los guetos negros de la ciudá, con apenes venti años pasó a lliderar a los panteres de Chicago, y foi’l principal impulsor del programa d’atención pública del Partíu. Col pesu del so carisma personal consiguió, primero, un pactu de non agresión ente les principales bandes moces dela ciudá, y depués, la xunidá d’acción ente los diferentes movimientos revolucionarios xuveniles: los puertorriqueños, que formaben los Young Lords; los universitarios blancos del SDS (Estudiantes por una Sociedá Democrática, embrión del posterior grupu armáu The Weather Underground), los Young Patriots (otra organización de radicales blancos cincada na rexón de los montes Apalaches), los Brown Berets (boines pardes, activistes chicanos) y los asiáticos de la Red Guard Party (Guardia Collorada, a imaxe de lo que pasaba en China colos guardies colloraos na Revolución Cultural de Mao). Esta xunidá d’acción buscóla el partíu a nivel nacional una bayura de veces, cristalizando na Coalición L’Arcu la Vieya (Rainbow Coalition) o nel Frente Xuníu, de breve duración y escasos resultaos poles diferencies táctiques ya ideolóxiques de cada organización.

El llabor de Hampton al frente del capítulu de Chicago foi tan valoratible que consiguió encuadrar a los pandilleros xuveniles de la ciudá dientro del Partíu, coles ventaxes ya inconvenientes qu’esto traxo consigo. D’esta manera, el crecimientu del BPP nel Estáu d’Illinois foi esponencial (por exemplu, de los 27.000 habitantes de Maywood, 500 mozos y moces yeren panteres negres), y la ciudá de Chicago se convirtió nel epicentru de la revolución. Dotáu d’una capacidá oratoria escomanada y una clarividencia política escepcional, Hampton puxó por entamar programes de salú pública, de control comunitariu del llabor policial, y de formación política pa la militancia. Con Huey P. Newton en prisión, Bobby Seale siendo xulgáu nel procesu de “Los 8 de Chicago” (siete perconocíos yippies, ente los que taben Jerry Rubin y Abbie Hoffman, más el pantera Bobby Seale, deteníos nes movilizaciones escontra la Convención Nacional Demócrata en Chicago nel 68) y la xuntanza col SNCC a piques d’esbarrumbar, a Hampton, con apenes 21 años, señalábenlu como’l inevitable prósimu presidente del partíu. Algo que nun podía dexar pasar el Gobiernu federal. El 4 d’avientu de 1969 Fred Hampton morría acribilláu tando en cama desarmáu baxo les bales de la Policía Local de Chicago. Tamién mataron a tiros a Mark Clark, que dormía nuna siella nel mesmu cuartu.

En 1970, poco más de tres años depués d’entamar el Partíu de la Pantera Negra tenía 5.000 militantes a tiempu completu pel tol país, más una base d’aspirantes a militante y les simpatíes d’un cachu curiosu de la población negro. En 1971, La pantera negra, el periódicu del Partíu, tien una tirada de 250.000 exemplares.

Les xuntances con otros grupos: dende 1967 los panteres promovieron delles coalliciones polítiques ente los grupos de vanguardia de les diferentes races. Una tres d’otra surdieron, algamaron algún ésitu concretu, y acabaron por disolvese por diferencies estratéxiques. La principal razón podía ser el mayor compromisu activista del BPP frente a los demás grupos: en 1969 los panteres propusieron un Frente Xuníu ampliu que sofitara al movimientu de lliberación negru, que pañara perres, y que concienciara a la xente blanco de la existencia del racismu na so sociedá. La propuesta foi bien recibida poles organizaciones d’izquierdes más tradicionales; sicasí, los radicales blancos calteníen otres postures: habíalos que trataben de llegar a la clase obrera blanco; taba puxante’l movimientu de lliberación de la muyer; habíalos que taben enfotaos en reproducir la Revolución Cultural maoista nos EE.XX; y por último, taben los que apostaben por “traer la guerra a casa”: la parte del movimientu contra la guerra del Vietnam más radicalizada, partidarios d’entamar una resistencia armao dientro del territoriu estadounidense pa socializar el sufrimientu del pueblu vietnamita ente la sociedá americana. Ente éstos últimos destacó The Weather Underground, organización que surdió de los estudiantes más radicalizaos del SDS, qu’optó por poner bombes n’oxetivos militares y gubernamentales, llegando a atentar escontra’l mesmu edificiu del Pentágonu. Poro, siempre hubo una falta de sincronía ente’l movimientu negru y les demás vanguardies. Huey P. Newton escribe dende la cárcel: “La comunidá negro, al vivir colectivamente la opresión, y al sufrir colectivamente penuries materiales, garra les idees d’organización y disciplina muncho más rápido que los mozos blancos cuya necesidá ye la d’autoafirmase (…) El negru ta pasando de la dependencia y la impotencia a un argullu agresivu de poder colectivu. El principiu de autoconfianza ye más importante que la idea de coalición.

La cuestión de xéneru nel BPP taba esplícitamente presente. La sociedá negro nun ta llibre de conductes sexistes, y el machismu cuerre llibremente incluso dientro de la vanguardia política, magar que se trata de combatir. Sicasí, la militancia femenina nel Partíu ye curiosa, muncho mayor que nes organizaciones d’otres races. Casi una tercera parte de les bases del BPP son muyeres, y delles llegaron a puestos de responsabilidá o llideraron el partíu. Con ello y too, les reflexones posteriores de les muyeres panteres negres coinciden en qu’un problema estructural como’l sexismu nun yera posible superalu nos escasos años de vida de la organización. Assata Shakur, militante pantera de Nueva York refuxada política en Cuba dende 1973, fala na so biografía de la indignación que-y producía la ver cómo los cuadros del BPP repetíen los esquemes machistes dientro de la organización. George Jackson, perconocíu militante asesináu na prisión de San Quintín, al que-y Bob Dylan dedicara una canción, aconseya nes cartes que-y escribe al so hermanu que se busque una “bona hermana pa que te cuide y cocine pa ti”. Elaine Brown, presidenta del partíu a partir de 1974 diz: “una muyer nel movimientu del Black Power yera considerada, nel meyor de los casos, como irrelevante”. La épica de la militancia armada, con disciplinaos militantes uniformaos en formación conllevaba inevitablemente la reproducción de conductes machistes tamién dentro del movimientu revolucionariu. “La llucha pola lliberación de la muyer suel parecer como daqué secundario cuando los panteres tan lluchando pola supervivencia física”.

La mayor menaza interna pal FBI. En 1971 el partíu toca techu. Dos años enantes, nel 69, John Edgard Hoover, cabezaleru del FBI proclamaba a los panteres negres “la mayor menaza interna a la seguridá d’esti país”. Asina qu’a partir de 1970 desendolquen un programa de contraintellixencia pa esaniciar a los panteres negres, conocíu como COINTELPRO. Hasta entós la represión corriera a cargo de les policíes locales: nun yeren poco frecuentes tiroteos de varies hores ente militantes del BPP y axentes de Policía locales, daqué qu’afalaba a parte de la mocedá negro a xunise al BPP al mesmu tiempu que fartucaba a los sectores negros más moderaos pola imaxe escesivamente agresiva del BPP. El 6 d’abril la Policía d’Oakland asesinaba a Little Bobby Hutton, de 17 años, fundador del partíu, tras un tirotéu d’hora y media. Al día siguiente asesinaben en Memphis a Martin Luther King. N’avientu del 69 asesinaben a Fred Hampton y Mark Clark; a finales de 1970, 30 panteres morrieran yá baxo les bales de la Policía. Pero’l gobiernu de los EE. XX. sabía que lo mesmo que valía pa eliminar a determinaes personalidaes insustituibles dientro’l partíu, estos asesinatos tamién podíen tornar la tortiella, y convertir en mártires negros a los activistes muertos. De manera qu’al mesmu tiempu entamaron acciones desesquilibrantes pa frañir per dientro’l partíu. Nun país tan grande como los EE.XX, les comunicaciones a finales de los sesenta nun yeren tan fluídes nin tan fáciles como anguaño, asina que los federales comenzaron a crear polémiques ente los capítulos de les costes Este y Oeste, y ente éstes y l’esiliu, enviando cartes falses con crítiques a la direccion del partíu, y corriendo divulgos difamatorios. El tiempu demostraría tamién que les files del BPP taben repletes d’infiltraos ya informadores. La mayor crisis creáronla a través del ministru d’Información, Eldridge, nel esiliu n’Arxelia de Ben Bella dende 1968 pa evitar el xuiciu pol tirotéu nel que morrió Little Bobby Hutton. Los infiltraos policiales dáben-y una información de la situación del partíu engañosa pa que criticara duramente al llíder másimu, Huey P. Newton, y pa qu’ésti reaccionara violentamente a les crítiques. A la par, el FBI envía una bayura de cartes con falses crítiques de los capítulos de una costa hacia la otra, algo que, teniendo en cuenta la xuventú y la escasa madurez política de munchos de los cuadros del partíu, que la represión policial y les fugues obligaran a asumir puestos de responsabilidá, fizo que comenzaren les disensiones internes, arreglaes delles veces a tiros. Con disparos tamién acababen les disputes con otros grupos d’activistes negros, en non poques veces manipulaos polos federales pa acabar con determinaos panteres, debilitalos y resta-yos credibilidá. Nun fizo falta muncho más: la presión sobre les bases del partíu fizo que saltara como un muelle. A la defensiva en tol país, cola Policía acosando les sedes del partíu y deteniendo a los cuadros más esperimentaos, la xeneración que releva a los miembros iniciales nun tien nin la formación nin la capacidá de los primeros. A ello sumóse que Huey P. Newton tendía a abusar de la cocaína, lo que-y afaló un deliriu paranoide de persecución. Nuna entrevista televisiva la crisis ente Newton y Cleaver españó, dividiendo al partíu ente quienes apostaben por replegase, abandonar les acciones armaes y centrase nos programes sociales, como pensaba Newton, o quienes apostaben por responder cola fuerza a la fuerza de los federales, como defendía Cleaver. Bobby Seale, d’aquella en prisión, nun fue quien a evitar la dixebra de les dos tendencies.

Asina les coses, la llínea moderada impónse nel BPP y Cleaver funda xunto con otros prominentes panteres, como Assata Shakur o Sundiata Acoli, el Black Liberation Army, organización armada clandestina que lluchará pola lliberación de los negros dende les solombres ensin munchu ésitu. 1972 ye un añu de transición, con más muertos, más fugaos, y Newton somorguiáu nun procesu d’autodestrucción evidente. La dirección gárrenla nuevos cuadros, menos mediáticos, menos carismáticos y más moderaos, xunto con Bobby Seale, únicu de los fundadores que permanez nuna llínea constante dende’l 66. En 1973 preséntase a alcalde d’Oakland y roza’l trunfu. Pero yá yera enforma tarde pa los panteres negres: en 1974 Newton fugóse pa Cuba pa escapar al procesu pola muerte a golpes d’una muyer nun bar. Esi mesmu añu tornó d’Arxelia Cleaver, convertíu nun cristianu renacíu; Seale renuncia a la dirección del partíu, asumiéndola Elaine Brown, quien diz: “el partíu tien que tar pa algo más que p’andar a tiros cola Policía”. Magar que puxó pola vía ellectoral y polo programes sociales, la deriva de la organización y les consecuencies de la represión del COINTELPRO llevaron al Partíu de la Pantera Negra a una llarga agonía hasta la so desapaición total.

Mentalidá televisiva. En pallabres de Sundiata Acoli, militante del partíu, “nos años 60 hubo una sinerxía tremenda: negros, latinos, asiáticos y blancos lluchaben por una nueva sociedá. Eso llevó a parte del BPP a pensar que la toma del poder yera inminente, que la revolución yera como un programa de televisión: entama a les 9 de la nueche, va espoxigando n’intensidá hasta les diez menos cuarto, y a menos cinco, ¡Victoria! Xusto a tiempo pa ver el parte de les diez. Si depués d’unos pocos años de llucha los negros inda nun yeren llibres, nun vino nenguna revolución, o lo que ye peor, el Partíu taba en toos llaos a la defensiva, con baxes y furau dafechu poles riñes, munchos miembros esmoralizáronse, desilusionáronse, y colaron pa casa o volvieron a lo que facíen enantes. Nun taben preparaos pa una llucha llarga”.

Anuncios
Esta entrada fue publicada en Internacional. Guarda el enlace permanente.