25 Mayu: #AsturiesResiste pol drechu a decidir y la soberanía – Comunicáu de Conceyu Abiertu

2013 25 mayu

El prósimu sábadu ye 25 de Mayu, una fecha de gran valir simbólicu p’Asturies. Nesa mesma data del añu 1808, la Xunta Xeneral declaró la so soberanía énte’l clamor popular llideráu por dos muyeres y qu’asina lo desixía nes cais de la capital, xunto col unvíu d’embaxadores a Inglaterra y la formación del “Exércitu Defensivu Asturianu”, una fuercia armada popular. A too ello hai qu’amestar el surdimientu d’un símbolu tan importante pal nuesu país como ye la so bandera, ente otros munchos fechos.

Poro, dende Conceyu Abiertu camentamos el 25 de Mayu como una fecha d’alcordanza y de vindicación, debío a que les aiciones del pueblu asturianu nel añu 1808 suponen ún de los fechos más rellevantes de la nuesa hestoria, y al mesmu tiempu un espeyu nel que miranos anguaño. Los episodios de rebeldía más importantes na hestoria del pueblu asturianu vienen davezu acompañaos pola proclamación de la nuesa soberanía, y nestos tiempos, nos que vemos como imprescindible una fonda tresformación política, económica, social, mediuambiental, etc, vindicamos la soberanía como parte imprescindible de dicha tresformación.

L’estáu español, col so calter “indisoluble” que-y otorga una constitución apautada al calor del franquismu, ñega un drechu democráticu básicu, como ye’l drechu a decidir de los pueblos. Sicasí, dende’l pueblu asturianu ye imprescindible vindicar esti drechu, asina como la soberanía como fueya de ruta pa recuperar la dignidá perdida, y construyir un modelu protagonizáu pol pueblu trabayador na gueta de la xusticia social y la dignidá pa la nuesa cultura ya identidá.

Poro, énte l’escaezu y maltratu institucional que sufre esta fecha y los sos fechos por parte’l gobiernu asturianu, dende Conceyu Abiertu llamamos a participar na iniciativa #AsturiesResiste, consistente nuna concentración énte la Xunta Xeneral de magar les 13:00 del sábadu 25 de Mayu, pa remembrar y vindicar los valores de rebeldía, soberanía y dignidá del pueblu asturianu.

Anuncios
Esta entrada fue publicada en Noticies. Guarda el enlace permanente.