Fai falta otru 25 mayu pa los nuevos tiranos d’Europa (25/05/2017)

Fonte: IAS

Cúmplense güei 25 de mayu 209 años de la proclamación de soberanía de la Xunta Xeneral asturiana, espresión política del movimientu popular qu’entamara’l 9 de mayu de 1808 nes cais d’Uviéu. Tovía paez increíble ver el valor qu’amosaron aquellos homes y muyeres nun contestu políticu enforma revesosu, entamando una guerra escontra l’Imperiu Francés nun momentu en qu’esti dominaba’l continente enteru. Más increíble tovía ye ver cómo les instituciones asturianes siguen ignorando dafechu esta fecha histórica, que marca l’aniciu de la revolución burguesa nel nuestru país y con ello la entrada na modernidá. L’ausencia dafechu d’esta fecha nel calandariu oficial, asina como nos currículos escolares, fai al nuestru pueblu ignorante de la so Historia y de les enseñances que de la mesma puén sacase.

Porque’l 25 de mayu de 1808 nun ye sólo una fecha histórica digna d’alcordanza y cellebaración pola so enorme importancia pal nuestru pasáu colectivu, sinón tamién una señal de lo que ye posible cuando los pueblos deciden ser amos del so destín. El nuestru presente nun ye en munchos aspectos menos murniu que’l d’aquella Asturies atrasada d’hai dos sieglos. Aquel 25 de mayu, como agora, había unos tiranos que pretendíen una hexemonía continental xunciendo a los pueblos. Había tamién, como agora, quien pensaba qu’eso yera’l “progresu” y un avance. Habíalos, cómo non, dispuestos a sometese a cualesquier autoridá, por odiosa que fuera, con tal de mantener el so status de dominiu. Onde hai dos sieglos taba Napoleón Bonaparte y la burguesía francesa, tenemos agora la oligarquía multinacional europea articulada alredol d’Alemaña. Frente a la vergoñosa claudicación d’unes instituciones podres del Vieyu Réxime, frente a la traición a sí mesma de les élites de la monarquía, frente a la imposición tiránica, el nuestru pueblu amosó una vitalidá y un rixu que, doscientos años depués, siguen siendo indispensables pa encarar la parálisis de la nuestra sociedá y instituciones.

Nun va ser la pura acción institucional quien faga cayer el réxime del 78 y roce’l camín pa un procesu constituyente. Nun ye la simple llucha parlamentaria la que va afondar la resquiebra abierta en 2014 coles grandes movilizaciones sociales que tuvieron el so cume nes Marches de la Dignidá del 22 de marzu. Nestos tres años vimos cómo diben vaciándose les cais mientres alitaba la esperanza de que copando les instituciones representatives yera posible forciar el cambiu. Y nun ye asina. Dixímoslo entós y dicímoslo agora: cais vacies nun valten réximes. Ensin movilización popular, ensin organizaciones sociales fuertes, autónomes y con una axenda non subordinada a les espresiones político-electorales el cambiu ye imposible. Nun ye esperable abandonar les places y pretender llenales agora a golpe de corneta pa favorecer una determinada táctica parlamentaria. Eso, a mediu plazu, namás lleva a la decepción y al desengañu.

El réxime de la II Restauración sigue en crisis y la so parte más feble ye la pata esquierda del turnismu: el PSOE. Eso tien especial significación nel nuestru país, Asturies, onde’l Partíu Socialista ye la fuercia hexemónica dende hai cuarenta años. Desenmazcaralu, y non echa-y un gabitu, ye condición indispensable pa forciar el cambiu. Los llamaos a una “mayoría de progresu”, en Madrid o n’Uviéu, cuntando con él, namás sirven pa reforcialu. Nun hai un PSOE bonu y un PSOE malu. Hai un PSOE compliz.

Izquierda Asturiana (IAS) apoya les Marches de la Dignidá, qu’esti sábadu 27 de mayu vuelven a confluyir en Madrid. Apoyámosles porque ye una oportunidá de volver a activar un movimientu unitariu y de mases que non solo denuncie la situación sinón qu’amás tenga’l valor d’atrevese a falar d’una alternativa que ponga en cuestión non solo les polítiques sinón tamién los marcos de dominación. La clave nun ta en Madrid. Ta n’Europa. Como en 1808. Y como en 1808, fai falta un movimientu popular, de rotura, que s’atreva a enfrentase a los tiranos que, en nome de la llibertá y el progresu, ufren dominación y servidume. Otra vez, apostamos pola Asturies siempre insubmisa. Por un 25 de mayu continental.

25 de mayu de 2017

Dirección Nacional d’Izquierda Asturiana (IAS)

Anuncios
Esta entrada fue publicada en IAS. Guarda el enlace permanente.